¹ Okuwankaba kwoshi we twira abaandi emManja orhakabona ebi waderha. Bulya amango otwîra abandi emmanja obuli kajira akâbo erhi okola ociyâzize wenene. ² Rhumanyire oku nka Namuzinda atwira abantu bajira ebiri nk'ebió olubanja, analutwé omukushimbulira okuli. ³ K'omanyire mpu wa fuma olubanja lwa Namuzinda, we muntu otwa olw'abajira ebyo akâbo? ⁴ Nîsi erhi kube kugayaguza ogayaguza obwinja bunene bwa Namuzinda, n'okurhulindirîra kwage? K'orhamanyiri oku obwinja bwa Namuzinda bugwâsirwe okukuhisa kw'obugokôle? ⁵ Cikwône oli cigamba, orhayêrekîri ebwa kugokôla. Cocirhumire oli wa cîrheganyiza obuhane burhenzire omu bukunizi bwa Namuzinda bunene kulusha, ulusiku Namuzinda ayêrekana obukunizi bwâge n'obushinganyanya bwâge bw'okutwa olubanja, ⁶ gonamango ana hembe ngasi muntu nk'oku ebi anajirabinali. ⁷ Ahâna obuzine bw'ensiku n'amango kuli balya bacihangana kujira aminja nantyo kwo kulongêreza obukuze, n'irenge, n'obuzine bw'ensiku n'amango. ⁸ Cikwône anayerekane obuhane burhenzire omubukunizi bwâge n'okugaya kwâge kuli bala bamugomera, bala barhayumva okuli n'okujira okukudesire, babul'icilekêlera okuhêkwa n'amabi. ⁹ Amalibuko n'okulibwa n'amagala byalibuza ngasi bajira amabi, byarhanga oku Bayahudi, cikwône n'abarhali Bayahudi. ¹⁰ Cikwône ngasi abajira aminja, Namuzinda abaha obukuze, obukenge, n'omurhula. Arhangirira oku Bayahudi, cikwône aha n'abarhali Bayahudi. ¹¹ Bulya Namuzinda arhajira kabôlo. ¹² Ngasi abajira ebyâha bôshi barhanamanyiri amarhegeko ga Musa, bahererekera buzira ago marhegeko, cikwône ngasi abajira ebyâha bôshi erhi banagamanyire banatwirwe olubanja kugerera ago marhegeko. ¹³ Abantu basimîsa Namuzinda barhali balya bakayumva amarhegeko, cikwône bali balya bakayumva oku gadesire. ¹⁴ Erhi ab'emahaga, balya barhamenyire amarhegekogalya g'Abayahudi, gala mango bône bacirhuma okuyumva oku amarhegeko gadesire, bône bakola bali marhegeko, ciru akaba barhagwêrhi galya marhegeko ga Musa. ¹⁵ Ntyo kwo bayerekine kw'ebijiro by'amarhegeko bili biyandike omu mirhima yâbo. Etimanya zâbo nazo ziyerekine okwo n'engerêrezo zabo byo bibasidaka kanji kanji n'oku bafungira. ¹⁶ Byo byanabonekâne ebyo okulusiku Namuzinda akolêsa Yezu Kristu okutwa olubanja lwa ngasi bifulike omumirhima y'abantu. Emyanzi y'omurhula ndi na yigiriza yo edesire ntyo. ¹⁷ Cikwône w'oyo, ogwêrhe izino ly'Omuyahudi, ocîkubagîre amarhegeko onali wa negenera Namuzinda wawe. ¹⁸ Omanyire ebi Namuzinda alonzize, n'amarhegeko ga kuyigirizize okucîshoga ebiri binja. ¹⁹ Omanyire oku we cirongôzi c'emihurha, na kamole k'abali omu mwizimya, ²⁰ mwigiriza w'abarhayîshi bici na mwalimu w'abâna, bulya omanyire bwinja bwinja oku omu marhegeko ogwêrhe mwo iyerêkano limâna ly'okumanya na ly'okunali. ²¹ Ahoo! we yigiriaza abandi, bicigi birhuma orhaciyigiriza wêne? We yigiriza mpu okuzimba kurhagwâsirwi, bicigi birhuma ocizimba? ²² Wederha mpu okugona kurhagwâsirwi, bicigi birhuma ocigona? Weshomba okugashâniza ensanamu, bicigi birhuma ohagula omunyumpa yazo? ²³ We negenera kulya kuba n'amarhegeko, cikwoone orhakenga Namuzinda mukujira ebi amarhegeko gâge galahiire. ²⁴ Bulya amandiko gadesire okunali mpu " Mwe Bayahudi, mwe murhuma ezindi mbaga zajacira Namuzinda. ²⁵ Erhi wankayumva oku amarhegeko gadesire, okukaarhwa kwawe kwana kugendukira. Cikwoone erhi ankaba orhayumviirhi oku amarhegeko gadesire, erhi kw'onali nk'orhakaarhagwa. ²⁶ N'erhi orhakaarhagwa ankayumvwa abulijira nk'oku amarhegeko gadesire, ka Namuzinda arhanka mubona nk'akâsirwe? ²⁷ Orhakârhagwa oku mubiri gwâge, cikwône kuyumva ayumva oku amarhegeko gadesire, akutwîra olubanja we rhayumva oku gadesire ciru ankaba ogwêrhe amarhegeko mayandike onali mukârhe. ²⁸ Bulya Omuyahudi menemene arhali olya oli ye omukubonekana oku masu n'okuba ali mukârhe kwamwene kulya kwa nka boneka n'amasu. ²⁹ Cikwône Omuyahudi menemene anali olya oli ye omu ndalâla, olya olimukârhire omu murhima gwâge, n'obwo bukârhe akâsirwe bube bulya bugwarhîre kuli Mûka gwa Namuzinda, c'arhali ku gwarhira oku marhegeko mayandike. Oyo Muyahudi menemene arhakuzibwa n'abantu cikwône akuzibwa na Namuzinda.