¹ Paolo, ntumwa ya Kristu Yezu oku bulonza bwa Namuzinda, na mwene wirhu Timoteyo, ² oku batagatifu na bene wirhu bemezi muliKristu bali e Kolosi. Kuli mwe engalo n'omurhûla gwa Larha Nnâmahanga! ³ Rhurhahusa okuvuga Namuzindaa omunkwa, Ishe wa Nnawirhu Yezu Kristu, nka rhwammukengera omu nsengero zirhu, ⁴ bulya rhwayumvirhe obuyemere bwinyu muli Kristu Yezu n'obuzigire bwinyu oku batagatifu boshi, ⁵ kulya kuba mucikubagire obulangalire mubikîrwe omu mpingu. Obwola bulangalire mwabuyumvirhe omu Luderho lw'okuli, yo Myanzi y'Akalembe; ⁶ eyo Myanzi y'Akalembe yahisire emwinyu nk'oku yalumire omu igulu lyoshi: yayâna emburho yanagandaza. Emwinyu nayo kwo na kwo, kurhenga lulya lusiku mwayumvagya mwanamanya enshokano ya Namuzida nk'oku enali, ⁷ bulya muyigirizibwa n'Epafra, murhabazi wirhu muzigirwa omu mukolo na murhumisi wa Kristu okwanine okucikubagira. ⁸ Yêne warhumanyisagya obuzigire bwinyu muli Mûka Mutagatifu. ⁹ Co cirhumire, kurhenga lulya lusiku rhwayumvagyamwo ogo mwanzi, rhurhahusa okummusengerera n'okushenga Namuzinda nti ammushoboze okumanya kwinja obulonza bwage, omu bushinganyanya bwoshi n'omu bumanye bwa Mûka Mutagatifu. ¹⁰ Na ntyo mube n'olugendo lushinganine Nyakasane, munamusimise muli byoshi; muyâne amalehe omu ngasi bijiro binja, munayushûke omu kumanya Nnâmahanga. ¹¹ Obuhashe bw'irenge lyage bwammuzibuhya, muhash'ilembera amalibuko goshi n'oburhwali, ¹² munavuge Larha Namuzinda omunkwa n'enshagali, owammushobozagya enshokano y'okushangira iragi ly'abatagatifu omu bulangashane. ¹³ YE warhurhenzagya omu buja bw'omwizimya, aj'irhudekereza omu Bwami bwa Mugala wage muzigirwa ¹⁴ warhucungulaga anarhulira ebyaha. ¹⁵ Yenshushano ya Namuzinda orhaboneka ye Nfula omu biremwa byoshi. ¹⁶ Bulya byoshi muli ye byalemagwa, emalunga n'en'igulu, ebiboneka n'ebirhaboneka, Entebe n'Amarhegesi, Amami n'Amahashe: byoshi byoshi ye wabilemaga, ye byanalemeragwa; ¹⁷ n'embere bibêho byoshi, yene erhi ho aba, ye nabihereza okubaho byoshi. ¹⁸ Kandi yêne y'irhwe ly'omubiri, yo Ekleziya; ye Nfula omu bâfire; nantyo ye murhanzi muli byoshi. ¹⁹ Bulya Namuzinda alonzize okumuhiramwo obwimâna bwoshi, ²⁰ na muli ye alonzize okugalula ebintu byoshi omu bwira bwage, ebiri en'igulu n'ebiri emalunga, alerha omurhûla n'omuko gw'omusalaba gwage. ²¹ Ninyu mwe mwâli bigolo mira na bashombanyi erhi nkengero zinyu n'ebijiro binyu bibi birhuma, ²² Lero bunola ashubir'mmujira bira bage omu mubiri gw'omugala, erhi afa, mpu lyo mubonekana batagatifu, beru-kweru na banwererwa omu masu gage; ²³ Caziga musêre buzibu omubuyemere, mumere emizi, mukomere munabe ntadundagana omu bulangalire bw'Emyanzi y'Akalembe mwayumvagya; eyo Myanzi y'Akalembe yayigirizibwe ngasi ciremwa ciba en'Igulu, nani, nie Polo, nahindusire Muja-bugo wayo. ²⁴ Bunola nsimire omu malumwa ndwirhe nabona mwe murhumire, nandwirhe nayunjuza omu mubiri gwani ebibuzire oku mababale ga Kristo, nti lyo nkwanana omubiri gwage, yo Eklezya. ²⁵ Nie ona nahindusire murhumisi w'eyo Eklezya obuja-bugo Namuzinda ampaga muli mwe burhuma, mpu ndumize oluderho lwage, ²⁶ ly'ihwe lyâli lifulike kurhenga emyaka n'emyakula n'oku bantu ba mira, na buno likola limanyirwe n'Abatagatifu bage. ²⁷ Namuzinda alonzize okubayereka obuhirhi bw'irenge bw'eryola ihwe emwa abapagani: Kristo ali ekarhi kinyu, ye bulangalire bw'irenge! ²⁸ Oyola Kristoye ye rhuhanula omu kurhonda ngasi muntu n'omu kuyigiriza ngasi muntu n'obushinganyanya bwoshi, nti lyo rhuhindula ngasi muntu abe mwimâna muli Kristo. ²⁹ Eco co ntamira, omu kulwa entambala n'oburhabale bw'emisi mpabwa n'obuhashe bwage.