¹ Lomba Yefita mgilieadi enze wankhondo wamphamvu, koma yenze mwana wa hule. Gileadi ndiye enze awisi. ² Mkazi wa Gileadi emvyalila soti bana bayakine banalume, Bana banalume ba mkazi wake pebekula, bemiplikisha Yefita nakuti kwa eve, ''Siutolapo ciliconse pa banja lasu. Niwe mwana wa mwanakzi muyakine.'' ³ Teto Yefita eutuka kufuma kwa azinekwao ndipo eciyonkhala mu chalo ca Tobu, ndipo banthu osasunga malamulo bewela nakuluta naye Yefita. ⁴ Pepepita masiku, Amoni becita nkhondo na Aisraeli. ⁵ Pebecita nkhondo Amoni na Aisraeli, akulu-akulu ba Gileadi beciyomtola Yefita ku chalo ca Tobu. ⁶ Beciti kwa Yefita, ''Wela unkhale msogoleli wasu kuti ticite nkhondo na Amoni.'' ⁷ Yefita eciti kwa asogoleli ba Gileadi, ''Mwenizonda neo nakunipilikisha kunifumya mu ng'anda yatata. mwewelelanji kwaneo lomba ndaba muli m'manzunzo?'' ⁸ Akulu-akulu ba Gileadi beciti kwa Yefita, ''Ndiye cifukwa cake tawelela kwa weo lomba; wela tinyate nkhondo na Amoni, ndipo unkhale msogoleli wa onse onkhala mu Gileadi.'' ⁹ Yefita eciti kwa akulu-akulu ba Gileadi, ''Mkaniwezya soti kwasu kuzocita nkhondo na Amoni, ngati Yehova watipasa cigonjeso pa beve, ninkale msogoleli wanu.'' ¹⁰ Akulu-akulu ba Gileadi beciti kwa Yefita, ''Lekani Yehova ankhale mboni pakati pasu ngati sitzacita mwatanenera!'' ¹¹ Teto Yefita elutanawo akulu-akulu ba Gileadi, ndipo banthu bemuika kunkhala msogoleli na mkulu wa nkhondo wao. Penzepameso ya Yehova ku Mizipa, Yefita ewelezyapo malonjezano onse bepanga. ¹² Ndipo Yefita etuma athenga ku mfumu ya banthu ba Amoni, kuti, ''Nanga kukangana uku nikotyani? Mwawelelanji na mphamvu kuzotola chalo casu?'' ¹³ Mfumu ya Amoni yeyankha athenga ba Yefita kuti, ''Pakuti Aisraeli pefuma mu Igupto, belonda chalo cangu kuyambila ku Anoni kuluta ku Yaboki, mpaka ku Yorodani. Lomba tipaseni chalo ico mwamtendere.'' ¹⁴ Yefita etuma soti athenga ku mfumu ya Amoni, ¹⁵ ndipo eciti, ''Ici ndiye cakulabila Yefita: Aisraeli aliyotole chalo ca Moabu na chalo ca Amoni, ¹⁶ koma bewela kufuma ku Igupto, ndipo Aisraeli epita mcipululu kuzela ku nyanja Isweta mpaka kuyofika ku Kadesi. ¹⁷ Aisraeli petuma ndipoku mfumu ya Edomu, kuti, 'Tapapata tiloleni tipitileko mchalo canu, mfumu ya Edomu iliyekumvwe. Betuma soti atthenga ku mfumu ya Moabu, koma yekana. Teto Aisraeli bankhala ku Kadesi. ¹⁸ Ndipo bepetila mcipululu nakulamblala chalo ca Edomu na chalo ca Moabu, ndipo bepitila caku m'mawa kwa chalo ca Moabu nakuzomanga msasa kumbali kwa Anoni. Koma baliyelobe mu chalo ca Moabu, ndaba Anoni yenze m'malile ya Moabu. ¹⁹ Aisraeli betuma attenga kwa Sihoni, mfumu ya Amori, enzolamulila mu Hesiboni; Aisraeli beciti kwa eve, 'Tapapata, lekani tipitileko mu malo yanu kuya ku malo yasu.' ²⁰ Koma Sihoni aliyekhulupilile Aisraeli kuti apitile mchalo cake. Teto Sihoni esonkhanisha gulu lake lonse la nkhondo nakubatwala ku Yahazi, ndipo kwamene kula ecita nkhondo na Aisraeli. ²¹ Lomab Yehova, Mulungu wa Aisraeli, epeleka Sihoni na banthu bake onse m'manja mwa Aisraeli ndipo ebagonjesa. Teto Aisraeli elonda chalo conse ca Amori benzonkhala mchalo cila. ²² Betola ciliconse cenzem'malile mcalo ca Amori, kufumila ku Anoni mpaka ku Yaboku, na kufumila ku cipululu mpaka ku Yorodani. ²³ Teto Yehova, Mulungu wa Aisraeli, epilikisha Amori pameso ya Aisraeli banthu bake, lomba lelo mufuna tola chalo cao? ²⁴ Ko simutola chalo camene Kemoshi, mulungu wanu, wakupasani? Teto malo yaliyonse yawatipasa Yehova Mulungu wasu, tutola. ²⁵ Lomba teti mweo munamphamvu ngako kuposa Balaki mwana wa Zipori, mfumu ya Moabu? Ko eyesapo kukangana na Aisraeli? Enze citapo nkhondo nawo? ²⁶ Aisraeli penkhala kwa vyaka fili handiledi mu Hesiboni na m'minzi yao yonse, namu Aroeri na minzi yake, na mizinda yonse yili mbali mwa Anoni- mwelekelanji kubawelezya pa nthawi yamene ila? ²⁷ Paliye ciyipa canakucitani, koma munilakwila pamunyatana naneo. Yehova, oweruza, asankhe lelo pakati pa Aisraeli na banthu ba Amoni.'' ²⁸ Koma mfumu ya Amoni yekana cenjezo yetumizya Yefita kwa eve. ²⁹ Ndipo mzimu wa Yehova wewela pa Yefita, epata ku Gileadi na Manase, nakupitila ku Mizipa yaku Gileadi, ndipo kufumila ku Mizipa yaku Gileadi epitilira mpaka ku banthu ba Amoni. ³⁰ Yefita elumbila kwa Yehova ndipo eciti, ''Ngati mwanipasa chigonjeso pa Amoni, ³¹ ndiyekuti ciliconse caticikafume pamulyango wa ng'anda yangu kukumana nane nikawelela m'mtendere kucokera kwa Amoni cikankhale ca Yehova, ndipo nikacipeleke ngati nsembe yoshoka.'' ³² Teto Yefita epita mpaka kwa Amoni emenyana nao pa nkhondo, ndipo Yehova empasa chigonjeso. ³³ Ebanyata ndipo anyinji bepayiwa kufumila ku Aroeri mpaka ku Miniti- mizinda twente- kufikila mpaka ku Abelo Keremim. Teto Amoni begonjesewa na Aisraeli. ³⁴ Yefita ewela ku ng'anda kwake ku Mizipa ndipo mwana wake mwanakazi efuma kuzokumana naye namalingaka nakuvina. ndiye enze mwana wake yeka tyala, enzeve mwana muyakine kapena mwanalume kaya mwanakazi. ³⁵ Pemuona tyala, eng'amba vovwala vake nakuti, ''Aaa! mwana wangu! Wanisasantha na cifundo, wankala umozi woniphyesha mtima! Pakuti nasegula kamwa kangu kwa Yehova ndipo siningawelele pa lonjezo langu.'' ³⁶ Mwana eciti kwa eve, ''Atata, mwalumbila kwa Yehova, citani pa neo ciliconse cemwelonjeza, pakuti Yehova wakuwezyelani cilango pa adani banu, Amoni.'' ³⁷ Eciti kwa awisi, '' Lekani lonjezo inkhale pa neo. Nilekeni ninkhale neka kwa miyezi ibili, kuti nilute kumalupili kuyolilila unamwali wangu, neo na ayangu.'' ³⁸ Eciti, ''Nkhoya.'' Emuuzya kuti abekuya kwa miyezi ibili. Eluta, yeve nabayake, ndipo bemulila unamwali wake m'malupili. ³⁹ Kosilizyila kwa miyezi ibili, ewelela kwa awisi ndipo ecitanaye kulingana na lonjezo la lambilo lepanga. Lomba aliyelalepo namwanalume, ndipo wenkhala mwambo pa Asraeli ⁴⁰ cakuti bana anakazi ba Asraeli cakaciliconse, kwa masiku folo, benzolabila nkhani za mwana mwankazi wa Yefita m'Gileadi.