¹ Bene wirhu; eci omurhima gwani gucifinja n'acinsengerera emwa Namuzinda: nti nabo bacunguke. ² Neci mpamirizize oku bashibirire Nnâmahanga, ci obushiru bwabo burhali oku bishinganine okuba. ³ Bulyalya burhamanyiriraga obushinganyanya bwa Nnâmahanga, ci balonza obwabo bushinganyanya, na ntyo balahira okushimba obushinganyanya bwa Nnâmahanga. ⁴ Bulya obushwinjirobw'irhegeko, ye Kristu, ye nayêza ngasi mwemezi. ⁵ Okubushinganyanya burhenga omu marhegeko Musa ayandisire, mpu: Omuntu wabushimbe, buna mulamye. ⁶ Ci obushinganyanya burhenga omu buyemere kwo budesire ntyala, mpu: orhaderhaga omu murhima gwawe, mpu: Ndi wankasôkera omu irunga? kwo kuderha mpu agend'imanulamwo Kristu; ⁷ nisi, erhi: Ndi wankayandagalira omu kuzimu kwokuderha mpu aj'irhenza Kristu omu bafu. ⁸ Bici budesirage obwo? Mpu: Oluderho luli hofi nawe; lukuli omu kanwa n'omu murhima; n'olwo luderho bwo bugo bw'obuyemere rhuyigiriza. ⁹ Bulya, akaba omu kanwa kawe onahamirize oku Yezu ye Nakasane, n'akaba oyemire omu murhima gwawe oku Namuzinda amufûzire omu bafu, wa cunguka. ¹⁰ Neci, obuyemere bw'omu murhima bwo buhisa omuntu oku bushinganyanya, n'obuhamirize bw'akanwa bwo buhisa omuntu oku bucunguke. ¹¹ K'Amandiko garhadesiri, mpu: Ngasi yeshi omuyemire arhakabona nshonyi? ¹² Bulya nta kabolo ekarhi k'Abayahudi n'Abagereki: Ali Nakasane muguma mwami wa boshi, ye shoboza abamushenga boshi; ¹³ bulya ngasi yeshi wanashenge izino lya Nakasane anacire. ¹⁴ Ci kwône kurhi bankamushenga barhanamuyemiri? Na kurhi bankayemera oyu barhasag'iyumva? Na kurhi bankayumva akaba ntaye wababwira? ¹⁵ Na kurhi bankaja bahanûla barhanarhumirwi? Kuyandisirwe, mpu: Oku amagulu g'abaja-bugo b'emyanzi y'Akalembe gayinjiha! ¹⁶ Ci kwône arhali boshi bayandikire emyanzi y'Akalembe, Izaya akudesire, erhi: Yagirwa, ndi wayemire obugo bwirhu? ¹⁷ Ntyo obuyemere omu kuhanûla burhenga n'okuhanula kujirwa n'akanwa ka Kristu ¹⁸ Ci nani ndôsize: Ka barhayumvagya? Neci mashi! Ciru n'izu lyabo lya yumvikine omu igulu lyoshi, n'enderho zabo zahisire ngasi haba muntu? ¹⁹ Nshubir'idôsa: "K'Israheli arhayumvagya bwinja?" Musa ye murhanzi w'okushuza, erhi: Nammuyumvisa obumvu oku ishanja lirhali ishanja , nammuzûsamwo obukunizi oku ishanja lirhajira bukengere. ²⁰ Ciru Izaya arhayobohaga okuderha, erhi: Abarhakag'innonza bo bambwine, abarhakag'indôsa bo naciyeresire. ²¹ Ci bene-Israheli ababwira, erhi: Omulegerege gwoshi, olu lubaga lurhumwa lunali lugoma na lulambulira amaboko.