1 Abimeleki mwana wa Yerub Baala eluta kwa akwao banyina ku Sekemu ndipo eciti ku mkoka onse wanyina, 2 ''Napapata nena teti, koteto kuti asogoleli onse mu Sekemu bamvwe, 'Cabwino nicinji kwa mweo, kuti bana onse sevente ba Yerub Baala akulamulileni kapena umozi tyala akulamulileni?' Mkumbukile kuti nine fupa yanu na m'nyofu wanu.'' 3 Akwao banyina eciyomulabilila kwa asogoleli baku Sekemu, ndipo bevomela kunkha Abimeleki, pakuti beciti, ''Ni m'nekwasu.'' 4 Bemupasa ndalama ya siliva sevente za mu ng'anda ya Baala- Beriti, ndipo Abimeleki ezigwilisha nchito kulemba banthu baliye kanthu ndipo baliye ulemu kuti balutenaye paulendo wake. 5 Abimeleki eluta ku ng'anda yawisi ku Ofiri, ndipo pa mwala umozi epaya anekwao sevente, bana ba Yerub Baala. Yotamu yeka ndiye esala, mwana mtontho ngako wa Yerub Baala, pakuti enzebisama. 6 Asogoleli onse ba Sekemu nabaku Beti-Milo bewela pamozi, nakumuika Abimeleki pa ufumu, m'mbali mwa nthundu pafupi na cipilala cili mu Sekemu. 7 Yotamu peuzyiwa za izi, eluta kuyopanama pa lupili la Gerizimu. Mokuwa eciti kwa beve, ''Mvwani kwaneo, mweo asogoleli bamu Sekemu, kuti Mulungu akumvweni mweo. 8 Vimiti sikuliyakine veciyozoza mfumu, ndipo veciti kwacimuti ca azitona, 'Unkhale mfumu yasu' 9 Koma cimuti ca azitona ceciti, 'Ko nileke mafuta yangu, yakulemekezeka nayo milingu na banthu, kuti niwele nakupatukila ku vimiti viyakine?' 10 Vimiti veciti ku cimuti ca mkuyu, 'Wela unkhale mfumu yasu.' 11 Koma cimuti ca mkuyu cecti, 'Ko nileke kunzuna kwangu nakuwama kwa vipaso vangu, kuti nipatukile ku vimiti viyakine?' 12 Vimiti veciti ku cimuti ca mpesa, 'Wela unkhale mfumu yasu.' 13 Cimuti ca mpesa ceciti, 'Ko nisiye vinyo wangu walomba, ukondwelesha milingu na banthu, nakuwela kuzopatukila ku vimiti viyakine?' 14 Ndipo vimiti vonse veciti ku cimuti ca minga, 'Wela unkhale mfumu yasu' 15 Cimuti ca minga ceciti ku vimiti, 'Ngati nicendi mufuna kunizoza kuti ninkhale mfumu yanu, kansi welani munkhale mu cifwile cangu. ngati niteto lini, lekani mulilo ufume mucimuti ca minga ushoke mikunguza yonse ya Lebano.' 16 Mwaici, ngato mwacita moona ndipo mwaungilo, pemweika Abimeleki kunkhala mfumu ndipo ngati mwacita bwino zokhuza Yerub Baala na ng'anda yake, ndipo ngati mwamulanga mwenzofunikila- 17 Ganizani atata ekumenyerani nkhondo, etaya moyo wao, nakukulondeshani m'manja mwa Amidiani- 18 koma lelo mwakukira ng'anda yatata, nakupaya bana bao, banthu sevente, pa mwala umozi. Lomba mwatola Abimeleki mwana wa wanchito wao, kunkhala mfumu wa asogoleli ba Sekemu, pakuti nimkwanu. 19 Ngati mwecita moona ndipo na nzeru pa Jrub Baala na ng'anda yake, mukondwele mwa Abimeleki, naye akondwere mwa mweo. 20 Koma ngati teto lini, lekani mulilo ufume mwa Abimeleki na kushoka madoda ya Sekemu na Beti Milo. Lekani mulilo ufume mu madoda ya Sekemu na Beti Milo, ushoke Abimeleki.'' 21 Yotamu mwalubilo eutuka, eluta ku Beeri. Enkhala kwamene kula ndaba kwenze kutali na Abimeleki, mkwauo. 22 Abimeleki elamulila Aisraeli kwa vyaka vitatu. 23 Mulungu etuma mzimu uyipa pakati pa Abimeleki na asogoleli ba Sekemi. Asogoleli ba Sekemu becita mosakhulupilika kwa Abimeleki. 24 Mulungu ecita teto kuti ciyipa cecitira pa bana sevente ba Yerub Baala kuti ciwezyelewe, nakuti Abimeleki mnekwao ankhale na mulandu wobapaya, na madoda ba Sekemu kuti bapasiwe mulandu pakumuthandiza kupaya anekwao. 25 Teto asogoleli ba Sekemu beika madoda palupili kuti amkate, ndipo beibila munthu aliyense epitila njira ila. Abimeleki euzyiwa za ici. 26 Gaala mwana wa Ebedi na azinekwao beluta ku Sekemu. Asogoleli baku Sekemu bemukhulupilila. 27 Beluta ku munda kuyotyola mpesa, ndipo befinya vinyu. Benze na madyelelelo mu ng'anda ya mulungu wao, ndipo becilya nakumwa, nakuyamba kutembelela Abimeleki. 28 Gaala mwana wa Ebedi, eciti, ''Nanga Abimeleki nibani, ndipo Sekemu nibani, kuti tikomtumikila? Ko simwana wa Yerub Baala? Ko Zebilu sindiyekazembe wake? Titumikire madoda ya Hamori, awisi ba Sekemu! Titumikile Abimeleki ndaba cinji? 29 Sembe tyala aba banthu benze mu ulamulilo wangu, ngeni tamcosa Abimeleki. Ningamuuzye Abimeleki kuti, 'Ita gulu lako lonse la nkhondo.''' 30 Lomba Zebulu, Kazembe wa m'mzinda pecimvwa mau ya Gaala mwana wa Ebedi ekalipa ngako. 31 Etuma athenga kwa Abimeleki kuti amunyengezye, kuti, ''Ona, Gaala mwana wa Ebedi na azinekwao akuza ku Sekemu, ovundula mzinda kuti ukile weo. 32 Lomba, muuke usiku, weo na asilikali bako, konzekani kubakata m'minda. 33 Lomba m'mawa, zuba likangofuma, muuke msanga nakuloba m'mzinda. Yeve na banthu bake pabakuza kwako, baciteni cili conse cumufuna.'' 34 Teto Abimeleki euka usiku, yeve na madoda onse benze nao, ndipo bekhazya mu Sekemu- ebagaba magulu folo. 35 Gaala mwana wa Ebedi eluta kuyopanama pa mulyango wa mzinda. Abimeleki na madoda benzenao besokoloka kwebenzebebisama. 36 Gaala peona madoda bala, eciti kwa Zebulu, ''Ona, madoda oseluka kufuma palulu pa lupili!'' Zebulu eciti kwa eve, ''Uona vimvwili-vwili pa lupili monga ni banthu.'' 37 Gaala elabila soti nakuti, ''Ona, madoda oseluka ndipo balipakati pa mzinda, ndipo gulu imozi luwelela kunjira yaku nthundu zaamesenga.'' 38 Ndipo Zebulu eciti kwa eve, ''Nanga mau bako ozitukumula yalikuni? weo wenzonena kuti, 'Abimeleki nibani kuti timtumikile?' Ko bala sindiye madoda bewenzopepula? Nkhoya lomba ukatimbane nao.'' 39 Gaala eluta ndipo enzosogolela madoda ba Sekemu ndipo belimbana na Abimeleki. 40 Abimeleki empitikisha, ndipo Gaala eutuka. Anyinji bepona na vilonda vikulu ngako pa mulyango wa mzinda. 41 Abimeleki enkhala mu Aruma. Zebulu epilikisha Gaala pamozi na azinekwao kufuma mu Sekemu. 42 M'mawa mwake, banthu bamu Sekemu beluta m'munda ndipo za ici bemuuzya Abimeleki. 43 Etola banthu bake nakubagaba magulu atatu, bebisama m'minda. Elanga nakuona kuti banthu akuza kufumila m'mzinda ndipo ebaukila nakubapaya. 44 Abimeleki na magulu benzenao bepanama nakuvala pa mulyango waku mzinda. magulu yayakine yabili yeukila onse benze m'munda nakubapaya. 45 Abimeleki enyatana na bam'mzinda zuba lonse. Elonda mzinda nakupaya banthu benzemo. Ndipo ephwanya vipupa va mzinda nakuwazyamo munyu. 46 Asogogleli onse a nsanja ya Sekemu pebecimvwa za ici, beloba mkati-kati mwa ng'anda ya Eli-Beriti. 47 Abimeleki euzyiwa kuti asogoleli onse basonkhana pamozi ku nsanja yaku Sekemu. 48 Abimeleki eluta ku lupili la Zamoni, yeve na madoda yonse benzenao. Abimeleki etola katemo nakutenda misambo. Eika pa phewa yake nakulamula madoda benzenao kuti, ''Mwaona cinji canacita, yendeshani ndipo citani mwanacitila neo.'' 49 Teto aliyense etenda misambo nakukonkha Abimeleki. Beyiunjika ku cipupa ca nsanja, nakuishoka, teto banthu onse benze mu nsanja ya Sekemu becifwa nao, banthu okwana wanu sauzande analume na anakazi. 50 Ndipo Abimeleki eluta ku Thebezi, ndipo nakuumangila msasa nakuulonda. 51 Koma mwenze nsanja yolimba m'mzinda, ndipo onse analume na anakazi na asogoleli amumzinda beutikila mwamene nakuzivalila mkati. Ndipo bekwela kululu kwa mtenge wa nsanja. 52 Abimeleki ewela ku nsanja nakucita nkhondo. ndipo ewela pafupi na ciseko ca nsanja kuti ashoke. 53 Koma mwanakazi muyakine eponesha mphero pa mutu pa Abimeleki ndipo yephwanya mutu wake. 54 Ndipo mwamsanga-msanga eita m'nyamata enzonyamula vida vake, ndipo eciti kwa eve, ''Solola mkonndo wako unipaye, osati muyakine akalabile, 'Mwanakzi ndiye emupaya.''' Teto m'nyamata wake emugwaza, ndipo nakufwa. 55 Madoda ba Aisraeli pebeona kuti Abimeleki wafwa, beluta kumang'anda. 56 Teto Mulungu ewezyela kuipa kwa Abimeleki kwecitila awisi pepaya azinekwao sevente. 57 Mulungu ecita kuipa konse kwa madoda ba Sekemu kuwelela pa mitu yao ndipo pabeve pwewla temberero la Yotamu mwana wa Yerub Baala.