¹ Nie Pol, rhuli rhweshi na Silvano na Timoteyo. Aga maruba ngarhumîre Omurhwe gw'Abakristu b'e Tesanoliki, bantu ba Nnâmahanga Larha na ba nyakasane Yezu kristu. ² Olukogo n'omurhûla gwa Nnâmahanga larha na Nyakasane Yezu Kristu bibe haguma na ninyu. ³ Rhugwasirwe okukâvuga Nnâmahanga omunkwa burhahusa erhi mwe murhuma bene wirhu bakristu. Kushinganine rhujire ntyo, bulya obwemere bwinyu bugenderire bwenene, n'obuzigire ngasi muguma muli mwe agwerhe oku wabo bugenderire bwayushûka. ⁴ Co cirhumire rhuli rhwamwikungira omu Mirhwe y'Abakristu ba Nnâmahanga,n'oku mugenderire okusimika n'okuyorha n'obwemere omu kagarhi ka ngasi mababale n'omu malibuko muli mwabona. ⁵ Okwo kwo kuyerekine oku Nnâmahanga atwa olubanja nk'oku bishanganine, ebyo byoshi muli mwalembera byo byarhuma mwakwanana obwami bwage, bula bwami muli mwalibukira. ⁶ Bulya Nnâmahanga ajira ebishinganine. Abo bantu bali bamulibuza abagalulira amalibuko, ⁷ ninyu mwe muli mwalibuka amurhâmula, na nirhu. Ajira ntyo hano nyaqkasane Yezu Kristu ayisha kurhenga e mpingu. Ago mango erhi ali boshi na bamalahika* bageb'obuhashe. ⁸ Abonekana omu muliro gw'engulumira. Ayisha alihana abarhayishi Nnâmahanga na balya barhayumva oku Emyanzi y'Akalembe eyerekire Nyakasane Yezu adesire. ⁹ Abôla bayish'ihâbwa obuhane bw'okukangwa n'okuhererekera ensiku n'amango, kuli na nyakasane n'irenge ly'obuhashe bwage, ¹⁰ okulusiku ayisha mpu akuzibwe omu bimana bage, anabe cirhungazo omu ngasi bamuyemire boshi. ninyu mwayemire oburhumisi bwirhu! ¹¹ Okwo kwo kurhuma rhurhahusa bwamusengerera, nti Nnâmahanga wirhu amujire bantu bakwanine kuli eci amuhamagalîre, ayujuze n'emihigo yinyu n'obuhashe, yw'erya mihigo y'okujira aminja n'emikolo y'obuyemere bwinyu, ¹² na ntyo izino lya Nyakasane Yesu likuzibwe muli mwe, ninyu mukuzibwe muli lyo, oku lugero lw'olukogo lwa Nnâmahanga wirhu Yezu Kristu.