¹ Mwa kakatchi kw'oko kuba bana b'e mukasi w'ekunalyi, ku Kristo atchuyilyire kuba tchubooke re, e ndonga soko mwimange, ilyi mutatchihubaa kusimbwa kandji n'e misi y'e musimu ilyi y'e buko be. ² Lolaa, nyono Paulo nyiba bilyire batcha, mukeshibwa, Kristo ata batabala ku mwasi woshi. ³ Kandji nyihubire kuamilyisisa ngasi mundju ola w'eshirwe, oko bimwemire e kuyikilyisa e mano mwoshi. ⁴ Mwera muberulwe ne Kristo, mwabo mu muhondjire e kuandjirwa e kunalyi kwa maanure, mwera mukumbaere n'ekutenga mwa kuba n'e lukoo. ⁵ Kwa bushi tchubano kwa muka mweru wa Ongo, tchutchumbikisise e bulangalyire bw'e kunalyi kwa ndjira y'e bwemere. ⁶ Kwa bushi mwa kakatchi ka Kristo Yesu ekwishibwa kutashingenene mwasi, ilyi ekut'eshibwa, si e bwemere bwakola e mulyimwo kwa masimane. ⁷ Mwende mwaenda lubiro kubuya, nde yi wabala yilyire mutatchikengaa e kunalyi? ⁸ E kulayilyi rwa kulyi ngoko kutatengire e mw'ola wababalangi raa mwabo. ⁹ E kuamba ( kw'e bilyo) kueke, kwende kwa amya etchitore tchoshi. ¹⁰ Nyete e mulangalyi ro e mwenyu mwa kakatchi k'enawetchu, kwa mutabe na sindji sindji nyifindjo. Si kweyine ola wendjire wabatambukasa, anga angilyira e butchindjibuke bwaye yeyine, ngoko bunalyi bwoshi. ¹¹ Nanyi, benye wetchu, nga nendjire neyilyisa e mwasi w'ekwishibwa, kwa bushi netchiye nyitchilyi nalyibusibwa? Aola e tchanzo tch'e musalaba tchera tchialulwe ! ¹² Kubinalyi, abo bendjire bababika mw'e karinda, banga tchilayire e mitchima yabo beyine. ¹³ Benye wetchu, mwabo mu mwabalangirwe ilyi muala kuba babwookere, si e kubwookala kwe nyu kutabaa kwa kuhonda kukulyikira e mubilyi, si mukorerane kwa masimane. ¹⁴ Kwa bushi, e mano mwoshi mayikilyire mwa kakatchi ka mwasi muuma, n'oyo mwasi yi yono: "Umusime mwenye wenyu ngokula utchisima weyine." ¹⁵ Si kweyine mukalumuna n'e kulyana, mulolae, mungesha kubabasanya. ¹⁶ Na batcha, nyitetchire, mwendae kwa mubi lyi kwa bushi mutanga ala ekuyikilyisa e nyifindjo soshi s'e mubilyi. ¹⁷ Kwa bushi e mubilyi ende ahonda ayimane n'e mutchima, n'e mutchima nao uhondjire uyimane n'e mubilyi; kwa bushi n'oko bine bibilyi byende byayimana, tchiro mutanga ala ekuyira ebye muhondjire. ¹⁸ Si kweyine, muka longolanyibwa ne muka mweru wa Ongo, mutatchi lyi e masina s'e mano. ¹⁹ Kunoko, e biyiro by'e mubilyi bimyekene, nabye bi bibine: e buhungu, esinga, e bulyalya, ²⁰ emeyilyisa m'ekutchikumba e shushanyo, e buhunzi, e buhombanyi, e malwa, e bute, e mufula, e kubangana, e lwayo, ²¹ e husuda, e bulalu, e kwiuta kulush'eluero, n'e bindji bishushene n'ebye, mwa kakatchi k'ebye, nyibabilyire e muhondo, ngoko nabaa natangire kubabira, oko e bandju bende bayira e bilyi ng'ebye, batakayika mwa bwami bwa Ongo. ²² Si kweyine e bifuma by'e mutchima bulyi busime, e bushaaluke, e bwolo, e kubabalyira, e mutchima utchere, e bwondjo, e bwemeresi, ²³ e burembu, e luero; e ndonga s'e myasi ilyi ng'eye kutalyi e butchindjibuke. ²⁴ Na bala balyi ba Kristo Yesu bera bamanyikire ilyi kwita e mubilyi alauma n'e ndanya saye sibi n'e nyifindjo saye. ²⁵ Tchukalama kwa mutchima, na tchuna endae kwa mutchima. ²⁶ Tchuta tchitongaa busha, tchuka kunzanya n'e kubabasanya.