¹ Ndesire okuli muli Kristu, nta nywerha, n'omurhima gwani ye muhamirizi wani muli Mûka Mutakatifu: ² ngwerhe burhe bunji n'amababale garhausa omu murhima. ³ Neci, nankasimire niene nkagwe nnantenzibwekwo Kristu erhi benewirhu barhuma, balya b'omu ishanja lyani ly'omubiri; ⁴ bo bene-Israeli: bo Namuzinda acishozire mpu babe bana bage anayerekana irenge lyage muli bo; bahîrwé endagano n'amarhegeko n'emigênzo y'okukolera Namuzinda n'eciragane cage. ⁵ Ba shakuluza bali b'omu ishanja lyabo; n' oku maburhwa g'omubiri; Kristu ali wa kuli bo, ye mwami mukulu w'ebintu byoshi, ye Namuzinda mugishe emyaka n'emyaka. Neci, ntyo! ⁶ Arhali kuderha oku kanwa ka Namuzinda kakubire; bulya arhali abàburhagwa n'Israeli boshi bo bene-Israeli, ⁷ arhanali abarhengaga omunda y'Ibrahimu boshi bo bana bage; ci kuli Izaki iburha lyawe lya rhenza izino; ⁸ kwo kuderha oku abana b'omubiri arhali bo bana ba Nnâmahanga, ci abana b'eciragane bône lyo iburha ly'okuli. ⁹ Yumvagi oku eciragane cidesire: Hano nshub'igera mw'aga mango erhi Sara agwerhe omwana w'oburhabana. ¹⁰ Arhanali okwôla kwône. Rebeka naye arhozire izimi lya mulume muguma yêne, ye larha Izaki. ¹¹ Erhi abana baba barhaj'iburhwa, barhaj'ijira oli ecinja oli ecibi, mpu lyo Nnâmahanga ayerekana oku ajira nk'oku alonzize omu kucishoga abage, ¹² oku arhalola bijiro, ci bulonza bw'owahamagala yêne, anacibwirwa, mpu: Enfula yanashige omuziba, ¹³ nk'oku biyandisirwe mpu: Narhonyize Yakobo, nashomba Ezau. ¹⁴ Gurhi rhwaderhaga? Ka Nyamuzinda ankabamwo obulyalya? Ntamango! ¹⁵ Kali yêne wabwiraga Musa, erhi: Mbabalira oyu nnonzize okubabalira, nnambêra lukogo oyu nnonzize okubêra lukogo. ¹⁶ KUziga birhali bya kulonza erhi bya kulibirha, ci bya bwonjo bwa Nnâmahanga. ¹⁷ Kandi Amandiko gabwizire Faraoni, erhi: Nakuyimikaga nti nkuyerekanemwo obuhashe bwani, lyo n'izino lyani likuzibwa omu igulu lyoshi. ¹⁸ Ntyo, anababalire oyu alonzize, n'oyu alonzize okudundaguza amudundaguze. ¹⁹ Okolaga wambwira, erhi: " Cirhuma aciciduduma? Ndi wankalahira okujira ebi alonzize? " ²⁰ We muntu, oligi ndi mpu wajisa Namuzinda kadali? K'akantu omuntu abumbaga kankamubwira, erhi: "Carhumaga wanjira ntya? " ²¹ K'omubumbi arhankakolesa ibumba lyage nk'oku alonzize, n'okurhenza mw'eryo ibumba liguma akantu kinjinja n'akantu kantyantya? ²² Naye Nnâmahanga, omukuyerekana obukunizi bwage n' okumanyisa obuhashe bwage, akaba alêmbîre n'obutûdu bwage bunji ebiremwa bikwanine obukunizi byâli hofi okuherereka, ²³ akaba alonzize okuyerekana obuhirhi bw'obukunizi bwage ku biremwa by'olukogo yêne âli ayosire arheganyîze obukuze! ²⁴ N'ebyo biremwa by'olukogo byo rhwe ahamagalaga, arhali omu Bayahudi bône, ci n'omu bapagani. ²⁵ Kwo adesire omukanwa k'Ozeya, erhi: Nayirika lubaga lwani abarhâli lubaga lwani na murhonyi wani orhâli murhonyi; ²⁶ n'aha babwiragwa; mpu: Murhali lubagu lwani, aho honêne baderhwe bene Namuzinda oziîne. ²⁷ Naye Izaya aderhire Israheli, erhi: ciru bene-Israheli bankaluga nka mushenyigw'omu nyanja, obusigale bwône bwana cizibwe; ²⁸ bulya Nyakasane ayunza duba na buzira kushubira nyuma akanwa kage omu igulu. ²⁹ Kandi Izaya âli erhi alêbire; mpu: Acibaga Nyakasane w'emirhwe arha rhulekeraga iburha, singa rhwabire okwa Sodoma, singa rhwashushire Gomora. ³⁰ Kurhi rhwaderhaga? Rhuderhe oku abapagani barhashimbaga bushinganyanya bashikirire obushinganyanya, bwo bushinganyanya burhenga omu buyemere; ³¹ ci bene-Israheri bohe bakag'ishimba irhegeko ly'obushinganyanya, ery'irhegeko barhalihikagakwo. ³² Carhumire? Bulya barhacikubagiraga bwemere, ci bacikubagira ebijiro; na ntyo basarhala oku ibuye ly'okusarhaza, ³³ nka kulya biyandisirwe, mpu: Kà murhabwini oku mpizire omu Siyoni ibuye ly'okusarhaza n'ibuye ly'okuhirimya? Ci oliyemire arhankabonesibwa nshonyi.