1 Bezaleli na Ohaliabu n'abandi balenga ba Nyamuzinda aher'obwenge n'obumanye bw'okujira ebintu byokukoles'oku bugashanire bwa hantu hachesibwa, bajira nk'oku Nyamuzinda abarhegekaga. 2 Musa ahamagala Bezaleli na Oholiabu, na ngasi balenga boshi Nyamuzinda ahag'omurhima gw'ogurhabala okujir'emikolo. 3 Barhola bilala Abaisraeli bashololaga byoshi akujir'ehema lichesibwa, aliko eri n'Abaisraeli banagenderer'oku lerhera Musa ebindi n'okushonda kwabo ngasi sezi. 4 Ago mango abalenga bakazagijir'eyo mikolo y'okuyumbak'ehema, barhangi yumanza emikolo bajikubwira Musa mpu: 5 Abantu balerhere bintu binene kulusha ebiwaderhaga by'okujir'emikolo NYamuzinda arhegekaga. 6 Musa arhum'ebwa ngasi chilalo oku nta muntu mulume eri mukazi wachisholola n'ehema akantu; intyo balek'okusholola. 7 Ebi bali bamasholola byankamalire, chiro byaluga kulush'ebyankajire eyo mikolo. 8 Abalirri balenga bwenene kulusha ababo, bajira myen'ekumi y'erangi lya ngasi lubero: Edukwire, ey'akaduku n'eyeshagama, n'eyechitani chinja. 9 Obule bwa ngasi mwenda zaliri ntambu ekumi nene, n'obugali zaliri ntambu ebiri. 10 Erhano yalihangirwe haguma na yindi erhano haguma. 11 Bahangir'ebishumiro oku mwenda guzinda oku burhambi gwago, oku bulungiro burhanzi, bayihangir'oku mwenda gurhanzi g'obulungiro bwa kabiri. 12 Ngasi muguma gwaja ku bishumiro makumi marhano oku buzinda bwa ngasi bulungiro, bashwekera haguma. 13 Bajira pengere makumi marhano ge horo z'oku chugir'ago malungiro haguma gayumanyane ehema libe liguma. 14 Bajira myenda ekumi na mugguma y'oboya bw'empene y'ehema lya kabiri ly'okushukira ehema ly'okushimanana. 15 Obule bwa ngasi mwenda zaliri ntambu ekumi n'erhano, n'obugali zaliri ntambu ebiri. Eyomyenda ekumi na muguma yaliyumanene. 16 Bahangir'erhano haguma na yindi ndarhu haguma. 17 Bahangir'ebishumiro makumi marhano oku burhambi b'omwena guzinda g'obulungiro burhanzi, baheba na gandi makumi marhano oku burhambi bw'omwenda gurhanzi g'obulungiro bwa kabiri. 18 Bajira pengere makumi marhano z'echuma ch'amarhale z'okuchungir'ago malungiro gombi haguma gayumanyany'ehema libe liguma. 19 Bajir'empu z'engandabuzi edukwire z'omushushu mpu zikazishukira elyo hema n'ezindi mpu zizibuzibu ziger'enyanya ly'ezabo. 20 Bajirir'ehema lya Nyamuzinda empaho z'omurhi gw'omu kasiya, bazishinga mpu zikazi chung'eehema lichesibwa. 21 Ngasi lupaho obule zaliri ntambu erhano n'obugali zaliri senti makumi gali mushanvu n'erhano zishwekerwe haguma na milambaliko ebiri. 22 Ngasi lupaho lwaliherhe birhule bibiri byo kugeza mwezindi, ntyo kubajirir'ezindi za yumbakag'ehema ly'okushimanana. 23 Bahir'ezo mpaho makumi mabiri oku lunda lwa malyo lwe hema. 24 Oku bikunikuni byazo, bahira kw'ebyuma makumi mane byo kuchula efuranga, ngasi luguma baluhira ku byuma bibiri bibiri byo kugera mu bila birhule. 25 Intyo kubajiraga n'okulunda l'okuboko k'okulembe kw'ehema ly'okushimanana. 26 Bajira byuma makumi mane by'efuranga bibiri bibiri oku chikunikuni cha ngasi lupaho. 27 Bajira mpaho ndarhu z'emitungo y'eryo hema olunda lw'ebuzikiro bw'ezuba bwalyo. 28 Bajira mpaho ebiri zago zago z'okuj'oku nkingi zalyo. 29 Oku ngasi nkingi ezo mpaho ebiri zalishanjukir'eshishi, aliko zalihumanire hofi n'empogo, intyo kubajirag'empaho z'okuzindi nkingi zoshi. 30 Zaliri mpaho munane, oku bikunikuni kwaliri byuma ekumi na ndarhu by'efuranga oku chikunikuni cha ngasi lupaho kwali byuma bibiri. 31 Bajira milambaliko erhano y'empaho z'omurhi g'omu kasiya, bazihira lunda luguma lw'ehema n'olwindi lunda ntyo. 32 bahira yindi erhano oku lunda lw'ebuzikiro bw'ezuba bw'ehema ly'oku shimanana. 33 Bagez'omurhi ahagarhi garhi, gwagwarh'enkingi n'eyindi. 34 Bashig'ezo mpaho kw'ehoro, n'empogo zaliriko z'okugeza mw'emilambaliko n'eyo milambaliko bayishig'ehoro. 35 Abalenga baluk'omwenda g'oguchikiriza gw'echinusi ch'akaduku, n'echeshagama, haguma n'eye' echitani bachapa kw'ebiremwa biderhwa makerunbi bahirako. 36 Bagajirira nkingi ene zali kw'epengere z'ehoro, zibakazagi shesheza m'omwenda gw'oguchikiriza. Oku bikunikuni byazo oku bindi bine, babishig'echuma ch'efuranga. 37 Omu mulunvi lw'ehema lichesibwa, bahiram'omwenda g'okuchikiriza gulukirwe n'echinusi chiri haguma n'echitani chinja, ogo mwanda gwali chapirwe. 38 Bachula nkinki erhano z'okuchug'omwenda g'okuchikiriza, n'epengere z'okuguchuga, bazishig'ehoro. Oku mafufu n'oku marhwerhwe n'oku bikunikuni byazo, kwa liri ebyuma by'amarhale.