¹ Bici rhwaderha oku gw'Abrahamu, shakuluza wîrhu? Bici ahirwe? ² Abrahamu aciyemêreragwa oku ali w'okuli kugerera emikolezi yâge ali akacikungira yo. Cikwône arhanka cikunga emalanga ga Namuzinda. ³ Bulya Amandiko gadesire mpu: " Abrahamu ayemêrera Namuzinda na Namuzinda amubona oku ali w'okuli erhi bwemêre bwâge burhuma." ⁴ Okola kukamarha akamarha. Okwo kukamarha kurhankaderhwa mpu kwa kwône: okukwanine. ⁵ Cikwône amango omuntu arhajijiri mukolo alangâlira Namuzinda kwône, Namuzinda otwa olubanja oku oyo munyabyâha akola mwêru kwêru, Namuzinda anayemere okubona oku oyo muntu akola w'okuli erhi bwemêre bwage burhuma. ⁶ Ntyo kwo Daudi adesire mwo ogw'obusime bw'omuntu ye Namuzinda ayemîre ku ali w'okuli buzira kukola emikolo. Daudi adesire erhi: ⁷ " Bali ba busime abo Namuzinda ababalîre amabi Bo n'ebyaha byâbo byazâzîbwe! ⁸ Ali wa busime oyu ebyaha byâge Nnahamwirhu arha ci bihulîriza!" ⁹ K'obwo busime buli bwa bantu bakârhe bone? Kaburhali bw'abarhakrhagwa bôhe? Rhudesire bulya oku " Namuzinda ayemire oku Abrahamu ali w'okuli erhi bwemere bwage burhuma" ¹⁰ Mangaci ebyo bya baga? K'amango Abrahamu âli amakârhwa, erhi amango arhali cikârhwa? Arhali amango âli amakârhwa, cikwône erhi arhacikârhwa. ¹¹ Erhi kugera nsiku, Abrahamu akârhwa mpu lyo eco ciba cimanyiso: câli cimanyiso ca kuyerekana oku Namuzinda ayemîre oku akola w'okuli erhi bwemere bwâge burhuma, amango arhâl'icikârwa. Ntyo kwo Abrahamu abîre mwo ishe wa ngasi bôshi abayemire Namuzinda buzira kukârhwa na Namuzinda ayemire oku bakola b'okuli. ¹² Anali ishe w'abakârhe, kwo kuderha oku ali ishe wa balya barhanegenera okukârhwa, cikwône bashimbulira olwiganyo lw'obwemere lârha wîrhu Abrahamu agwerhe amango arhâl'icikârhwa. ¹³ Namuzinda alaganyize Abrahamu n'obûko bwâge oku abaha igulu libe birugu byâbo. Eco ciragâne cirhajiragwa mpu kwenge Abrahamu ayumvirhe oku amarhegeko gadesire, cikwône bulya Namuzinda ayemire oku Abrahamu ali w'okuli kugerera obwemere bwâge. ¹⁴ Acibaga abayumva oku amarhegeko gadesire bone bo ben'ebyo birugu, obwemere bwankabire bwa kafa busha, n'eciragâne ca Namuzinda nta bunguke cankacigwasire. ¹⁵ Bulya amarhegeko ganalerhe obuhane burhenzi omu bukunizi bwa Namuzinda, cikwône aharhaba marhegeko harhanaba kuvuna amarhegeko. ¹⁶ Co carhumire eciragâne cajirwa erhi bwemere burhuma, lyo ciba nshobolo Namuzinda ashobozize busha, lyo cigendereza okukola oku bantu b'omu bûko bw'Abrahamu bôshi, bashobole kwône, arhali abo bayumvirhe oku amarhegeko gadesire bône, cikwône n'abayemire nk'oku Abrahamu naye anali yemire. Abrahamu âli larha wirhu rhweshi, ¹⁷ nk'oku amandiko gadesire mpu: "Nakujijire ishe wa mbaga nyinji. " Aali larha wirhu emalanga ga Namuzinda olya ayemeraga, ye Namuzinda ofûla n'okujira ebirhahabâga mpu bihabe. ¹⁸ Abrahamu ayemire ana langâlira, n'obwo arhâli agwerhe obulangalire, nantyo kwabîre mwo ishe wa mbaga nyinji, nk'oku Namuzinda anamubwîraga erhi: "Ntyo kwo omuganjo gw'obûko bwâwe gwaba. " ¹⁹ Aaliagwerhe hôfi myaka igana, cikwône obwemere bwâge burhanyihaga erhi agerereza omubiri gwâge gukola nka gufîre n'erhi agerêreza Sara arhankacibusire. ²⁰ Arhahezagya obwemere bwâge arha na baga n'akarhinda okuciragane ca Namuzinda. Ci oku byabire, obwemere bwage bwa muzibuhya abul'icitakiira Namuzinda. ²¹ Aali amanyire bwinja oku Namuzinda agwerhe obuhashe bw'okujira ebi alaganyize. ²² Yumvagya ebyarhumaga Namuzinda ayemera oku Abrahamu ali w'okuli, Namuzinda amuyemera erhi bwemere bwâge burhuma. ²³ Cikwône ebyo binwa bidesire oku " ayemerirwe oku ali w'okuli " arhali yêne bya yandisirwe. ²⁴ Nirhu rhwe rhwabiyandikîrwe rhwe rhugwâsirwe rhubonwe oku rhuli b'okuli rhwe rhuyemire owafulaga yezu Nnahamwirhu. ²⁵ Nnahamwirhu Yezu ahanagwa mpu afe erhi byaha byâbo birhuma, anafûlwa mpu lyo arhujira b'okuli emalanga ga Namuzinda.