¹ Nakuhire olukengero luzibu embere za Nyamuzinda na Kristu Yezu, ye washi hana abazine n'abafire, n'enyanya ly'okuyalagazibwa kwage y'obwami bwage. ² Yigiriza akalembe. Ocirheganye oku kasanzi kashinganine n'akarhashinganini. Obwire abantu ebyaha byabo, kaliha, obusherezê, omu bulembedu boshi n'enyigirizo. ³ Bulya amango gayishiyisha abantu barhashishibirire enyigirizo z'okuli. Enyuma lyaho bashi cilongeza abigiriza bashikabayigiriza kushimbana n'enyifinjo zabo, mwoko amarhwiri gabo gashiba gamafunikwa. ⁴ Bashileka oku kayunva enyigirizo z'okuli bakashimba endibi. ⁵ Wehi obe mwikubagirwa omu bintu byoshi, olembera amazibu, okole emikolo y'obuhamirizi, ohikirize emirimo yawe. ⁶ Bulya niehi nayunjulirine, akasanzi kani k'okugenda kakola kayegerire. ⁷ Nalwire again, nahisize k'ensiku zani, nalanzire obuyemere. ⁸ Ntacindi cicinsigalire okurhali kuyankirira ishungwe ly'obushinganyanya Nyakasane, omuciranuzi mushinganyanya ashimpemba olwo lusiku, arhali niene, ci na balya boshi bayishiba balinzire n'obuzigire okuyisha kwage. ⁹ Okanye onshigane duba. ¹⁰ Bulya Dema andesire erhi kusima igulu lirhuma, acijirire e TEsalonika, Kreshenti ajire e Galileya, na Tito acijirire e Dalmasiya. ¹¹ Luka yene ociri haguma na nani. Oyishe mwene Mariko bulya antabala bwenene omu mikolo. ¹² Narhumire Tikiko e Efeso. ¹³ Hano akola ayisha ananderhera ecishuli nasigaga e Trowa aha mwa Karpo, olerhe n'ebitabu, cibwenene birya by'engurha. ¹⁴ Alekizanda mutuzi w'ebyuma anjirire mabi manji, Nyakasane ajemulyule kushimbana n'ebijiro byage. ¹⁵ Nawe ocilange kuli ye, bulya alwisize bwenene enyigirizo zirhu. ¹⁶ Erhi mpimana oburhanzi, ntaye wanyimangire, boshi bandikirira. Nyamuzinda mashi arhabatumuzagya eco. ¹⁷ Cikone Nyakasane yehi alinyimangire, ampera mwo emisi mpu lyo kugerera emyanzi yage eyalagazibwe omu bushinganyanya k'olubaga luyiyunve bwinja. Nacizibwa omu kanwa k'Entale. ¹⁸ Nyakasane anyokola omu ngasi kubi, anancize ampeke omu bwami bwage, kuliye irenge emyaka n'emyaka. Bibentyo ¹⁹ Mundamukize Priska na Akwila bo n'ab'omu mwa Onesiforo. ²⁰ asigire eyomunda e Korinto, Cikone Trifomu namudizire e Mileto ali mulwala. ²¹ Obiduhe duba ohike eno embere z'empondo, Ebulo na Pudensi na Lino na Klaudiya na bene wirhu boshi, mpu asinge. ²² Nyakasane abe omu mirhima gwawe! Enshokano ya Nyamuzinda ebe haguma Ninyu!