¹ Si kweyine, nyitetchire kwa eukema, e mango mwoshi atchilyi mwana, atete lubero n'e mukobe, tchiro angaba yi ena byoshi. ² Si kweyine, atchilyi e masina m'e balanzi, kuyikilyira etchishangi tchalanyisibwaa n'eshe. ³ Kunoko netchu, e mango tchwabaa tchutchi lyi bana, tchwendee tchwakoresibwa ngoko e kuhonda kw'e butala kulyi. ⁴ Na kuyika ekuyiki lyira kw'etchishangi, Ongo era kutchuma e mwana waye Yesu wabutchibwaa n'e mukasi, era kubutchwa e masina m'e mano. ⁵ Ilyi aaala eku tchungula bala bwoshi babaa e masina m'e mano, ilyi netchu tchual'ekuba bana . ⁶ Na kwa bushi mwabo mwera mulyi bana, Ongo era kutchuma e muka w'e mwana waye mwa mitchima yenyu, yi wende walyira, Aba, ku kuteta Tata. ⁷ Nga kubilyi batcha, woyo utatchi lyi mukobe, si wera ulyi mwana; nanga wera ulyi mwana wa Ongo, wera ulyi mwana wa mwimwo wa Ongo. ⁸ Si kweyine mwako kashangi, kwa bushi muta menyaa Ongo, mwera kukorera abwo e kulyi batalyi ba ongo. ⁹ Si ilyi mwaba mwera mumenyire Ongo, ilyi busibu kumenyekana ne Ongo, kwa bushi ne tchiye kandji e kuhubilyira e meyilyisa matanzi matalyingemene, mandaalyi rwe, amwo mwera mwahonda kandji kukorera? ¹⁰ Mwende mwakulyikira e siku, n'e myesi, n'e bishangi n'e myaka. ¹¹ Nyibwobayilyire, kwa nyi ngesha kuba natchilyibusise busha e ndonga senyu. ¹² Benye wetchu, nyibemire, mube nga nyono (ilyi ngokuno nyilyi), kwa bushi nanyi nyilyi nga mwabo. Mutanyitetembaaa ku mwasi woshi woshi. ¹³ Si kweyine, mumenyire kwa nabeyilyisaa e mwasi mubuya butanzi kwa bushi n'e butambukare bw'e mubilyi. ¹⁴ N'etangulo lyabayikiraa mwa kakatchi k'e mubilyi wanyi, muta lyibengaa ilyi kulyilayira; si mwera kunyangilyira nga malayika wa Ongo, nga Kristo Yesu. ¹⁵ Ngayi kwera kulyi oko kutchibona nga mulyi b'e rayi? Kwa bushi nyibaamilyisise kwa, nga binga alyikana, munga kulyire e meho menyu, munyerese mwo. ¹⁶ Ilyi nyera nyilyi muhomba nyi wenyu kwa bushi nyiba bilyire e kulyi? ¹⁷ Abwola bete e mbusha nenyu, si kweyine ata kwa ndjira yibuya, si bahondjire e kubahwekera e mbuwa, ilyi nenyu mubabonera e mbusha. ¹⁸ Nakwo kulyi kubuya e kubwonerwa e mbusha e siku soshi kwa mwasi mubuya, si ata ekashangi ka nyono nyilyi alauma nenyu mbanga. ¹⁹ Bana banyi, mwabo munyibwonerere e malu mwa kandji kuyika Kristo ahube kuremwa buyaya mwanda senyu. 0 Na nga nyingabere alauma nenyu batcha, na ekuualula e murenge wanyi ! Kwa bushi nayire mw'e karinda e ndonga senyu. ²¹ Munyibirae, mwabwo mu mwahond'e kuba e masina m'e mano, kute! Mutonvaa e maanure? ²² Kwa bushi byandjikirwe, kwa Abrahamu abaa ete bana babilyi, muuma ku mukaye w'ekulyi, n'eundji kwa mukasi muenyi. ²³ Si kweyine oyo mwana w'e mukasi muenyi, abutchibwaa kwa mubilyi, si e mwana wa mukaye w'e kulyi abutchi bwaa kwa tchiraane. ²⁴ Eye myasi yende yatetchibwa kwa muanyi; kwa bushi kwabwo ku kulyi nga biraane bibilyi, tchiraane tchiuma kutenga kwa ndjulungu ilyi muruko w'e Sinai, tchiraane tchende tchabuta kwa bukobe, tchi tchilyi tchekukoresibwa. ²⁵ Kwa bushi e kukoresibwa ku kulyi nga muruko ilyi ndjulungu y'e Sinai kutenga e Arabuni, ushushanyi sibwe ne Yerusalemu ya kulwarero; kwa bushi ende akola alauma n'e bana. ²⁶ Si kweyine, Yerusalemu w'e ndonga alyi w'e kunalyi, naye yi ulyi nyama wetchu tchubano. ²⁷ Kwa bushi byandjikirwe, Ushaaluke, woyo u ulyi ngumba, u utabutaa; Wirus'e murenge, Ulyire, woyo u utonvaa e malumwa; Kwa bushi e bana baye oyo warekirwe balyi banene, Kulusha e bana bw'oyo w'ete mulume. ²⁸ Kwa batcha, benye wetchu, nga Isaka, tchubano tchulyi bana b'e tchiraane. ²⁹ Si kweyine, nga ese siku oyo wabutchibwaa kwa mubilyi, amulyibusaa oyo wabutchibwaa kwa mutchima, kubilyi kuyika batcha. ³⁰ Si kute e mandjiko matetchire? "Ukoroka nye e mwana w'e mukasi muenyi alauma n'e mwana waye, kwa bushi e mwana w'e muenyi ilyi mukosi atangaala kwima alauma n'e mwana w'e mukasi w'e kunalyi. ³¹ Mu mango, benye wetchu, tchubano tchutalyi bana b'e mukasi muenyi ilyi mukosi, si tchulyi bana bw'oyo mukasi w'e kunalyi.