¹ Pecifwa Abimeleki Tola mwana wa Puwa mwana wa Dodo, lidoda lufumila mwa Isakara enzonkhala mu Samiri, ku chalo ca mumalupili ya Efulemu, enyamuka kuzopulumusha Aisraeli. ² Eweluza Aisraeli vyaka twente-fili. Ecifwa nakuikiwa ku Samiri. ³ Ekokhewa na Yairi mu Gileadi. Eweluza Aisraeli vyaka twente-thu. ⁴ Enze nabana analume sate benzoyendela pa abulu sate, ndipo benze na mizinda sate, yuitiwa Havoti Yairi mpakana lelo, yamene ili mchalo ca Gileadi. ⁵ Yairi ecifwa ndipo eikiwa ku Kamoni. ⁶ Aisraeli beonjeza viipa vecita pameso pa Yehova ndipo benzopembeza Baala na Asitoreti, milungu ya Aramu, milungu ya Sidoni, milungu ya Moabu, milungu ya banthu ba Amoni, na milungu ya Afilisiti. Besiya Yehova nakuleka ku m'mpembeza. ⁷ Yehova ekalipa nao Aisraeli ndipo ebagulisa m'manja mwa Afilisiti na manja mwa Amori. ⁸ Ebadyakilila nakubapondelezya Aisraeli caka cila, ndipo kwa vyaka eitini ebapondelezya onse bana ba Aisraeli benze kusilya kwa Yorodani mu chalo ca Amori, mu Gileadi. ⁹ Ndipo Amori betauka Yorodani kuzocita nkhondo na Yuda, Benjamini, na ng'anda ya Efulemu, kwakuti Aisraeli evutika ngako. ¹⁰ Ndipo Aisraeli belila kwa Yehova, nakuti, ''Takucimwilani, pakuti tasiya Mulungu wasu nakupembeza Baala.'' ¹¹ Yehova eciti kwa Aisraeli, ''Niliyekupulumusheni kwa Aigupto, kwa Amori, kwa Amoni, kwa Afilisiti, ¹² ndipo soti nakwa Sidoni? Amaleki na Maoni enzokupondelezyani mweo; mwelilila kwa neo ndipo nekupulumushani ku mphamvu yao. ¹³ Koma mwanisiya soti nakuyamba kupembeza milungu iyakine. Mwa ici, nipitilizye lini kuonjeza nthawi yokupulumushani. ¹⁴ Nkhoyani kalilileni kwa milungu yamupembeza. Lekani ikupulumusheni mkankhala m'manzunzo.'' ¹⁵ Aisraeli beciti kwa Yehova, ''Tacimwa. Mucite nase camwaona kuti nicabwino kwanu. Koma tapapata, tipulumusheni lero.'' ¹⁶ Becosa milungu yacilwendo pakati pao nakupembeza Yehova. Teto Yehova aliyefune kuti Aisraeli azunzike soti. ¹⁷ Amori besonkhana pamozi nakumanga msasa mu Gileadi. Aisraeli bewela pamozi nakumanga msasa ku Mizipa. ¹⁸ Asogoleli ba Gileadi beciti pakati pao, ''Nibani watiayambe kucita nkhonda na Amori? Ndiye watiankhale msogoleli pa onse onkhala mu Gileadi.''