¹ Kabula omugati gwawe oku menji, bulala hano nji hagera esiku nji wagubona. ² Hana chiguma oku mushanvu n'oku munane, bulala orhakamenya aho buhanya bwarhengerera oku gulu. ³ Amango ebichu biyunjwir'envula, byanayisheshere oku daho; N'akaba omurhi gukakumbagala, enjira enyanya chango enjira y'eshishi, gwa nabera halala gwakumbagaliraga. ⁴ Ololerez'omuhusi, arharhwera chiro, n'olola ebichu arhashalula. ⁵ Nka kulal' orhenji enjira y'omuhusi, orhenji gurh'amavuha galemwa omunda y'omukazi oli bukule, ko rhakamenya emirimo ya Nyamuzinda ojira byoshi. ⁶ Kurhenga esezi orhwere emburho yawe n'egolo orhahumusag'efune yawe; bulala orhamenyere chihe nji chakubera, akaba echila changw'echindi, changwa chiguma chang'echabo na byoshi biri binja. ⁷ Obuche bukwira, n'okuba bwinja oku mesho gasima gabone ezuba. ⁸ Nk'omuntu akalama myaka minene, n'oku chisimisa mw'eyo myaka minene n'oku kengera esiku z'omwizimya nji zaluga; ngasi nji hyayinja eri busha. ⁹ Musole, oshagalukir'obusole bwawe, n'omurhima gwawe gukushagaluke omu siku z'obusole bwawe, olambangirir'oku njira z'omurhima gwawe, n'emalangambere g'amesho gawe; alik'omenye oku enyanya weyi myazi yoshi Nyamuzinda nja kuchir'olubanja. ¹⁰ Na ntyo okul'oburhe omu murhima gwawe, ona kul'obubi oku mubiri gwawe, bulal'obusole n'oku gandaza biri bya busha.