¹ Nta kuciyagiriza abali muli Yezu Kristu. ² Bulya irhegeko ly'omuka guhana obuzine muli Yezu Kristu lyakulikizize oku irhegeko ly'ecaha n'ery'olufu. ³ Bulya ebi amarhegeko garhahashaga erhi buzamba bwa mubiri burhuma, Namuzinda yêne abijizire erhi arhuma omugala omu mubiri gushushire ogwirhu gw'ebyaha, mpu lyo ahima ecaha, n'omu mubiri gwage, ayagiriza ecaha, ⁴ mpu ly'obushinganyanya bw'amarhegeko buba muli rhwe, rhwe olugendo lwirhu lurhashimba mubiri, ci muka. ⁵ Neci, abashimba engeso z'omubiri, bya mubiri bashwira, n'abashimba omuka, bya muka bashwira. ⁶ Bulya enyifinjo z'omubiri luli lufu ci enyifinjo z'omuka kali kalamo n'omurhula. ⁷ Co cirhuma enyifinjo z'omubiri zishomba Nnamahanga, bulya zirhashimba irhegeko lya Nnamahanga; ciru zirhankanahasha okulishimba. ⁸ Abashimba eby'omubiri barhankasima Namuzinda. ⁹ Mwehe murhali bashimbi ba mubiri, ci bashimbi ba muka, kulya kuba Omuka gwa Nyamuzinda guba muli mwe. Orhagwerhi Omuka gwa Kristu arhali wa Kristu. ¹⁰ Ci akaba Kristu ammuli mwo, ciru omubiri gukaba gukola gufire erhi caha cirhuma, Omuka gohe guzine obushinganyanya burhumire ¹¹ N'akaba Omuka gw'Olya wafusagya Yezu omubafu guba muli mwe, Olya wafusagya Yezu Kristu omu bafu anahe emibiri yinyu y'okufa akalamu oku buhashe bwa Muka ommubamwo. ^{12 12} Ntyola, bene wirhu, rhuli mumwenda, ci gurhali mwenda gwa mubiri mpu rhwalamira omubiri. Bulya mukalamira omubiri, mwafa; ci mukayirha ebijiro ¹³ by'omubiri n'obuhashe bwa Muka, mwalama. ¹⁴ Neci, kwo binali abahekwa na Muka gwa Namuzinda omulugendo lwabo baba bana ba Namuzinda. ¹⁵ Murhahabagwa murhima gwa baja mpu mwayoboha; mwahirwe omurhima gw'abana balere, gwo gunarhuma rhwayakuza, nti: "Abba, Larha" ¹⁶ Mûka Mutakatifu yenene anaje omu murhima gwirhu omuku hamiriza oku rhuli bana ba Nnamahanga. ¹⁷ Nantyo obwo rhuli bana bage, rhwe rhwayiime; rhuli miimo ya Nnamahanga, rhwayiime rhweshi na Kristu, bulya rhuli omu malibuko rhweshi naye lyo rhuyish'ikuzibwa haguma naye. ¹⁸ Neci, mbwine niehe oku amababale g'en'igulu garhankagererwa oku bukuze rhwayish'ihabwa. ¹⁹ Bulya ebiremwa byoshi bidwirhe byalinguza oku abana ba Nnamahanga baciyerekana. ²⁰ Ebiremwa byahizirwe omu buja, ci arhali okubulonza bwabyo , ci oku bulonza bw'owabihiragamwo; cikoki bicilangalire; ²¹ oku nabyo byayishi rhenzibwa omubuja bw'obubi, bishangire irenge ly'antagengwa ly'abana ba Nnamahanga. ²² Rhumanyire kwinja oku kuhika ene ebiremwa byoshi biri omu mulenge, binadwirhe byalumwa n'emikero y'okuburha. ²³ Arhanali byone; ciru nirhu, rhwe rhugwerhe ecikinja ca Muka, omurhima gwirhu omu mulenge guli, rhudwirhe rhwalinda okuhinduka bana balere n'obucunguzi ²⁴ bw'emibiri yirhu. Bulya obucunguzi bwirhu buciri bulangalire; n'okubona eci omuntu alangalire burhaciri bulangalire. Eci omuntu abwine, kurhi ankacicilangalira? ²⁵ Ci erhi rhwankalangalira ebi rhurhabona, rhwanabilinda buzira kurhama. ²⁶ Kwo na kwo Mûka Mutagatifu anarhabale obuzamba bwirhu; bulya rhurhish'ishenga okushinganine; ci Mûka Mutagatifu yêne orhusengerera omu njàmu zirhagwerhi oku zankaderhwa. ²⁷ Naye olya ovuhula emirhima ayishi ebi Muka alonza: amanyire oku Muka asengerera abimaana nk'oku Namuzinda asima ²⁸ Kandi mumanyire oku Namuzinda akolesa byoshi oku minja g'abamusima, balya yeene ahamagire oku bulonza bwage. ²⁹ Bulya balya yêne acishogaga kurhenga mira, abarheganyize mpu babe nshusho y'omugala lyo aba nfula omu balumuna banji; ³⁰ n'abarheganyize, abahamagire; n'abahamagiere, abajizire beru-kweru; n'abajizire beru-kweru, abahire obukuze. ³¹ Cici rhwankaciyushula kw'ebyo? Akaba Namuzinda ali olunda lwirhu, indi wankacirhuhima? ³² Arhababaliraga omugala, ci amuhaana nterekero kuli rhwe rhweshi; bici ankacibula bwarhuha haguma naye? ³³ Ndi wankaciderha mpu ahêka abishogwa ba Namuzinda lubanja? Namuzinda yêne ye wabayêza! ³⁴ Ndigi wankacibayagiriza? Ka Yezu Kristu wafaga anafuka? Ka Yezu Kristu otamire ekulyo kwa Namuzinda, odwirhe arhulagira? ³⁵ Ndigi wankacirhukuula omu buzigire bwa Kristu? ka kubula ecirhwayambala, erhi kaga, nisi erhi ngorho? ³⁶ Bulya kuyandisirwe, mpu: We rhuma rhwayirhwa bwaca bwayira; kwo bakola barhulola nka bibuzi byaj'ibagwa. ³⁷ Ci kwonene mw'ebyo byoshi rhuna hime erhi Olya orhuzigira orhuma. ³⁸ Neci mmanyire kwinja oku olufu erhi buzine, ciru bamalahika erhi amami, ciru gano mango erhi amango gayisha, ciru amahashe, ³⁹ oli emalunga, oli omu idaho, nta ciremwa ciru n'eciguma cankahasha okurhunanuula oku buzigire bwa Namuzinda buli muli Nnahamwirhu Yezu Kristu.