¹ Kandi omanye oku omu nsiku nzinda, amango mazibu ganayishe. ² bulya abantu bashiba bakucisima byonene, bayishiba bamusima birugu, bakucibona, bakashobeka abandi busha, bayishi ba bigamba, bantu barhayishi vuga omunkwa, bayunjulirine bubi, ³ bayishiba baminya, balya barhasima kulama n'omurhula n'abandi, badesi babunywesi, bantu barhajira lugero, barhajira lukogo, bashombanyi b'abantu binja. ⁴ Bashiba bisi ba bantu, bizuzu, bamusima bone na basima igulu kulusha Nyamuzinda. ⁵ Bakabonekana nka bakucikumba Nyamuzinda, Cikone balahire emisi yage. Muyake bantu nkabo. ⁶ Bulya bali balume bakaja omu milala y'abandi n'okuderha anakazi b'ebingolongolo. Aba bali balya bakazi banyabyaha balongolanwa n'enyifinjo za ngasi lubero. ⁷ Aba bakazi banayigirizibwe e nsiku zoshi Cikone ciru barhankahikirira ekuli. ⁸ Na nka kulya Yane na Yambure balahiraga ebya Musa. Na mwoku aba yigiriza b'obunywesi barhaderha okuli. Bali bantu basherire omu nkengero zabo, balya barhaciyemerirwe okushangira obwemere. ⁹ Abo barhankagenderera kuli, bulya obuhwinja bwabo bwashiyalagazibwa emwa bantu boshi, nkoku byali kwa balya bantu. ¹⁰ Cikone wehi oshimbulire enyigirizo zani, olugenzi lwani, n'obulonza bwani, obwemere bwani, obuzigire bwani n'okuyimanga lwani, ¹¹ amalibuko n'amalumwa nalibukaga e Antiokiya, Ikoniyo na e Listriya. Nagalindirira ci Nyakasane anciza mwebyo byoshi. ¹² Balya boshi balonza okulama akalamo kokucikumba Nyamuzinda muli Kristu Yezu balibuzibwa. ¹³ Abantu babî na abanywesi bagenderera okuba babi bwenene. Baheza bânji na byonene bahezibwe. ¹⁴ Cikone wehi olame mwehi mwayigirizibagwa n'okubiyemera bwalagale. Bulya omenyire emwandi mwayigirizibagwa. ¹⁵ Omanyirage oku kurhondera eburho bwawe wayishigi emyanzi ya Kalembe. Eci canakulerhera obukenge omu buchunguke omu njira y'obwemere muli Kristu Yezu. ¹⁶ Ngasi omwanzi gw'akalembe gwahebirwe m'obugumaguma na Nyamuzinda. Gushinganine enyigirizo z'obunguke, omukuhaniriza n'okugokola omu mabi y'okuyigiriza aminja. ¹⁷ Oku kuli mpu Omuntu wa Nyakasane akule, erhi agwerhe obulenga boshi b'okujira emikolo minja.