¹ Nechi ,nahirir'omurhima gwani mw'ebyo byoshi, ebyo byoshi na bijira ntego yobugenzuzi bwani, na bona okwa benja n'abirhonzi n'emirimo yabo, byaliri omu fune za Lulema, n'obuzigire n'olushombo ; abantu ntacho bayinji chiro: Byoshi biri embere zabo. ² Byoshi binagerera boshi, lugero luguma oku mwinja n'omubi, oku muntu mwinja anakomere n'oku muntu ozingire, na kolala ohan'entulo na kolala orhahana ntulo; ntyo kuli kwinja oku munyakubinali, n'omunya byaha, n'oku muntu ochigasha n'olala oyubaha kuchigasha. ³ Buno buli bubi ahagarhi k'ebijirwa eshishi w'ezuba, bulala hali olugero luguma oku bantu boshi ; n'oku murhima gwa bene omuntu guyunjwir'obubi, n'esire liri omu murhima gwab'omu kalamo kabo; na buzinda bwaho,banafa. Bulala, nde birhalolere ? ⁴ Oku boshi balamire hali omulangaliro; na kandi nyakabwa olamire alushire entale efire. ⁵ Abalamire, nabo, bayinji oku nji bafa; aliko abafire ntacho bayinji, harhanachiri n'oluhembo lwabo, bulala barhachiyibukwa. ⁶ N'obusime bwabo, n'omujinya gwabo, n'obongwa bwabo, bya herere mira; barhakanachibona chiro echigabi chiguma oku byoshi bijirwa eshishi w'ezuba. ⁷ Genda, olye n'obushagaluke omugati gwawe, onanywe n'obusime edivayi lyawe,: bulala kurhenga mira Lulema asimisizwe n'ebyonajira. ⁸ Ngasi mango emishangi yawe ebe y'omweru, n'amavurha marhahira makabulw'okwirhwe lyawe. ⁹ Ochisimise omu kalamo kawe haguma na mukaw'osimire, omu siku zoshi z'akalamo kawe k'obusha, Nyamuzinda akuhere eshishi w'ezuba omu siku zawe z'obusha; bulala ch'echigabi chawe omu kalamo, ahagarhi k'mulimo gwawe ojir'eshishi w'ezuba. ¹⁰ Ngasi choshi efune yawe eshondere kujira n'emisi yawe, ochijire; bulala ekuzimu erhaba mulimo, changw'omuganiza, changw'obumenyi changwa obwirhonzi, omukuzimu, emunda waja. ¹¹ Nashubi bona eshishi w'ezuba okw'amalibirha marhali m'abayanguhire, n'eri entambala erhali y'entwali, n'omugati oku birhonzi, n'obuchire oku banyabwenge, changw'esimwa oku bayinji byoshi; bulala byoshi bikulikirene n'akashanji n'ebyakabiri. ¹² Omuntu arhamenya akasanzi kage, kuguma n'efi zinafarhwa n'omulaga g'olufu, n'enyunyi zinafarhwa n'omurhego; kuguma nazo, bene muntu banalibuka amango gw'obuhanya, amango anazigwako honaho. ¹³ Nashubibon'okw'eshishi w'ezuba eyi mpiriri y'obwirhonzi yabonekan'emwani kubanene. ¹⁴ Haliri chishagala chigeke, mwaliri bantu bageke, omwami w'obuhashe achilambagiramo, achiyumbaka, achizunguza echizimbero chikomere. ¹⁵ Mwaliri omuntu w'omukene mwirhonzi, oyu achungul'echo chishagala kugerer'obwirhonzi bwage. Na nta muntu wachigerere kuyibuk'oyo muntu w'omukene. ¹⁶ Naba naderha: Obwirhonzi bulushire emisi. Alik'obwirhonzi b'omukene burhakengwa, n'ebinwa byage birhayunvibwa. ¹⁷ Ebinwa by'abirhonzi buyunvirizwa bwisirire, bilushir'olwamo l'omuntu orhambwire abahwinja. ¹⁸ Obwirhonzi bulushir'ebikoleso by'entambala; alik'omunyachaha muguma anabihya bikulo binene