¹ Ka ndôsagye? : "Ka Namuzinda akabulirage ishanja lyage? " Ciru n'ehitya! Ka nieki ntali mwene-Israheri, w'omu iburha ly'Ibrahimu na w'omu bûko bwa Benyamini? ² Nnâmahanga arhakabuliraga olubaga lwage acishogaga kurhenga mira . Nkabaga kuhaba muhabire kurhi Amandiko gadesire kuli Eliya erhi aciduduma emwa Nnamahanga mpu alega Israheri? ³ Erhi: "Yagirwa, bayisire abalebi bawe, bahongola ngasi lûsho lwawe; nani niene nsigire, banadwirhe balonza okunyirha" ⁴ Neci Namuzinda amushuzize? Erhi: "Nacishozire bantu bihumbi nda barhagonyeraga Bali idwi" ⁵ Ntyo kuhika ene hacisigire abantu bacishozirwe n'enshokano ya Nnâmahanga. ⁶ Ci akaba eri nshokano, birhaciri bijiro birhumire; n'acibaga arhâli ntyo, enshokano erhankacibire nshokano. ⁷ Kurhi rhwaderhaga? Eci Israheli alonza, arhasag'icibona; ci abacibwine banali bishogwa. Abandi badunduguzibwa, ⁸ nk'oku biyandisirwe, mpu: Namuzinda abahire omurhima gw'obungolongol, abaha amasu g'olubwibwi n'amarhwiri g'ebihuli kuhika ene. ⁹ Naye Daudi aciderhire, mpu: ecîbo cabo cibabêre isi, cihinduke murhego, cibe ibuye ly'okusarhaza, lunabe lwo luhembo lwabo. ¹⁰ Amasu gabo gajemwo olubwibwi ganahurhe! Obaherhe omugongo barhacifaga bayinamusire! ¹¹ Nani ndôsizagye: "Ka kusarhala kwarhumire bahirima? " Bunywesi! Ci okuhirima kwabo bwabire bucire bw'abapagani, mpu lyo bayumva obwagalwa. ¹² N'akaba okuhirima kwabo kwahindusire buhirhi bw'igulu, n'obukenyi bwabo bwaba buhirhi bw'abapagani, hano bagaluka ntuliri, ka barhabagaze kulusha? ¹³ Co cirhumire mmubwira, mwe bapagani, oku mba ntumwa y'abapagani n'obugo bwani nnonza buje irenge, ¹⁴ nti lyo nzûsa obumvu bwa bene wirhu b'ishanja lyani, nnambacungule mwo baguma-baguma. ¹⁵ Bulya, akaba okukagwa kwabo kwadwirhe omulungano gw'igulu, bici okugaluka kwabo kwayish'iba, kurhacibiri kufûka omu bafu? ¹⁶ Kali enshano ekaba nyinja, obuntu bwoshi bunabe bwinja, n'omuzi erhi gwankaba mwinja, amashami nago ganayinjihe. ¹⁷ Akaba hali amashami gatwirwe, nawe we murhi gw'emuzirhu waba we hirwa ahali hago, washangira amagoba garhenga omu cikundukundu c'omuzeituni, omanye wankalimbira amashami. ¹⁸ N'okaderha mpu walimba, okengere oku arhali we hêka ecikundukundu ci ecikundukundu co cikuhêka. ¹⁹ Neci, wanaderha, erhi: "K'amashami garhatubagwa mpu lyo nnja ahalihago? ²⁰ Ntyo kwo biri! Gatwirwe erhi kubula obuyemere kurhuma, nawe buyemere bwarhumire wahabera. Omanye wankacibona; ci oyobohe erhikwo. ²¹ Bulya, akaba Nyamuzinda arhababaliraga amashami mamerera, ka we ababalira? ²² Kuziga omanye obwinja n'obukali bwa Namuzinda: bukali kuli balya bahirimire, bwinja bwa Namuzinda kuli we, casinga obêremwo obwo bwinja; akaba arhali ntyo, nawe kutubwa wanayish'itubwa. ²³ Nabo bakaba barhabeziri omu kubula obuyemere kwabô, abashubiza omu mashami g'omurhi; bulya Nnâmahanga arhankabula obuhashe bw'okushub'ibashubiza mwo. ²⁴ Akaba w'oyo watwirwe oku Muzeti gw'erubala wameragakwo., wahirwa oku muzeti mwinja gurhali gw'enkomoka yawe, gurhi bôhe bankabulaga kwahirwa oku gw'imerero ly'abo? ²⁵ Nanga, bene wirhu, ntalonza muhabe eri ihwe, nti lyo murhag'icikubagira obushinganyanya bwinyu: baguma muli bene-Israheli bayorha bali bagomi kuhika abapagani bayishe ntuliri ²⁶ Na ntyola Israheli yeshi acunguka, nk'oku biyandisirwe, mpu: Omuciza arhenga e Siyoni; ye warhenza obubi muli Yakobo . ²⁷ Yo ndagano yani rhweshi nabo eyo, amango narhenza ebyaha byabo ²⁸ Neci, rhukalola Emyanzi y'Akalembe, bali bashombanyi erhi mwe murhuma; ci rhukalola okubacishogagwa, bali barhonyi erhi bashakuluza babo barhuma. ²⁹ Bulya Namuzinda akashoboza omuntu n'akamuhamagala, arhacigalula akanwa kage. ³⁰ Nka kulya mira mwakag'igomera Nnâmahaga, na bunola mwababalirwe erhi bugomi bwabo burhuma, ³¹ nabo kwo na kuguma, bunola bali bagomi erhi obwonjo mwabêrirwe burhuma, mpu lyo nabo bayish'ibabalirwa. ³² Bulya Namuzinda ashwekîre abantu boshi omu bugomi, mpu lyo ababêra obwonjo boshi. ³³ Owe nnakagali w'obugale n'obushinganyanya n'obumanye bwa Namuzinda! Oku emihigo yage erhamanyikana kwo n'enjira zage zirhayumvikana! ³⁴ Yendi okola omanyire enkengero za Nakasane? Ndi okola ojire omu ihano lyage? ³⁵ Ndi okola omugabire mpu ayish'imugalulira? ³⁶ Bulya byoshi emwage birhenga, yerhuma bihaba, binaba byage. Aj'irenge emyaka n'emyaka. Néci, ntyo!