¹ Kurhi rhwaderhaga? ka rhubere omu caha mpu lyo engalo eluga? ² Ntanzi! Rhwe rhwafire oku caha, kurhi rhwankashub'icibeeramwo? ³ Nkaba muhabire oku rhweshi, ababatizibwe muli Kristu, omu lufu lwage rhwa batizibwe? ⁴ Erhi rhubatizibwa, rhwabishwa haguma naye omu lufu, nti nk'oku Kristu afuulagwa muli banyakwigendera n'irenge ly'Ishe, lyo nirhu rhuba n'obuzine buhyahya akage. ⁵ Bulya, akaba rhukola rhugwerhe kalamo kaguma naye omu lufu lushushine, rhwayish'iba na kalamo kaguma omu bufuke bushushine ⁶ Rhumanyire kwo:omuntu wirhu wa mira abambirwe oku musalaba haguma naye, mpu ly'omubiri gw'ebyaha gushabuuka, na ntyo rhurhenge omu buja bw'ebyaha; ⁷ bulya owafiire erhi afumire ecaha. ⁸ Ci akaba rhwafire haguma na Kristu, rhuyemire kwo na kwo oku rhwalama haguma na Kristu. ⁹ Rhumanyire oku Kristu afuusire omu balinda mboho, arhakacifa bundi; nta buhashe olufu lucigwerhe kuli ye. ¹⁰ Erhi afa, ahima ecaha lwoshi-lwoshi; n'obuzine bwage bukola buzine bwa kulamira Nnamahanga. ¹¹ Ninyu kwo kuguma: muyorhe nk'abafire oku caha, munalamire Nyamuzinda muli Yezu Kristu. ¹² Lero ecaha cirhacibonaga aha cankagandaza omu mubiri gwinyu gwayish'ifa, cilek'immuyemeza amagene gaco. ¹³ Murhajiraga ebirumbu binyu byoji by'obulyalya omu okubikolesa oku kujira ebyaha; ci mucihane mwene emwa Namuzinda nka bantu bazine bafulumusire olufu, n'ebirumbu binyu mubikolese nka byoji bya bushinganyanya omukurhumikira Nnamahanga. ¹⁴ Bulya nta buhashe ecaha cicigwerhe kuli mwe, kulya kuba murhashwesirwi na marhegeko, ci n'engalo ya Nnamahanga. ¹⁵ Ewe; ka rhukag'ijira ebyaha bulya rhurhashwesirwi na marhegeko, ci n'engalo ya Nnamahanga? Nta mango. ¹⁶ Ka murhishi oku erhi mwankacihana buja emwa lebe, mpu mumurhumikire, mwanaba baja b'olya murhumikira; akaba caha, cimulerhere olufu n'akaba bumvi, bumulerhere obushinganyanya. ¹⁷ Ci Namuzinda akonkwa! Erhi muba mwamarhenga omu buja bw'ecaha, mwashimbire n'omurhima gwinyu gw'oshi enjira y'enyigirizo mwayigirizibwe; ¹⁸ n'erhi muba mwamalikuzibwa oku caha, mwahinduka barhumisi b'obushinganyanya. ¹⁹ Ndesire nka kulya abantu baderha erhi buzamba bwinyu burhuma. Kulya mwakolesagya ebirumbu binyu omubuja bw'eby'eshonyi n'obugoma, mwaba bagomi, ntyo kwo mubikolesagye kurhenga ene omu burhumisi bw'obushinganyanya, lyo muba bimaana. ²⁰ Amango mwaciri baja b'ecaha nt'irhegeko lyaali limushwesire. ²¹ Bunguke buci mwabwinage obwo? Buno enshonyi zimmubambisire, bulya obuzinda bw'ebyo byoshi luba lufu. ²² Ci buno mwalikuzibwe oku caha, mukola bambali ba Nnamahanga, obutakatifu lwo luhembo lwinyu, n'obuzinda bwinyu buli buzine bw'ensiku n'amango. ²³ Bulya oluhembo lw'ecaha luba lufu, ci engalo ya Namuzinda buba buzine bw'ensiku n'amango muli Nnahamwirhu Yezu Kristu.