¹ Neci, bene wirhu, murhushengere lyo akanwa ka Nyakasane kadenderere oku lumîra duba duba n'okukuzibwa, nka kulya byabâga muli mwe. ² Munashenge lyo Nnâmahanga arhuciza oku bantu b'emirhima mibi na baminya. Bulya arhali abantu boshi balonza okuyemera. ³ Cikwone Nyakasane aba mwikubagirwa. Amuzibuhya anamulanye kw'olya mubi. ⁴ Nyakasane adesire mpu rhucîkugubagire mwe. Arhumanyisize okunali oku muli mwajira ebi rhumurhegesire, n'oku mwanagenderera okubijira. ⁵ Mâshi Nyamuzinda abêze emirhima yinyu omu buzigire bwa Nnâmahanga mul'isêra kwo Kristu. ⁶ Bene wirhu, rhumuhûnyire okwo okw'izino lya Nyakasane Yezu Kristu. Muyake balya bene wirhu barhahuma kabishi, barhakulikîri enyigirizo rhwa bayigirizize. ⁷ Nyinyi mwene mumanyire bwinja kurhi mugwasirwe okujira omu kukulikira olwiganyo lwirhu. Bulya rhurhâli bôlo amango rhwali emwinyu. ⁸ Rhurhazigaga mpu omuntu arhulîse ebi rhurhâgulaga, cikwone rhukâkola mûshi nabudufu nti lyo rhurhakîjira oyu rhwahûna akantu. ⁹ Rhwajijire ntyo erhi rhunamanyire oku rhugwerhe amakwanane oku burhabale mwaka rhuha; cikwone rhwali rhulonzize nti rhumuyereke olwiganyo lwinja. ¹⁰ Bulyha amango rhuli emwinyu, rhwamuzire nti orhalonza okukola, arhanagwasirwi oku lya. ¹¹ Rhumuzire ntyo bulya rhwayumvîrhe oku mukola, muba mw'emilera-ngolo, barhahuma kabishi cikwone kukâlengere badera ebirhabayerekiri. ¹² Yumvagi oku rhumuhûnire n'oku rhumuhânwire mwakajira bantu ba mwene abo omw'izino lya Nyakasane Yesu kristu: mubahanûle bakâkola lyo bacîlamya bone. ¹³ Cikwone bene wirhu, murhalekaga okukâjira aminja. ¹⁴ Erhi hakajira owabula bwajira nk'okw'ezi nyigirizo rhumuhîre muli aga maruba zidesire, munamuje ebulâbi, n'irhondo murhacishangiraga naye lyo enshonyi zimurhangula. ¹⁵ Cikwone murhamuhindulaga mushombanyi, ci munakâmurhonda nka mwene winyu. ¹⁶ Nyakasane w'omurhûla yene amuhe amurhûla ngasi mango na muli ngasi lugero. Nyakasane abe haguma na ninyu mweshi. ¹⁷ Niene Polo nyandisire ebi binwa, na mmulamusize! Lolagi oku nsinyize, mulolage n'omwandiko gwani! ¹⁸ Olukogo lwa Nyakasane yezu Kristulube haguma na ninyu mweshi!