¹ Nnonzize mumanye ntambala ndarhi nci ndwirhe nalwa erhi mwe murhuma, n'ab'e Laodiceya, na ngasi bandi barhasag'ibona obusu bwani. ² Nnonzize emirhima yabo erhûlûle, balungane bwenene omu buzigire, banayunjule obuhirhi bw'obumanye, na ntyo bamanye ihwe lya Namuzinda, ye Kristo, ³ ye bamwo obuhirhi bwoshi bw'obushinganyanya n'obumanye. ⁴ Ndesire okwo nti lyo harhajira owamurheba n'ebinwa bw'obweguza. ⁵ Bulya ciru akaba ntali muli mwe n'omubiri, ndi muli mwe n'omurhima, nnasimire okubona muyosire bwinja buzira kavulindi munasêzize buzibu omu buyemere bwinyu muli Kristo. ⁶ Ntyo mulame muli Nakasane Yezu Kristo nka kulya mwamuyigirizibagwa. ⁷ Mumumerekwo emizi munamusêrekwo, musimikire oku buyemere nka kulya mwayigirizibagwa, muna muna yorhe mwaviga omunkwa. ⁸ Mumanye hankanajira owammujira baja n'obwenguza bw'efilozofiya y'obunywesi, erya eyegemera emigenzo y'abantu n'ebiremwa by'en'igulu, ci arhali Kristo. ⁹ Bulya muli ye mwo obwimâna bwoshi bw' obunyabuzinda buba omu mubiri, ninyu mushangire obwo bwimâna muli ye, ¹⁰ Ye irhwe lya ngasi Mami na ngasi Mahashe. ¹¹ Muli ye mwakembwirwe obukembûle burhajiragwa na nfune za muntu, mwahogola omubiri gwinyu gw'ecaha: obwola bwo bukembûle bwa Kristo. ¹² Mwabishirhwe haguma naye omu nshinda erhi mubatizibwa, kandi mwafûsire haguma naye erhi muyemera obuhashe bwa Namuzinda wamufûlaga omu bafu. ¹³ Mwe mwâli mufîre erhi byaha binyu n'okurhakembûlwa kw'emibiri yinyu birhuma, ashubir'immuha obuzine haguma naye, arhubabalira ebyaha birhu byoshi; ¹⁴ azaza ecerhe c'omwenda rhwâlimwo n'ebigabi byaco, acirhenza, acibamba oku musalaba. ¹⁵ Nago Amami n'Amahashe aganyaga, agabonesa enshonyi omu masu g'igulu lyoshi, anagahwarha mpira zage. ¹⁶ Lero irhondo harhacijiraga owa muderha oku biribwan'oku binyobwa nisi erhi oku biyerekire ensiku nkulu, erhi oku baluka kw'omwezi , erhi olwasabato. ¹⁷ Ebyo byoshi biri cizunguzungu cone c'ebyaciyisha; ci okuli kwonanene guli mubiri gwa Kristo; ¹⁸ Ntaye ommurhebaga mpu ammunyage etanda yinyu omuku cikungika obwirhohye bwage bw'oku gashaniza ba Malahika. Ebyo byoshi biri bilorho bya balya obucibone bwabo burhagwerhi nsimiko n'obukengere bw'ecinya-mubiri burhunza. ¹⁹ Abola bantu barhasera oku irhwe lilisa omubiri gwoshi n'oku gusimbanya oku burhabale bw'enungo, n'emisi mpu lyo gushunjuka muli Nyamuzinda. ²⁰ Akaba mwafire haguma na Kristo oku biremwa by'en'igulu, cici cirhumaga mwayemera emiziro nka kulya muciri b'en'igulu? ²¹ Mpu: "Omanye wankahuma kwo, omanye wankalabula kwo, omanye wanka mamarha kwo? ²² Kali ebyo byoshi byalemeragwa okusherera omu kukolesibwa! Agola marhegeko, n'ezola nyigirizo zili z'abantu! ²³ Amarhegeko gabene ago ganahash'ibonekana nka gabantu bashinganyanya, balonza obulyo bw'okugashaniza, n'obw'okucirhihya, n'okubabaza omubiri; nobwo nta kamalo kago, na ntakwo gankahash'ihima irala ly'omubiri.