¹ Mmuhunyire muyankirire kwinja mwali wirhu Febe, murhumisi-kazi w'Eklezia y'e Cenkri. ² Mumuyankirire muli Nakasane nk'oku binakwanine abatagatifu, munamurhabale oku ngasi kantu ankalagirirakwo, bulya naye arhabire bene wirhu banji, na ciru nani niene. ³ Mmundamukize Priska n'Akwila, bo rhukola rhweshi muli Kristu Yezu; ⁴ ciru balinzig'itubwa irhwe mpu lyo banciza; arhanali nienene nkwanine oku bavuga omukwa, ci n'Eklezia z'abarhengaga omu bapagani zoshi. ⁵ Mundamukize n'endêko y'abemezi babuganana aha mwabo. Mmundamukize mwira wani Epeneto, ye ntûlo ntanzi Azia yarhûlaga Kristu. ⁶ Mulamuse Mariya wammurhamîre kulya. ⁷ Mulamuse Androniko na Yuniya; bali ba bûko bwirhu, rhwânali omu mpamikwa rhweshi nabo; ziri ntumwa za kukengwa za nshokoleraga okuba baganda ba Kristu. ⁸ Mundamukize Ampliyota; aba muzigirwa wani bwenene muli Nakasane. ⁹ Mundamukize owirhu Urbone rhukola rhweshi muli Kristu, n'omwira wani Staki. ¹⁰ Mulamuse Apeli; ayerekine oku anaba okuli muganda wa Kristu. Mulamuse aba aha mw'Aristobulo boshi. ¹¹ Mundamukize Herodiyoni; aba wa bûko bwani. Mulamuse ngasi boshi b'aha mwa Narsisi bali ba Nakasane. ¹² Mulamuse Trifena na Trifoza bakarhamira Nakasane. Mulamuse Persida muzigirwa wani; arhamire bwenene omu kukolera Nakasane. ¹³ Mundamukize Rufo, ntôle ya Nakasane; mundamukize n'omuzire wage na nyama. ¹⁴ Mulamuse Asingrito, na Flegoti, na Hermesi, na patroba, na Herma, na bene wirhu baliboshi ¹⁵ Mulamuse Filologo na Yuliya, Nereyo na mwali wabo, na Olimpiya n'abatagatifu bôshi baba nabo. ¹⁶ Mulamusanye n'ehinunugurho hitagatifu. Eclezya za Kristu zoshi zimmulamusize. ¹⁷ Mmuhunyire, bene wirhu nti mucilange kwa balya bakâlonza okummushâbira n'okummusarhaza, n'obwo arhali ntyo kwo mwayigirizibwe; abo mubayake. ¹⁸ Bulya abantu ba bene wabo barhakolera Nnawirhu Kristu, ci enda zabo; kandi n'enderho zabo nnunu-nnunu n'ez'obulimirizi, banarhebe emirhima y'abarhabamwo bulyalya. ¹⁹ Neci, omwanzi gw'obumvi bwinyu gwalumire hoshi; munsimisize nani; ci kwonene nalonza mube benge omu minja na bahwinja omu mabi. ²⁰ Namuzinda w'omurhula arhayimang'ivungunyula Shetani aha magulu ginyu. Enshokano ya Nnawirhu Yezu Kristu ebe ninyu! ²¹ Owirhu Timoteyo rhukola rhweshi ammulamusize bo na Luciyo, na Yansoni, na Sosipatro, b'omu bûko bwani. ²² Nani mmulamusize muli Nakasane, nie Tersiyo nayandikaga agala maruba. ²³ Gayo ompandisa, nie n'Eklezya yoshi, mpu asingi. Erasto ye mubisi w'ebirugu by'ecishagala bona mwene wirhu Kwarto, mpu mmulamuse. ²⁴ Enshokano ya Nnawirhu Yezu Kristu ebe haguma nirhu! Neci, ntyo. , , ²⁵ Ayagirwe Olya ogwerhe obuhashe bw'okummuzibuhya omu Myanzi y'Akalembe nyigiriza n'omu bugo bwa Yezu Kristu, nk'oku bifulwirwe mwa lirya ihwe lyâli lifulike amagana g'emyaka, ²⁶ ci lero buno likola limanyikine, n'okubulonza bwa Nnâmahanga oyorha obaho emyaka n'emyaka, oku burhabale bw'amandiko g'abalebi, lyahisire omu mashanja goshi mpu balimanye, lyo bashimba enjira y'obuyemere. ²⁷ Kuli oyo Namuzinda, oba yêne mushinganyanya, irenge emyaka n'emyaka, Yezu Kristu orhumire! Neci ntyo.,,,