¹ Rhw'ono rhwe rhugwerhe emisi, kukwanine rhulembere obuzamba bw'engonyi, rhunaleke okukalongereza ebirhusimisize. ² Ngasi muguma muli rhwe olonze okusimisa ababo omu kujira aminja n'omu kuhâna olwiganyo lwinja. ³ Bulya Kristu naye arhalongerezagya ebimusimisize yêne, ci nk'oku biyandisirwe: Ebijaci by'abakujacira byabirage nié biciyôha kwo. ⁴ N'ebyayandikagwa mira byoshi, rhwe byayandikiragwa, mpu bibe nyigirizo zirhu, lyo rhuba n'obulangalire omukubona gurhi Nnâmahanga akag'irhandula n'okurhuliriza olubaga lwage omu Mandiko matakatifu. ⁵ Mâshi Namuzinda cisiki c'okulembera amalibuko n'ec'oburhulirize, amuhe okuyumvanya mwêne na nnene okulwiganyo lwa Yezu Kristu, ⁶ lyo mweshi haguma n'omurhima muguma n'izu liguma, muha Namuzinda n'ishe wa Nnawirhu Yezu irenge. ⁷ Co cirhumire mukayankirirana mwêne na nnene nka kulya Kristu ammuyankiriraga oku irenge lya Nnâmahanga ⁸ Ka mmubwire bwinja: Kristu acijizire murhumisi w'abakembûle, mpu lyo ayunjuza amalaganyo Namuzinda alaganyagya bashakuluza babo. ⁹ Nabo abapagani bakuza Namuzinda erhi bwonjo bwage burhuma, nka kulya Amandiko gadesire, mpu: Okwo kwo kwanarhume nakukuza omu mashanja, nnanyimbe irenge ly'izino lyawe. ¹⁰ Kuyandisirwe kandi, mpu: Mwe mashanja g'igulu, mucishinge haguma n'olubaga lwage. ¹¹ Kushubir'iyandikwa, mpu: Mwe mashanja mweshi mweshi, mukuze Nakasane, ninyu lubaga lwoshi lw'igulu, mukome kagasha. ¹² Naye Izaya adesire, mpu: Mwene-Yese ayisha, ayish'irhegeka amashanja goshi; ye wanaba bulangalire bw'abantu b'igulu lyoshi. ¹³ Namuzinda w'okulangalirwa ammuhe amasime n'omurhula omubuyemere bwinyu, lyo muyunjula bulangalire oku buzibu bwa Mûka Mutakatifu. ¹⁴ Nani niene mmumanyire kwinja, bene wirhu, oku mw'oyo muyunjwire nkengero nyinja, oku muyunjwire ngasi bumanye, n'oku muhashire muhashire okuhanulana mwêne na nnene. ¹⁵ Ci kurharhumiri ntammuyandikira, na haguma haguma ntamufyefyerheze, nti mmukengeze, nnashimbe izu ly'enshokano Nnâmahanga anshobozize ¹⁶ y'okuba muja-bugo wa Yezu Kristu omu bapagani na mudahwa w'Emyanzi y'Akalembe ka Nnâmahanga, nti lyo enterekero y'abapagani ehinduka ntagatifu muli Mûka Mutagatifu, enasimise Nnâmahanga. ¹⁷ Ntyola nani nanacikunga muli Yezu Kristu nkalola omukolo nkolera Namuzinda. ¹⁸ Bulya ntako nakahalizize okuderha ebi Yezu Kristu arhajirisagya mpu lyo abapagani bayumva omunderho n'omu bijiro, ¹⁹ oku buhashe bw'ebimanyiso n'ebisomerine, n'oku buhashe bwa Mûka Mutagatifu. Ntyola kwo nalumizize Emyanzi y'Akalembe ka Kristu kurhenga Eyeruzalemi kuhika e Iliriya. ²⁰ Ci kwône nalonza okumanyisa Emyanzi y'Akalembe aha izino lya Kristu lirhal'isag'imanyibwa, nti ntag'iyubakira oku ciriba cahumbagwa n'owundi, ²¹ nti lyo nnanshimba kulya kuyandisirwe, mpu: Balya barhasag'imubwirwa, bâmubone, na balya barhasag'iyumva bamuderha, bâmuyumve ²² Okwola kwo kwakazag'impanza kanji-kanji okuja emwinyu. ²³ Ci lero bunola nta mukolo ncigwerhe mwo bino bihugo, na kulya kuba kurhenga myaka minji erhi kucifinja incifinja okuja emwinyu, ²⁴ hano nja e Hispaniya... Lero nnangalire nti nammubona hano ngera, na nti mwe mwanayish'impisa omu njira y'okujayo hano mba namayus'immukumbuluka. ²⁵ Ci bunola nkola narhang'ija e Yeruzalemi, ngend'irhumikirayo abatakatifu. ²⁶ Bulya Macedoniya n'Akaya bahizire okushololera abatakatifu b'Eyeruzalemu bali omu bulagirire. ²⁷ Neci, bahizire okujira ntyo, ci erhi banakurhegesirwe; bulyala, akaba abapagani bashangire oku minja g'obunya-mûka, nabo bakwanine babarhabale n'aminja g'en'igulu. ²⁸ Hano mba namayusa ogwo mulimo, na hano mba namabafumbika eyo nshololo, lyo naja e Hispaniya, ngerere e mwinyu. ²⁹ Nnamanyire oku obu naja emwinyu, nayisha ndwirhe obwimâna bw'obwanga bwa Kristu. ³⁰ Mmhunyire, mâshi bene wirhu, Nnawirhu Yezu Kristu orhumire n'obuzigire bwa Mûka Mutakatifu, nti mundwire omu kusengerera emwa Nnâmahanga, ³¹ lyo nfuma ababula-buyemere b'e Yudeya, lyo n'entûlo na hêka e Yeruzalemu eyankirirwa kwinja n'abatakatifu. ³² Na ntyo nyishe emwinyu n'enshagali, na Namuzinda akalonza, nduhukire hitya ekagarhi kinyu. ³³ Namuzinda w'omurhula abe ninyu mweshi! Neci, ntyo!