¹ Benye wetchu, ilyi e mundju anga ayisibwa mwa bubi bwoshi, mwabo mu mulyi b'e mutchima mualule oyo mundju ulyi ngoyo kwa mutchima w'e burembu, ube mwa kutchanza e mutchima wawe, ungesha kutangulwa weyine. ² Mube bakutaba lana ilyi kwekerana e misiwo na ekuyikilyisa kulyi ngoko e mano ma Kristo. ³ Kwa bushi ilyi e mundju angalola nga alyi kandju, naye atalyi kandju, atchitebire e mutchima waye yeyine. ⁴ Si kweyine ngasi mundju atangu le e mukolo waye yeyine, ilyi abona e kuba n'e kutchitonga mwa kakatchi k'e mutchima waye weyine, si atabaa kutchitonga kwa bandji bandju. ⁵ Kwa bushi ngasi mundju ak'eka e tchitchu ilyi e musiwo waye yeyine. ⁶ Eweyilyisibwa abe lushangi ilyi abe alauma n'e mwiyilyisa waye mwa kakatchi ka byoshi ebye ayira. ⁷ Mutatebibwaa, Ongo atayilyirwa e lupalyi; kwa bushi ngasi kandju kala e mundju ayi ngire ku akana umbula. ⁸ Kwa bushi ola woshi ukayinga kwa mubilyi waye, na mwa kakatchi kw'oyo mubilyi waye, akaumbula e busheresi. Si ola ukayinga kwa mutchima, mwa kakatchi k'e mutchima akaumbula ekalamwo k'e siku soshi. ⁹ Kandji tchutatamaa mwa kukola ilyi ekuyira e bibuya; kwa bushi tchukaumbula kwa kashangi katerene, nga tchut'olyire e mutchima. ¹⁰ Kwa bushi n'oko, ngoko tchungabona e andju, tchubayi lyire e mabuya e bandju bwoshi, busese bala bw'omwo nyumba y'e bwemere. ¹¹ Muloreresae, kute bilyi bibuya ilyi bilyi bya bulayilyire ku nyibaandjikilyire kwa kuboko kwanyi nyeyine ! ¹² Bala bwoshi bende bahonda kubo nekana babuya kwa byerekere e mubilyi, bu bende babasesa e kwishibwa, ilyi batabonekanaa balyi busibwe n'e musalaba wa Kristo, ukola mbanga ku kwende kwa beka. ¹³ Kwa bushi tchiro nabwo beyine abwo b'eshirwe, batakengire e mano ma Ongo, si bahondjire nenyu mwishibwe ilyi babona e kutchisimisa mwa mibilyi yenyu. ¹⁴ Si kweyine nyono, nanga, ndabwene e kutchisimisa kwa kandju kwoshi kwoshi nga ata kwa musalaba w'enawetchu Yesu Kristo, kwa bushi, kwa kurengera oyo musalaba kw'e butala bwoshi bwera butchindjibusibwe e mwanyi, nanyi e mw'e butala. ¹⁵ Kwa bushi e kwishibwa kata kandju, ilyi e kut'eshibwa nakwo kata kandju, si ekulyi kubuya kuba tchiremwa tchiyaya. ¹⁶ Na bala bwoshi bakabonekana balyi mwa luenzi lubuya lulyi ng'olo, e bwolo n'e bwondjo n'e miyisha bibe e mw'e b'e Israeli ba Ongo. ¹⁷ Kutengera batcha, kutengera kulwarero e mundju woshi atanyilyibusaa; kwa nekire mwa mubilyi wanyi e tchiloreresi tcha Yesu. ¹⁸ Benye wetchu, e lukoo lw'enawetchu Yesu Kristo lube alauma n'e mitchima yenyu. Amina!