¹ Oku biyerekire okuyisha Nyakasane Yezu Kristu n4obushimana na kwirhu hali ye, bene wirhu bakristu, rhumuhûnyire nti: ² murherhemukaga duba duba nisi erhi bamuyobohye n'obulebi* bw'obunywesi, bamurhebe n'enderho erhi n'amaruba mpu olusiku lwa Nyamuzinda luyiruka. ³ Mumanye hakajira owamurheba muli njira ndebe. Bulya olwo lusiku lusiku lurhakayisha na bulya buguma bukulu bwa buzinda burhaciboneka, n'olya Mubi orheganyizibwe obusherere arhaciboneka. ⁴ Oyo anaishe alahire ngasi eci abantu baharamya n'ebi babona nka biri bya Nnâmahanga. Ebyo byoshi abilahira ciru alinda arhulukânaq omu ka-Nyamuzinda ka Nnâmahanga atamala mwo acijire mpu ye kola Nnâmahanga. ⁵ Ka murhakengîri oku nja mmubwizire kandi erhi ndi emwinyu, ⁶ Haciri kantu kaguma kône karhumire ebyo birhaba buno, n'oko kantu mukanyire. OLya mubi erhâkayisha n'okanzi kage karhacihika. ⁷ Ihwe ly'obuhashe bw'obuguma likola lirhi lyakola; cikwone ebyo birhâkayisha n'olya obigwasire arhacigenda. ⁸ OKuhandi obwo olya mubi ayalagalage, Nyakasane Yezu amubûhe n'omûka gw'ekanwa anamushereza n'irenge ly'okuyisha kwage. ⁹ Oyo Mubi ayisha adwirhe obuhashe bwa shetani, ajira birhangaza na bisômerine binji bya bunywesi; ¹⁰ akolesa ngasi bûko bwa mabi arhebe mwo ngasi barhêresire. Barhêreka bulya barhayankiriraga barhanazigiraga okuli kwabacungulaga. ¹¹ C'eco corhumire Nnâmahanga arhuma obuhashe bo kuhabula mpu bukole muli bo, bayemere eby'obunywesi. ¹² Cocirhumire ngasi barhâyemere okuli boshi, cikwone bacîsîmîse omu mabi; bayish'ihanwa. ¹³ Rhugwasirwe okukâvuga Nnâmahanga omunkwa burhahusa erhi mwemurhuma, bene wirhu bakristu, mwe bantu Nyakasane asîma. Bulya Nnâmahanga amwishozire mpu lyo muba barhanzi okucizibwa na Mûka Mwimana.Mûka mwimana ye mujira okuba bantu ba Nnâmahanga n'omu kuyemera muyemera okuli. ¹⁴ Nnâmahanga amuhamagalire ebyo omu kukolesa Emyanzi y'Akalembe rhwamubwiraga.okuba n'okwinyu mwanyag'obulangashane bwa nyakasane Yezu Kristu. ¹⁵ Co cirhumire, bene wirhu bakristu muyorhe musimire, mubikire n'omu murhima enyigirizo rhwamuyigirizagya, akaba uku kuderha n'akanwa nesi erhi omu maruma. ¹⁶ Mâshi Nyakasane yezu kristu yene, na Nnâmahanga Larha warhusîmaga, n'oku lokogo lwage arhuha obushibirizi bw'ensiku n'amango, n'obulangalire bwinja, ¹⁷ ayunjuze emirhima yinyu bushibirizi, amuhe n'emisi yo kujira ngasi kantu kinja, omubijiro n'omu binwa.