Chigabi 34

1 Nyamuzinda abwira Musa: Obeje mbale ebiri z'amabale nka zilala za mbere nj'oyandike kw'emyazi yaliri ya mbere eyi wachagulangaga. 2 Obe wachirheganya omu bichanji bikwirire, na njo nanyegere oku ntondo ye Sinayi, oyimange embere zani oku busosoro bw'entondo ahola. 3 Ntaye ozamukage oku ntondo haguma nawe, na ntaye njimbonage wafunikira oku ntondo yoshi, chiro akaba bibuzi n'enkafu, birhabonekaga hofi w'eyola ntondo. 4 Musa abeja mbale ebiri z'amabale nka galala g'embere, azamuka esezi sezi oku ntondo ye Sinayi nka kulala Nyamuzinda amurhegekaga eri aherhe omu fune yage mbale ebiri z'amabale. 5 Nyamuzinda ayandagala omu lwakungu, aja hofi naye, ahamagala ezino lya Nyamuzinda. 6 Nyamuzinda agera embere zage aderha, Nyamuzinda, Nyamuzinda, namahanga w'obonjo ntakunira duba; Kubuya buya n'oburhe, mugale mwinja na mushinganyanya, 7 inde oherhe obuzigire bwage kuhika oku chihumbi ch'eburha, abablira amabi, abahalanjika na banya byaha, aliko arhaleka ababi oku bashinganyanya, nye n'ahana badarha oku bana n'abana oku bana kuhika oku luburha lwa kasharhu n'olwa kane. 8 Honaho Musa ayinama ewa daho, afukama. 9 Aderha: Nahano akaba na bwene olukogo oku mesho gawe, Nahano lambagiraga omu charagati cherhu, bulala luli lubaga lwa bachirimisi barhayunva, obabalire amabi gerhu n'ebyaha byerhu.Onarhujire mwimo gwawe. 10 Nyamuzinda ashuza: Lolaga nkola nashwek'endagano, nji njire onaliho n'olubaga lwawe loshi ebisomezwe ebirhasaga jirika omu chindi chihugo n'omu bwindi buko: N'olubaga loshi lukuzungulukire nji lwabona emirimo ya Nyamuzinda na woyo w'anajirira ebintu bidarhi. 11 Obikire bwinja ebi na kurhegekaga zene, lolaga, nji nahiga embere zawe Abamori, Abakanana, Abahiti, n'oMperizi, Abahevi, na Bayebusi. 12 Omenye wajira endagano ya haguma ya balamire omu chihugo, wajamo, bula yi barhakujirira omuguli oku w'oyo. 13 Kuleka ntyo : Okumbagaze amaherero gabo, ovunagule eshushano zabo ochagulange rhwa nyamuzinda wabo. 14 Nj'orhafukamiraga embere z'owindi hya nyamuzinda, bulala Nyamuzinda anaheka ezino lya bayongwa. Ali Namahanga oyongwa. 15 Orhahira wajira endagano haguma n'abantu b'omwola chihugo, bula orhafukamiraga ba rhwa nyamuzinda wabo. Orhanabarhuliraga enterekero, bana kuhamagala, orhanalyaga oku buhanya bwabo. 16 Bula orharholaga bali babo oku bagala benyu mpu babashabe; na bala banyere bafukamira ba nyamuzinda wabo banayigiriza bagala benyu okufukamira rhwa nyamuzinda wabo. 17 Orhahiraga okuchula banyamuzinda b'echuma. 18 Okazilanga olusiku lukulu lw'emigati erhagagire, okazijira esiku mushanvu omu kasanzi kw'omwezi gw'endagano, nji walya emigati erhagagire nka kulala na kurhegekaga omu mwezi gw'endagano ya kurheng'e Misiri. 19 Ngasi choshi chaburha embere chiri chani, emishakalume yoshi mizibuzibu omu buso n'omu birhungano. 20 Nji wachungula haguma n'omwana buzi n'ow'enkavu, na nkorhachungwire nji wanavunika egosi, nji wanachungula efula zenyu zoshi, nj'orhanayihekaga buzira hintu embere zage. 21 Nji walema wakola esiku ndarhu, n'olusiku lwa mushanvu nji wanahumuka, chiro akaba mango ga kurhwera nago kushalula. 22 Nji wajira olusiku lukulu lwa maboso m'embere-mbere gw'okushalula g'engano, n'olusiku lukulu lwa kuhumba aha buzinda bwa ngasi mwaka. 23 Kasharhu omu mwaka ngasi balume boshi nji bafukama embere za Nahano Nyamuzinda Namahanga we Israeli. 24 Bulala nji nalibisya obuko embere zawe, nji nayushula embibi z'echihugo chawe, na ntaye chiro n'omuguma nji wayogera echihugo chawe amango nji walema wazamuka mpu chiyerekana embere za Nahano na Namahanga wawe kasharhu omu mwaka. 25 Orhahira okurhula enterekero y'emigati egagire y'eshagama y'omubi oku bukuze bwani, nterekero y'olusiku lukulu lwa Pasaka nji lurhagendaga lwageza obuduf kuhika esezi. 26 Nji mwagenda mwarhula ebimwayezega by'embere - mbere omu nju ya Nahano, Namahanga wawe; Orhahira okuyenda echana ch'empene omu monka ga nina. 27 Nyamuzinda abwira Musa: Yandika eyi myazi, bulala eyi myazi ofundikire na jira ndagano haguma nawe na haguma na Israeli. 28 Musa abera eyola haguma na Nyamuzinda siku makumi mane z'ezuba n'esiku makumi mane z'obudufu, buzira kulya migati n'okunywa amenji na Nyamuzinda ayandika okuzilala mbale emyazi y'endagano, marhegeko ekumi. 29 Musa ayandagala oku ntondo ye Sinayi, eri aherhe mbale ebiri zo kuhamiriza, omufune zage, omu kuyandagala oku ntondo, arhalimenyere oku oluhu lw'omubiri gwage gwa kolera, bulala aliderhere na Nyamuzinda. 30 Haruni na bana b'e Israeli balolereza omubiri gwa Musa yi gwa kolera, bayoboha oku mushegerera. 31 Musa abahamagala: Haruni na Bagula boshi b'ehano likulu, bayinja hofi naye ababwira. 32 Aha buzinda wa hola abana b'e Israeli bamushegerera n'okubahereza amarhegeko Nyamuzinda amuhere oku ntondo ye Sinayi. 33 Eri Musa amala shambala achishukira omushangi oku rhwe n'amalanga mage. 34 Amango Musa ajaga embere za Nyamuzinda mpu bashambale naye okula omushangi kuhika amango ahulukaga, abwira abana b'e Israeli amarhegeko ahabirwe. 35 Abana b'e Israeli babona amalanga ga Musa ga kolerere, Musa ashubi galula omushangi oku rhwe n'amalanga gage, kuhika ashubigenda shambala haguma na Nyamuzinda.