1 Bazaleli achul'esanduku y'empaho z'omurhi gw'omu kasiya, obule zaliri ntambu ebiri na senti makumi marhano, n'obugali yaliri ntambu nguma na senti makumi marhano, n'oburherema kuj'enyanya konako. 2 Ayishig'ehoro emugongo n'omundani azungulus'omuhiro gw'ehoro eburhambi. 3 Ajira mpogo ene z'ehoro azihir'oku magulu gayo, ebiri lunda n'ebiri lunda. 4 Ajira milambaliko ebiri y'omurhi gw'omu kasiya ayishig'ehoro. 5 Ayishesheza mw'ezo mpogo oku magulu y'eyo sanduku g'okuyiheka. 6 Ajir'omufuniko gw'esanduku gw'ehoro ekomere obule zaliri ntambu ebiri na senti makumi marhano, n'obugali yaliri ntambu nguma na senti makumi marhano. 7 Achul'eshushano y'ebiremwa biderhwa Makerubi ebiri z'ehoro, 8 azihira oku bikwi byombi by'ogo mufuniko gw'esanduku, bazimanikako. 9 Abo bamakerubi bashanjulir'ebyubi byabo enyanya z'omufuniko gw'esanduku bayinja balolana. 10 Ajira ameza g'omurhi gw'omu kasiya obule bwaliri ntambu ebiri, n'obugali ntambu nguma, n'oburhema kuj'enyanya ntambu nguma na senti makumi marhano. 11 Agashig'ehoro ekomere, agahira k'omuhiro gw'ehoro. 12 Ajir'omukaba gw'empaho z'obule bwa ntambu nguma, azihir'oku muhiro gw'ago meza oku bikwi byoshi azishig'ehoro. 13 Agajirir'empogo ene z'ehoro, azihir'oku bikwi byago oku binali bine ah'okugulu kunali. 14 Azihir'aha burhambi bwa ngasi kugulu, zoz'okugeza mw'emilambaliko y'okumaheka. 15 Abeja emilambaliko n'empaho z'murhi g'omu kasiy, ayishig'ehoro, yaba y'okuhek'ameza. 16 Achul'ebintu byakazi koleswa kwago Meza: Embale, n'orhubehe, n'ebyanzi, n'ebisupa by'oku hanira kw'entulo ye divayi. 17 Ajira echimanikiro ch'amatara n'ehoro ekomere ayihinga ajira ahachakazi yikalira, n'amashani n'amafundo, n'amaso gacho, ahira kw'amauwa, choshi chuma chiguma chichulirwe. 18 Chaliherhe marhabi ndarhu ahagarhi. Lunda luguma lwacho lwaliherhe marhabi ndarhu, n'olwindi ntyo ntyo. 19 Erhabi liguma lyali kw'echifundo chiyorhere nka lehe ly'omukomamanga liyorhere nka bwwaso, n'erindi rhabi kon'ako, na gala gandi marhabi ndarhu garhenger'omu chimaniko. 20 Oku murhi gw'ahagarhi k'echimanikiro kwaliri rhufundo rhune rhulehere nka lehe ly'omu komamanga liri kw'ebiri nka mafundo n'obwaso. 21 Eshishi lya ngasi rhabi mabiri g'omurhi guli ahagarhi g'echimanikiro kwaliri nako amafundo. 22 Ago mafundo n'amarhabi n'echo chimanikiro, chuma chiguma chalibichulire chanaliri. Cha horo mpinge ekomere. 23 Achijirira matara mushanvu n'ebintu byacho bye horo ekomere. 24 arhola bilo makumi masharhu na birhano bye horo ajira mw'echimanikiro ch'amatara n'ebintu byacho byoshi. 25 Ajira oluherero lw'amalashi gw'omurhi gwa akasiya; okulehuka kwalo lwairi koro liguma, liyumanene enyunda ene zinganangana n'obuzamuka bwage bwaliri makoro mabiri, n'amahembi ga rhengerera oku luherero. 26 Alushiga ehoro erhachangirene, enyanya, enyunda zoshi oku zungulusa n'oku mahembi, n'oku jira omuhiro gw'ehoro n'oku zungulusa hoshi. 27 Ayijirira peta ebiri z'ehoro eshishi w'etaji lyage omu mbavu zage ebiri, oku nyunda zage ebiri ahantu h'amagongo g'okuyiheka. 28 Ajira ago magongo g'omurhi g'omushita, n'oku gushukira n'ehoro. 29 Ajira amavurha machesibwa g'okuchishiga, n'obuku bwinja bw'amalashi ginja, kuguma n'omulimo g'okwiz'amalashi.