¹ K'erhi muhabire, bene wirhu - bantu balenga omumarhegeko nabwira - oku irhegeko lishweka omuntu amango acizine? ² Ntyo omukazi ashwesirwe n'irhegeko kuli iba amango iba acizine; ci erhi ankafa, Namukazi anashwekûlwa n'irhegeko ly'iba. ³ Kuziga amango iba acizine, erhi ankayankwa n'owundi mulume anaderhwa mugonyi; ci erhi iba ankafa, arhacishwesirwi n'irhegeko, nantyo arhaciri mugonyi erhi ankayankwa n'owundi mulume ⁴ Ninyu kwo na kwo, bene wirhu: mwafire, mwarhenzibwa omulukoba lw'amarhegeko erhi mubiri gwa Kristu gurhuma mpu mube ba wundi, olya wafukaga omu bafire, mpu lyo rhukafulukiza Nnamahanga. ⁵ Erhi rhuciri omu mubiri, amiru g'ebyaha, galerhwa n'amarhegeko gakag'ijira omukolo gwagwo omubirumbu birhu, mpu lyo rhukafulukiza olufu. ⁶ Ci buno rhwafîre okubyakag'irhushweka nka mpira, rhwarhenzibwe omu lukoba lw'amarhegeko, rhukola rhwakolera oku ngoma mpyahya y'omurhima, ci arhaciri oku ngoma y'ecikulakula ya "shimba-oku-badesire" ⁷ Kuli kuderha kurhi? Ka mpu irhegeko liri caha? Ntanzi! Ci kwonene ntamanyaga ecaha elirhali irhegeko lirhumire. Bulya ntankamanyire amagene irhegeko lirhaci- derhaga, mpu: orhakazig'iba magene. ⁸ Erhi ecaha cibona ntyo, canshulira amiru ga ngasi lubero erhi irhegeko lirhuma. Bulya buzira irhegeko, ecaha guli mufu. ⁹ Neci, mira nalamaga buzira marhegeko; ci erhi amarhegeko gayisha, ecaha naco cafululuka, ¹⁰ nani nabaga nie nfa. Ntyo amarhegeko gal'ikwanine okumpa obuzine, gaba lufu lwo ganderhera. ¹¹ Bulya erhi ecaha cibona amarhegeko, cantiza, cananninga erhi gwo garhuma. ¹² Kuziga amarhegeko gali mimana, n'ebirhegesirwe biri bimana bishinganine binali binja. ¹³ K'akantu kinja kabirage lufu kuli nie? Nta mango! Caha eco canduirhire olufu omukukolesa akantu kinja, mpu lyo ciyerekana oku ciri caha, nantyo mpu lyo ciba cibi kulusha erhi marhegeko garhuma. ¹⁴ Rhukumanyire, neci: irhegeko kali kantu ka bunya-muka; ci niehe ndi kantu kabunya- mubiri, mugulwa, muja w'ecaha ¹⁵ Nanga, okuli, ebinjira ntabiyumva; bulya arhali ebinonza okujira byo njira, ci ebinshomba byo njira. ¹⁶ Akaba ebintalonza okujira byonjira, kuziga inyemire oku irhegeko liri linja. ¹⁷ Ahoo! kuziga arhaciri nie nkujira, ci ecaha cimbamwo. ¹⁸ Nkumanyire, neci! obwinja burhambamwo, kwo kuderha omu mubiri gwani. Okulonza aminja, neci, nanakuhasha; ci okugajira kwo hahe. ¹⁹ Bulya ntajira aminja nnonzize, ci obubi ntalonzizi bwo njira. ²⁰ Akaba ebintalonzizi okujira byonjira, kuziga arhaciri nie mbijira ci ecaha cindimwo. ²¹ Alagi irhegeko namarhindakwo: nié ono nkalonz'ijira aminja, obubi nanabona bwo buyishire. ²² Neci, nnanyumve nsimire amarhegeko ga Nnamahanga omu murhima gwani; ²³ ci omu birumbu byani nyumve erindi irhegeko liherhe lyalwisa irhegeko ly'obukengere bwani n'okunjira mpira y'irhegeko ly'ecaha cindi omu birumbu. ²⁴ Lero nieki ihanja lici limbakwo! Ndi wandikuza kw'ogu mubiri gw'olufu? ²⁵ Akonkwa Nnamahanga muli Nnawirhu Yezu Kristu! Ntyo, nie ono omu bukengere ndwirhe nakolera irhegeko lya Namuzinda, n'ery'ecaha omu mubiri.