¹ Ewe, ka haligi obunguke bw'okuba Muyahudi obwo? Bunguke buci okukârhwa kugwêrhe? ² Obunguke buli bunji omu njira zôshi. Bayahudi Namuzinda ahâga ebinwa byâge burhangiriza. ³ Kurhi rhwa derhaga obwo, erhi ankaba baguma mulibo babishire ndyâlya, k'obulyâlya bwâbo bwarhumaga Namuzinda naye ahinduka omu binwa byâge? ⁴ Bunywesi la! Namuzinda agwasirwe ajire ebinali by'okuli, ciru ankaba ngasi muntu aba munywêsi, nk'oku amandiko gadesire mpu: "Ly'oyemêrerwa oku oba mushinganyanya muli ebi oderha. Onayâze nk'ohesirwe lubanja. ⁵ Cikwône erhi ankaba amabi gîrhu go gayerekana oku Namuzinda aba wôkuli, rhuderhage gurhi? Ka Namuzinda arhaba wôkuli okwenge anaka rhuhana? (Ndesire omuntanya z'abantu). ⁶ Bunywesi la bulya acibâge Namuzinda arhaba w'okuli, gurhi ankayâza mwo abantu? ⁷ Cikwône erhi ankaba obunywesi bwâni bwo buyêrekana okuli kwa Namuzinda bwinja kulusha, na ntyo kwo buyêrekana mwo obukuze bwâge, bici byankacirhuma na twîrhwa olubanja nka munyabyâha? ⁸ Ahoo, bicigi byankarhuma rhuderha mpu rhujire amabi lyo aminja gayîsha? Bulya bantu baguma nka bakola banywerhera, banansingizine, baderhe mpu kwo nadesire ntyo. Abo bantu bahanwa, bana kushinganine bwinja bwinja. ⁹ Cikwône kurhigi? ka rhwe Bayahudi, rhwe rhuligi bakulu kulusha abandi bantu? Bunywesila! Mîra nayêrekanaga oku Abayahudi n'abandi bantu, bôshi bo baguma omu kurhambulwa n'ebyâha. ¹⁰ Amandiko gadesire mpu: " Ntaye wôkuli, harhaba ciru n'omuguma, ¹⁰ Amandiko gadesire mpu:"ntaye wokuli,harhaba ciru n'omuguma" ¹¹ Nta muntu oyumva bwinja, Ntâye olônza Namuzinda, ¹² Bôshi bahabukire kuli na Namuzinda, barherera haguma. Nta muntu ojira aminja, harhaba ciru n'omuguma. ¹³ Emimiro yâbo kwo enali nka cûsho (nshinda) cifunule, Endimi zâbo zibakolera omu kurhebana, Ebinwa baderha kwo binali nka manjokanjoka, ¹⁴ Orhunwa rhwâbo rhuyunjwiire buheherere bwa mujina. ¹⁵ Bali bulibirha okuj'iyîrha, ¹⁶ Aha bagera hôshi bana hasige bigûka nobuhanya, ¹⁷ Enjira y'Omurhula barhayimenyaga. ¹⁸ Omu bulamu bwâbo barha yôboha Namuzinda ciru n'ehitya. " ¹⁹ Rhuyishi oku ebi amarhegeko gaderha byôshi,erhi balya barhegesire bo gana bwîzire, lyo harhac'iba ebi abantu bankaderha, lyo na Namuzinda ayaza abantu bôshi. ²⁰ Bulya emalanga ga Namuzinda nta muntu wanyemêrerwe oku ali w'okuli mpu ye wajijire ebi amarhegeko gadesire, amarhegeko gaba ga kurhuma omuntu amanya kwône 0ku anajijire ebyaha. ²¹ Cikwône, Namuzinda arhuyeresirage okuli kwage buzira marhegeko, nka kw'obudimwe bw'abalêbi n'amarhegeko budesire, ²² Namuzinda anajire abantu okuba b'okuli kugerera obwemere bwabo muli Yezu Kristu. Ngasi abayemire Kristu bôshi anabajire b'okuli, bulya bôshi bo na baguma: ²³ bôshi bajijire ebyaha banyihirwa n'obulangashane bwa Namuzinda. ²⁴ Cikwône Namuzinda , omubwinja bwâge abajira b'okuli buzira kugula omukukolêsa Yezu Kristu obayôkola. ²⁵ Namuzinda amuhanyire nterekêro ya cintu cidwa omuko lyo, omukufa kwage, ahisa amababale okubantu bamuyemire. Ntya kwo Namuzinda alonzagya ayêrekane mwo gurhi aba w'Okuli: Kurhenga mîra , akâlindalinda, aleka n'okuhana abantu okubyaha byabo. ²⁶ Cikwône muli gano mango, ayêrekine kurhi ajira mwo abantu okuba b'okuli, bulya alonzize abe w'okuli ho n'aho ajire n'abayemîre Yezu bôshi babe b'okuli. ²⁷ Ka haciri ecankarhuma abantu bacîbona? Nanga ntâco côshi! Bici birhumire? Kabulya bayumvîrhe ebi amarhegeko gadesire? Nanga, cikwône bulya bayemîre. ²⁸ Bulya rhuyiishi oku omuntu ajirwa w'okuli embere za Namuzinda erhi bwemêre bwage burhuma, c'arhali mpu kwenge ayumvirhe oku amarhegeko ga desire. ²⁹ Gwarhi, ka Namuzinda aba wa Bayahudi bône? K'arhali ye Namuzinda w'ezindi mbaga zôki? Neci la, ye Namuzinda w'ezindi mbaga nazo, ³⁰ bulya haba Namuzinda muguma yêne. Abayahudi abajira b'okuli erhi bwemere bwâbo burhuma, n'abarhali Bayahudi nabo abajira b'okuli erhi bwemere bwâbo burhuma. ³¹ Ewe, k'okwo kwo kuderha oku omukukolêsa obwemere, amarhegeko rhugabulire obukenge? Nanga arhali ntyo, amarhegeko go rhuhire obukenge bwâgo bw'okunali erhi kwo.