¹ Oli inganyi omu buyemere mumuyankirire buzira kumujisa kadali oku bimurhindiza. ² Hali omanya mpu ankalya ngasi biryo; omuzamba yehe arhalya ezirhali nshogo-lubala zône. ³ Owalya amenye arhagayaguzagya orhalya; n'orhalya arhagambaga owalya, bulya Nnâmahanga amuyankirire. ⁴ Oli ndi w'oyo mpu watwa olwa mwambali wabene? Ayimanzire erhi ahirimire, okwo kuyerekire Nnâhamwabo. Ci kuyimanga anayorha ayimanzire, bulya arhali misi Nakasane abuzire y'okumulanga arhahirime. ⁵ Hali omanya mpu olusiku lurhashusha lundi; haligi n'owundi omanya mpu ensiku zôshi zirikuguma. Ngasi muguma ashimbe oku anabwine omu irhwe lyage. ⁶ Okenga ensiku, akujira Nakasane orhumire; n'olya ngasi biryo, Nakasane orhuma akujira, bulya ovuga Nnâmahanga omunkwa arhalya naye Nakasane orhuma akuleka, anavuga Nnâmahanga omunkwa. ⁷ Bulya ntaye muli rhwe ocilamira yêne, na ntaye ocifira yêne. ⁸ Rhukalama, Nakasane rhulamira, na rhukafa, Nakasane rhufira. Omukalamo n'omulufu, rhuli ba Nakasane? ⁹ Bulya Kristu afîre anafûka mpu ly'aba Mwami w'abafîre n'abazine. ¹⁰ Ci w'oyo, cirhuma otwa olubanja lwa mwene winyu? Nawe we, cirhuma ogayaguza mwene winyu? Karhali rhweshi rhwahamagalwe omu lukiko lwa Namuzinda, ¹¹ bulya kuyandisirwe, mpu: Nakasane adesire erhi: Mbofa akalamo kani orhabwini ngasi idwi lyanfukamira na ngasi lulimi lwaha Namuzinda irenge lyage! ¹² Kuli kuderha oku ngasi muguma muli rhwe anabulane yêne embere za Nnâmahanga. ¹³ Kuziga rhuleke okukatwirana emanja rhwêne na nnene; rhumenye erhikwo rhwankarhuma mwene wirhu asarhala erhi ahirime. ¹⁴ Mmanyire, nnanyemire muli Nakasane oku nta kantu kahumanya omu bworhere bwawe; ci obwine oku kantu kalebe kali kabi, oyo kanamuhumanya. ¹⁵ Erhi wankalerhera mwene winyu oburhe erhi biryo birhuma, erhi orhacishimbiri enjira y'obuzigire. Mâshi omanye wankarhuma mwene winyu Kristu afiraga ahera erhi biryo byawe birhuma! ¹⁶ Mumanye mwankalangika irenge linyu oku bijaci. ¹⁷ Kali obwami bwa Namuzinda burhali bwami bwa biryo erhi bwa binyobwa, ci buba bushinganyanya, na murhula, na nshagali muli Mûka Mutakatifu. ¹⁸ Okolera Kristu ntyola, asimisa Nnâmahanga n'abantu banamusime. ¹⁹ Kuziga kukwanine rhushimbulire ebilerha omurhula n'ebyankarhabala abirhu. ²⁰ Mâshi omanye wankanashâba omukolo gwa Nnâmahanga erhi biryo birhuma. Neci, ntahabiri oku ebiryo byoshi biribinja; ci bihinduka bibi oku muntu obirya omu kusarhaza abandi ²¹ Kulikwinja okurhalya enyama, okurhanywa erivayi, n'okurhajira akantu kankarhuma mwene winyu asarhala, erhi ahirima, erhi abula emisi. ²² Obuyemere bwawe ogwerhe, obulange omu murhima gwawe ember za Nnâmahanga. Iragi lyage omuntu omurhima gwage gurhalongoza amango agwerhe ahiga ebi ajira ! ²³ Ci ngasi yeshi ojakw'alya anadwirhe arhindira, erhi mira ayagaga, bulya arhashimbire izu ly'obuyemere bwage; na ngasi kantu karharhenga omu izu ly'obuyemere bwage! na ngasi kantu karharhenga omu izu ly'obuyemere erhi caha.