¹ Ngasi muntu akayumva abarhegesi ba mukulire; bulya nta bukulu burharhenga emwa Nnâmahanga, n'amarhegesi ganahaba goshi Namuzinda yêne wagajiraga. ² Ntyola, ngasi ogomera omurhegesi, erhi irhegeko lya Nnâmahanga agomire, n'abagoma bône bacilerhere obuhane. ³ Abarhegesi barhali ba kuyobohwa n'abajira aminja, ci abajira amabi bo bakwanine okubayoboha. K'olonzize okurha yoboha abarhegesi? Okajira aminja, bakusima, bulya abo barhegesi ⁴ Nnâmahanga wabarhumaga mpu bakujirire aminja. Ci erhi wankakola amabi, oyobohe; bulyala burhali busha bahekera engorho. Bali ntumwa za Namuzinda na baganda b'obukunizi bwage balyûza abakola amabi. ⁵ Kuziga kukwanine okubayumva, arhali bwoba bwône burhumire, ci n'izu ly'omu murhima lirhumire. ⁶ Kwo kunarhuma mwavurha okwo; bulya abarhegesi kwo banali nka baganda ba Nnâmahanga bajira omukolo gwabo. ⁷ Mukaha ngasi muguma ebi anakwanine; omuvurhisa, mumuvurhire; omuhôza, mumuhe i n'or; ow'okurhinywa, mumurhinye; n'okwanine kukuzibwa, mumukuze. ⁸ Murhabêraga omumwenda gw'omuntu ahanyuma ly'omwenda gw'obuzigire; bulya ozigire ababo erhi ayunzuzize amarhegeko gôshi. ⁹ Kwo binali; aga marhegeko: Orhahira okahusha; orhahira okaniga; orhahira okazimba; orhahira okayemera enyifinjo mbi, n'agandi marhegeko, gali muli eci cinwa: Ozigire abinyu nk'oku ocizigira wêne. ¹⁰ Ahali obuzigire harhankaboneka bubi oku bandi. Kuziga obuzigire lyo ishwinjiro ly'amarhegeko. ¹¹ Câba murhahabiri mango gahi gano rhuli mwo. Amango g'okuzûka gahisire. Obucire bukola burhuli hafi kulusha amango rhwarhonderaga okuyemera. ¹² Obudufu bwaling'igera, n'obuce buyiruka. Kuziga rhulekage ebijiro by'omwizimya, rhufumbarhe amatumu g'obulangashane. ¹³ Rhucikenge omu lugendo lwirhu nk'oku kukwanine okujira izuba lyabasha. Rhuleke obudambiye n'endalwe; nta kuhusha na nta kujira eby'obumaguza; nta nnongwe na nta bumvu; ¹⁴ mucihulikire Nakasane Yezu Kristu, murhanacikag'irhogoza omubiri omu kushimba enyifinjo zagwo.