¹ Bene wirhu, mmuhîre ihano erhi bwonjo bwa Namuzinda burhuma, nti muhâne emibiri yinyu nka nterekero y'obuzine, ntakatifu n'ey'okusimisa Nnâmahanga. Ntyo kwo mukwanine okukolera Nnâmahanga n'omurhima. ² Mumanye mwankacigererakwo er'igulu, ci muhinduke bantu bahyahya omu murhima gwinyu, lyo mumanyirira obulonza bwa Nnâmahanga: mumanye aminja, ebi akunda n'ebishinganine lwoshi. ³ Enshokano na hirwe erhumire, mbwizire ngasi muguma muli mwe nti murhakag'icigenza okulushire olugero, ci mucilole okunakwanine, nk'oku Nnâmahanga anagabire ngasi muguma erhi amushoboza obuyemere. ⁴ Bulya nkakulya omu mubiri muguma rhujiramwo birumbu binji na kulya ebirumbu byoshi birhajira mukolo muguma, ⁵ nirhu ntyo kwo rhunali banji, ci erhi rhunali mubiri muguma muli Kristu, nangasi muguma ali cirumbu c'ababo. ⁶ Kandi rhwahirwe enshokano zirhali nguma, ngasi muguma nk'oku anashobwire. Owahirwe enshokano y'obulebi, ayikolese nk'oku obuyemere bunadesire; ⁷ owahirwe enshokano y'okutumikira ababo, atumike bwinja; owahirwe enshokano y'okuyigiriza, ayigirize; ⁸ owahirwe ey'okuhanûla, ahanûle. Owarhabala abakenyi, arhageraga; okulire ababo, abashibirire; owababalira owabo, amubabalire n'enshagali. ⁹ Obuzigire bwinyu burhabagamwo bulyalya. Mushombe amabi mucishwekêre oku minja. ¹⁰ Muzigirane nk'abalondana; ngasi muguma akakenga ababo nk'abamukulire. ¹¹ Mube ba bushiru buzira bwolo, mube n'emirhima mikombêdu, murhumikire Nakasane. ¹² Mushagaluke omu bulangalire, murhadundaganaga omumango g'amalibuko, mushenge burhahusa. ¹³ Mukarhabala abatakatifu omu bulangalire bwabo, mukahandisa ebigolo. ¹⁴ Mukagisha abamulibuza; mukahâna obwanga, murhanahira mukuheherera ndi. ¹⁵ Mukashagaluka n'abashagalusire, munalake haguma n'abalaka. ¹⁶ Mukalolana kuguma mwêne na nnene. Murhakag'ilonza okukulira abandi ci musime obwirhohye. Murhacijiraga birhonzi omu masu g'inyu mwêne. ¹⁷ Mumanye mwankagalulira omuntu obubi oku bundi. Mukalonza okujira aminja embere z'abantu boshi. ¹⁸ Erhi kwankahashikana, mucisêze okuba n'omurhûla n'abantu boshi ¹⁹ Murhakag'icihola mwenene, bira bani, ci muleke obukunizi bwa Namuzinda bwône buyish'icihôla, bulya kuyandisirwe, mpu: Okucihôla kuli kwani! niene nayish'ilyûla ngasi muntu nk'oku akwanine, Nakasane okudesire. ²⁰ Ci omushombanyi wawe erhi ankashalika, onamushalûle; akaba agwerhwe n'enyorha, onamuhe eci anywa. Okumujirira ntyo kuli kulunda amakala g'omuliro oku irhwe lyage. ²¹ Omanye wankahimwa n'obubi, ci ohime obubi omu kujira aminja.