¹ Obu mwafûsire haguma na Kristo, mukag'ishwira eby'enyanya, yo Kristo abutamire ekulyo kwa Nyamuzinda, ² Mukanunirwa n'eby'enyanya, muleke okukalalikira eby'igulu. ³ Bulya mwâfire, n'obuzine bwinyu bukola buba bubishe haguma na Kristo muli Nyamuzinda. ⁴ Amango Kristu, ye buzine bwinyu, aciyerekana, ninyu mwayish'ilabuko mwe naye omu bukuze. ⁵ Kuziga mubabaze ebirumbu by'omubiri gwinyu gw'en'igulu: obugonyi, eby'enshonyi, amasima mabi, enyifinjo mbi, n'amagene g'eby'en'igulu, kwo kuli nka kufukamira ebiremwa; ⁶ ebyola byo birhuma Nyamuzinda akunira. ⁷ Ninyu mwêne ntyo kwo mwâli muyosire mira, amango mwacikag'ikashimba ezo ngeso mbi. ⁸ Ci kwonene lero bunola ebyo byoshi mubijugucirage ninyu: obukunizi, ennongwe, obulyalya, ebijaci n'enshambalo mbi, birhahira bikaciyumvikana omu kanwa kinyu. ⁹ Murhacig'irhebana mwêne na nnene, bulya mwahogwire omuntu wa mira haguma n'ngeso zage, ¹⁰ mwacihundikira omuhyahya, olya ocisêza okuhinduka nshusho y'Omulemi wage, mpu lyo ahika oku bumanye bw'okunali. ¹¹ Aha harhaciri Mugereki erhi Muyahudi; harhaciri mukembûle erhi ntakembûlwa; harhaciri bantamanywa n'Abashita; harhaciribaja erhi bantagengwa: akola Kristo yêne, ye byoshi muli boshi. ¹² Nka kulya bina kwanine abishogwa ba Nnâmahanga, n'abatagatifu n'abarhonyi bage, mucihundikire omurhima gw'olukogo, n'obwonjo, n'obwirhohye, n'obutûdu, n'okulembera amalibuko. ¹³ Mukalemberana munababalirane akaba hali owagayisize owabo. Nyakasane ammubabalire: mumuyankirekwo olwiganyo. ¹⁴ Ci kulusha okwo kwoshi, muzigirane, bulya obuzigire lyo ishwinjiro ly'obwimâna. ¹⁵ Ntyo omurhûla gwa Kristu gugandaze omu mirhima yinyu: bulya ogwola murhûla gwo mwahamagaliragwa mpu mube mubiri muguma. Murhahusagya okukavuga omunkwa! ¹⁶ Oluderho lwa Kristu lusêre bwenene omu mirhima yinyu. Mukaz'ilubwirizanya, munakaz'ihanulana n'obushinganyanya. N'omurhima gwinyu gwoshi mukayimbira Nnâmahanga ennanga, ebitakîro n'enyimbo z'obunya-mûka, munakamuvuga omunkwa. ¹⁷ Na ngasi cinwa mwankaderha erhi ecijiro mwankajira, byoshi mujijire oku izino lya Nyakasane Yezu, bibe munkwa emwa Larha Nyamuzinda, oku bulagizi bwage. ¹⁸ Bakazi, mukayumva babalo, nka kulya bikwanine muli Nyakasane. ¹⁹ Balume, muzigire bakinywi, murhanabayorheraga kubi. ²⁰ Bana, mukayumva ababusi binyu muli byoshi, bulya okwola kwo kusimisa Nyakasane. ²¹ Babusi, murhakag'isholoshonza abana binyu, mwakarhuma barha omurhima. ²² Mwebashizi, mukaz'iyumva bannawinyu b'en'igulu muli byoshi, arhali bulya mudwirhe mwabonwa, nka kulya abalonza okusimisa abantu bayorha, ci n'omurhima nkana, bulya murhinyire Nyakasane. ²³ Ngasi mukolo mwankajira, mugukole n'omurhima gwinyu gwoshi; Nyakasane abe ye mukolera, ci arhali bantu. ²⁴ Mumanye oku Nyakasane ayish'immuhemba, ammujire mîmo yage. Kaz'imurhumikire Nyakasane Kristu! ²⁵ Bulya okola obubi ayish'ihâbwa oluhembo lw'obubi bwage; na nta kulola oyu ye ndi. k