¹ Ntyo kwo rhwajijirwe mwo b'okuli emalanga ga Namuzinda erhi bwemere burhuma, nabuno ntabyo rhucifânwa rhwêshi naye erhi Nnahamwirhu Yezu Kristu orhuma. ² Yezu ye warhumire rhwahasha, omunjira y'obwemere, okushegera hâli Namuzinda arhugashanire, rhunakolaga rhuhadekerire. N'ebirhuhîre obusîme, buli bulangalire bw'okuba n'omwanya oku bulangashane bwa Namuzinda. ³ Na kulusha, rhunashagalukire ciru n'omu malibu gîrhu, bulya rhumanyire oku amalibu ga lerha obushiru, ⁴ n'obushiru bulêrha okuzibuha omu marhangulo, n'okuzibuha omu marhangulo kulerha obulangalire. ⁵ Obwo bulangalire burharhuma rhwa ziguluka bulya Namuzinda abulagire obuzigire bwâge omu mirhima yîrhu.Ajira ntyo omu kukolesa Mûka wage arhuhaga. ⁶ Bulya amango rhurhaligweerh'emisi, Omuciza erhi akashanzi kahika, afira ababi. ⁷ Biri bizibu omuntu okufîra omuntu w'okuli, lubilubi, omuntu anafîra olya okola aminja. ⁸ Cikwône Namuzinda arhuyeresire obuzigire bwâge okubona Omuciza arhufirire amango rhuciri omubyaha. ⁹ Co cirhumire bwenene erhi rhwanka yemererwa okuba b'okuli oku muko gwâge, kugerere ye rhwa fulumuka oburhe bwâge. ¹⁰ Bulya, akaba rhwazigirwe na Namuzinda erhi lufu lw'Omugala lurhuma, nobwo rhwaciri bashombanyi, lero nabuno rhukola rhu yinjibine naye, rhwacizibwa n'obuzine bwâge. ¹¹ Arhanalikwône okwo; ci rhudwirhe rhwacisima muli Namuzinda erhi Nnawirhu Yezu orhuma, ye warhushobozagya okuyinjibana na Namuzinda. ¹² Ntyo kwo biri! Ecaha cadwirhwe en'igulu na muntu muguma, naco ecaha caburha olufu, n'olufu lwa yahukira abantu boshi, bulya bôshi bakozire ecaha. ¹³ Ecaha cali en'igulu embere amarhegeko gahanwe, ci ecaha cirhahanirwa ndi nka nt'irhegeko lihali; ¹⁴ cikurharhumaga olufu lurhakula emyone kurhenga Adamu kuhika Musa, lwaheka ciru n'abarhajiraga caha omukuvuna amarhegeko ak'Adamu, ye nshusho y'owanayishe. ¹⁵ Cikwône engalo erhali nk'ecaha. Bulya akaba ecaha ca muguma calumizize olufu omu lubaga, kangakulusha engalo ya Namuzinda n'eshokano y'amakwanane ga muntu muguma, Yezu Kristu, bya lumire omu bantu banji! ¹⁶ N'eyo nshokano erhali nka bwahukire bw'ecaha ca muguma; bulya olubanja lw'eco caha ca muguma buhane lwadwirhe; ci enshokano y'olukogo Namuzinda arhufaga oku byaha birhu binji yarhujira beru-kweru. ¹⁷ Bulya, akaba ecaha ca muntu muguma carhumire olufu lwagandaza, erhi ye rhumire, kanga kulusha balya bayunjwire engalo n'enshokano y'obushinganyanya bohe bayish'ilushisa, bagandaze omu buzine Yezu Kristu yenene arhumire! ¹⁸ Ntyo, nk'oku bahaniragwa obubi bwamuntu muguma, kw'abantu bôshi bahindusire beru-kweru, banashobola obuzine cijiro ca bushinganyanya bwa muguma cirhumire. ¹⁹ Bulya, nk'oku olubaga lwoshi lwayahukiragwa n'ecaha erhi bucibone bwa muntu muguma burhuma, kwo lwanayish'iyera bumvi bwa muguma burhumire. ²⁰ Neci, kwo binali, irhegeko lyayishire mpu lyo obubi buluga; Cikwône aha ecaha cali cishurhamire, engalo ya Namuzinda yahalambiza; ²¹ mpu lyo, nk'oku ecaha cali ci gandazize omulufu, omulufu, engalo ya Namuzinda egandaza n'obushinganyanya omu buzine bw'ensiku n'amango, Nnawirhu Yezu Kristu orhumire.