¹ Uluntu umo pali mwebo apusana nomunankwe, bushe cine kuti atwala umulandu wakwe ku cilya nokuya kumupingula ku ushaishiba Lesa, afwila ukutwala ku bantu abashila abakwa Lesa? ² Bushe mwebo tamwashiba ukuti abantu bakwa Lesa abashila ebakapingula icalo? Kanshi nga mwalishiba ukuti mukapingula icalo, nga kuti mwafilwa shani ukupingula utumilandu utunono? ³ Bushe tamwaishiba ukuti nifwebo bene tukapingula naba malaika? Palibufi, kanshi, imilandu iya mubumi bwesu? ⁴ Nomba uluntu paba imilandu yamusango uyu pakati kenu, bushe nindo mwingatwalia imilandu yenu ku bantu abo ulukuta talwa cetekela? ⁵ Nebo nalanda ukuti cansoni kuli mwebo. Bushe icine cine pakati kenu tapali uwamano uwangapwisha ukukansana pakati ka kuba munyina? ⁶ Nomba mwebo uwabwananyina nga ali no mulandu kuwa bwananyina munakwe, mwebo mutwala umulandu ku bantu aba shasumina! ⁷ Ala camusebanya nganshi kuli mwebo mwe bena Kristu ukulekutwalishanya ku cilye ca milandu. Bushe cindo ico mwebo mushilabilako fye abanenu nga bamilufyanya? Bushe nindo mwebo mushisuminina nangu nga bami fyenga fye? ⁸ Nomba ala namwebo bene mulalufyanya elo nokubepa, elo mucita ifi kuli ba munyinane banenu! ⁹ Bushe mwebo tamwaishiba ukuti abantu aba masambi tabakapyane ubufumu bwakwa Lesa? Mwilakusumina ubufi. Bacilende, abapepa utulubi, abacende, abaume abacende, abolungana nabaume banabo, ¹⁰ abapupu, abalunkumbwa lwa fyuma, bacakolwa, abamusalula, elo naba cenjesha abanabo--aba bonse tabaka pyane ubufumu bwakwa Lesa. ¹¹ Efyo bambi pali mwebo mwali akale. Nomba mwalisambika, mwalisangulwa, mwaliba abakaele pa menso ayakwa Lesa ukupitila mwishina lyakwa Shikulu Yesu Kristu elo naku Mupashi wakwa Lesa wesu. ¹² ''Icili conse ninsambu shandi'', nomba teconse ningamwenamo ubukumu. ''Icili conse ninsambu shandi,'' nomba nshakatungululwe ubusha ku cili conse. ¹³ ''Ifilyo fyaba nokuya mulufumo, elo nolufumo nalo lwabelako ifilyo,'' nomba Lesa akonaunaula ifi fyonse fibili. Umubili tawabelako ubulalelale iyo. Lelo, lelo wabelako ukulekubombela Shikulu, elo Shikulu nao e mwinw wa mubili. ¹⁴ Lesa ewabushishe Shikulu kuba kufwa elo nafwebo bene eukatubusha ku maka yakwe. ¹⁵ Bushe mwebo tamwaishiba ukuti imibili yenu filundwa ifyakwa Kristu? Bushe nomba kuti nabula umubili wakwa Kristu elo noku ulundinkanya kuli cilende? Awe cakana! ¹⁶ Bushe mwebo tamwaishiba ukuti uwasankana pamo na cilende ninshi baba naye umubili umo? Amalembo yalilanda ayati, ''Ab babili baba umubili umo.'' ¹⁷ Nomba uyo uwasankana na Shikulu ena ninshi aba umupashi umo na Shikulu. ¹⁸ Talukeni ku bulalelale! Amasambi yonse ayo umuntu acita catikila kunse yamubili, nomba uwacita ubulalelale alufyanya naku mubili wakwe umwine. ¹⁹ Bushe mwebo tamwaishiba ukuti umubili wenu litempele lyakwa Mupashi wa Mushilo, uyo uwikala mukati kenu, uyo uyo mwakwata ukufuma kuli Lesa? Bushe mwebo tamwaishiba ukuti tamuikalila fye? ²⁰ Pantu mwebo Lesa alimishita pa mutengo uukulu. Eico kanshi mulingile ukulekucindika Lesa mu mibili yenu elo namu mupashi wenu, ifyo ifyaba ifyakwa Lesa.