¹ Emiguu efire enaluma n'okubuza amavurha g'ochishinga; n'esire ligeke lya namuheka oku butundu n'okubukuze. ² Omurhima g'omunya bwenge guli emalyo gage, n'omurhima gw'echinganyi guli emalembe gage. ³ Amango echinganyi chiri chalambagira omu njira, anabulirwa n'obwenge, n'oku bwir'owindi: lolag'omusire muguma! ⁴ Nk'omuka gw'orhambwire gw'akayimanga enyanya zawe, orharhengaga aholi; bulala oku sira kurhulanga oku byaha binene. ⁵ Hali omubi n'abwene eshishi w'ezuba, nka chibi chirhengerere okw'oli arhegeka. ⁶ Esire lirholere ahantu h'enyanya, n'abagale bayikere eshishi. ⁷ Nabona abaja bali oku ndogomi n'abaluzi yibalambagira oku bidaka nk'abaja. ⁸ Oly'ahumba echiriba nj'a chirhogeramo n'oli ahindamula olusika nj'alumwa n'enjoka. ⁹ Oli ahindamula amabale njalemazwa, n'oli achagulanga eshali nj'abona obuzibu. ¹⁰ Nk'ashongola echuma, arhanalonzag'okukalihya oboji, anayushula emisi; aliko obwirhonzi bwanabona obunguke bushiganene. ¹¹ Nk'enjoka ya kalumana enyuma z'okulokolwa, nta bunguke okw'olokola. ¹² Emyazi y'omu bunu bw'omwirhonzi eba eyunjwire olukogo; aliko oku bunu bw'echinganyi bunalerh'echihombo. ¹³ Omurhondero gw'emyazi y'obunu bwage liri sire, n'obuzinda bwederho yage liri sire likalire. ¹⁴ Echiganyi chanayushula emyazi. Omuntu arhamenya ebinji byayinja, n'owunji wamubwira ebinji byaba enyuma zage? ¹⁵ Omulimo gw'echiganyi gunamurhamya, bulala arhakamenyere bichi ajijira omu chishagala. ¹⁶ Buhanya emwawe, chihugo mwami ali mwana, n'abaluzi yibalya kurheng'esezi. ¹⁷ Ragi lyawe, chihugo mwami w'omubuko bumanyikene, n'abaluzi balya oku kasanzi kashiganene mpu ly'emisi yabo esera, arhali kuchiheba okubulalu! (oku mavu). ¹⁸ Amango efune ziri za bolokazi, akasongero kanabiha, n'amango efune zirhakola, enju yanaloba. ¹⁹ Bajira ebiryo enyanya y'okushekesa, n'erivayi linajir'akalamo kashagalukire, n'efuranga zinashuza oku byoshi. ²⁰ Orhahira okakoma mwami, chiro n'omu nkengero Sawa, n'omubwenge bwawe, orhahira okakom'omugale omu busika bwawe emunda olyama; bulala enyunyi ye malunga nji yaheka omulenge gwawe, n'echirhungano ch'ebyubi nji cha yalagaza emyazi yawe.