¹ Apwiya yahun'himerya Moise ni Aroni. Awo yahira: ² ''Mw'atthu a Levi mwalepe atthu a nloko na kehathi, ni maloko aya n'axitithi aya ni omutji aya. ³ Mwalepe alopwana otene okhuma iyakha miloko miraru mpakha iyakha miloko mithanu. Alopwana awo ahana okela wira evareke nteko N'hemani mokumana. ⁴ Otjulu wa kehathi etjukeke tjitthu tjowarya, tjithanleliye Miyo, M'hemani mokumana. ⁵ Okathi onrwiinyu olikanyiha nkwaha , Aroni n'asanawe ekele N'hemani, ethomole ekuwo yulupale envalanya nipuro nowaryexa ni nipuro nowarya, ni e enkhunela nivuku nowatana. ⁶ Awo vatjulu vaya yatale ekettekha yovivyala -- yolipa ni ekhunele tjotene n'ikuwo yorika yopipila evirihe mithatelo tja nivuku m'maniyani wira ethateliyekeno. ⁷ Wametja a mikatthe tjovaha yatale ekuwo yorika yopipila. Wametja vavo, yintjathi iparatho, ikulyeri, ithalu, ni ixaro wira ivaheriyeke tjovaha. Mikatthe tjikhaleke wametja vavo. ⁸ Yatalevo ekuwo yoxerya yoripa, yatalevo-tho ekattakha yovivyala ni yolipa, evirihe mithatelo m'maniyani a metja awo wira ethateliyekeno. ⁹ Ekuse ekuwo yopipila ekhunele mwiri wa mithuko, wamotja ni mithuko tjaya, ni tjitthu tjotene tjinrumela , ni mirinki tja makhura a mithuko . ¹⁰ Awo ehele mwiri wa mithuko ni tjitthuntjotene tjinrumela mwintjakoni mwa ekattakha yovivyala--yolipa. ¹¹ Vatjulu v'altari a wero yatalelevo ekuwo yorika yopipila n'ikattakha yorika--yovivyala, vottharelana, evirihe mithatelo tjothatelaniya. ¹² Awo ekuse tjitthu tjotene tjinvaliya nteko nipuro nowarya ni ehele mwintjakoni mwa ekuwo yorika yopipila, wira ekhunele n'ikattakha yovivyala--yorika ni yintjathi vanrepani. ¹³ Awo ekumihe etturwa v'altari a mikuttho ni yatale v'altari vavo ekuwo yorika yoxerya. ¹⁴ Yintjathi-vo tjitthu tjotene tjinrumela nkuttho: ikamela tja etturwa, ikarufu, ipotjolo, ititjela ni tjitthu tjotene tjinrumela v'altari vavo. Ni mwatale v'altari vavo ekattakha yovivyala--yorika, numala, evirihe mithatelo tjothateliyanao altari awo. ^{15 16} Okathi Aroni n'asanawe am'maliheryaya okhunela nipuro nowarya ni tjitthu tjotene tjinrumela, ni onlikanyihiyaya nkwaha, nave otjulu wa Kehathi ahana ahana okusa nipuro nowarya. Awo yavara tjitthu tjitthu tjowarya, anukhwa. Ola nteko w'otjulu wa Kehathi, w'othata tjitthu tjinrumeliya N'hemani mokumana. Eliyazari, nwana a nlipa a nkuttho Aroni, akuse makhura a mithuko. Owo ohana oweha-weha othatiya waya erupani yowunkhela , otthu onvahiya khula nihuku, makhura ottikitthela, atjukeke Empa y'Apwiya ni tjotene tjinkhala mwem'mo, ¹⁷ Apwiya yahun'himerya Moise n'Aroni. Awo yahahimerya: ¹⁸ ''N'hatthuniherye wira atthu a nloko na Kehathi ekumihiye mwinlokoni mw'alevi. ¹⁹ Mwapatjopeke, wira awo ekhale akumi ni ehikhwe mwiraka tjo. Okathi awo onattam'aya tjitthutjireriheliya Apwiya, ²⁰ awo ehikele mpani oweha niouro nowarya, n'nakhala etthu emotja wa okathi vakhani, yira tjitjo, anukhwa. Aroni n'asanawe tantthuna oklaka mpani. Ala takhalale mulumo yahimeriyaya wa khula ntthu a nloko na Kehathi ntoko ekettelo awe, yolamalel'awe yotthuneyexa''. ²¹ Apwiya yahinlavuliha-tho Moise. Awo khun'himerya: ²² ''Mwalepe-tho atthu a nloko na Gerixoni, ntoko tjiryaya omutji aya ni maloko aya. ²³ Mwalepe alopwana otene arina iyakha miloko miraru mpakha iyakha miloko miraru. Mwalepe otene akelale nteko wira evareke nteko N'hemani mokumana''. ²⁴ Nteko wa nloko na Gerixoni arinaya ovara n'itthu tjirinaya othata tin'ya. ²⁵ Awo ahana othata ikuwo tja mpani mw'Apwiya, Ehema yokumana, n'ikhunelelo aya, ekhunelelo ya ekattakha yovivyala--yorika n'ikuwo ya vankhora va Ehema yokumana. ²⁶ Awo ethateke-tho ikuwo tja kako, n'ikuwo tja vankhora va nikokoro, yattamelale Empa y'Apwiya ni altari, ni mikhoyi tjaya, ni tjitthu tjotene tjinrumela nteko aya. Tjen'yo tjivahiyaya wira evareleke nteko aya mwa tjitthu tjen'yo. ²⁷ Aroni nasanawe ettiheryeke nteko wotene wa otjulu wa Gerixoni, mwa tjitthu tjotene awo tjiniraya ethateke, ni mwa miteko tjaya tjotene. Nyuwo mwakawele miteko n'itthu tjirinaya othata. ²⁸ Nteko w'atthu a nloko na Gerixoni mwaha w'Ehema yokumana. Itamari, mwana Aroni, nlipa a nkuttho, onuwettiherya ovara nteko. ²⁹ Nyuwo mwalepe-tho atthu a nloko na Merari ni maloko aya, ni ntoko tjiryaya ni omutji aya ni axitithi aya, okhuma iyakha miloko miraru mpakha iyakha miloko mithanu. ³⁰ Mwalepe wa khula ntthu wira etakanihane n'atthu orumelaka N'hemani mokumana. ³¹ Nteko aya atthu awo wophaveleyaxa arinaya ovarelaka N'hemani mokumana tula. Awo ahana othataka mirerelo tja Mpani mw'Apwiya, ithapwa tjotuphiha tja N'hemani, maripi aya n'ivarelelo tjaya, ³² vamotja ni maripu anrukurerya niyate orukurerya Empa yotene y'Apwiya, ni miyemetjeryo tjaya, n'ivarelelo tjaya, ni mikhoyi tjaya, ni tjitthu tjotene tjinrumela tjen'yo. Nlepe matjina aya tjitthu tjotene tjirinaya othata. ³³ Tula nteko w'atthu a nloko na Merari, awo arinaya ovara N'hemani mokumana, nimwatjaka Itamari, mwana Aroni, nlipa a nkuttho. ³⁴ Moise, Aroni, ni Makhulupale a maloko yahalepa atthu a nloko na Kehathi, ni maloko aya n'axitithi aya ni omutji aya. ³⁵ Awo yahalepa atthu yale yarina iyakha okhuma miloko miraru mpakha iyakha miloko mithanu. Awo yahalepa atthua otene yatakanihanale wira evareleke nteko N'hemani mokumana. ³⁶ Yahilepiya atthu yaphiyererya ikonto pinli, n'imiya thanu napinli ni miloko mithanu mwinlokoni mwaya. ³⁷ Moise ni Aroni yahalepa alopwana otene mwinlokoni mwaya ni omutji aya a nloko na Kehathi yarumela N'hemani mokumana. Iraka tjitjo, awo yahinwelela mulumo Apwiya, yan'himeralyaya Moise, yanrumalyaya wira avare. ³⁸ Atthu a nloko na Gerixoni yahilepiya ni maloko aya, n'axitithi aya ni omutji aya, ³⁹ okhuma iyakha miloko miraru mpakha iyakha miloko mithanu, otene yale yathanliye ovarela nteko N'hemani mokumana. ⁴⁰ Alopwana otene yalepiye ni maloko aya ni omutji aya n'axitithi aya, watta waya yari ikonto pinli, n'imiya thanu namotja ni miloko miraru. ⁴¹ Moise ni Aroni yahalepa atthu a nloko na Gerixoni yarwaa orumelaka N'hemani mokumana. Iraka tjitjo, awo yahinwelela Apwiya yanrumalyaya Moise wira avare. ⁴² Maloko a Merari yahilepiya ni maloko aya n'otjulu w'axitithi aya wa khula omutji, ⁴³ okhuma iyakha miloko miraru mpakha iyakha miloko mithanu, otene yale yathanliye ovarela nteko N'hemani mokumana. ⁴⁴ Alopwana otene , yalepiye ni maloko aya n'axitithi aya ni omutji aya, watta waya yari ikonto ttharu n'imiya pinli. ⁴⁵ Moise ni Aroni yahalepa alopwana otene, a nloko na Merari. Iraka tjitjo, awo yahinwelela Apwiya yanrumalyaya Moise wira avare. ⁴⁶ Tjitjam'mo, Moise ni Aroni, ni Mkhulupale a'tthu a Israyeli, yahalepa atthu otene Alevi ni maloko aya ni omutji aya ni axitithi aya ⁴⁷ okhuma iyakha miloko miraru mpakha iyakha miloko mithanu. Awo yahalepa atthu otene yavara nteko Mpani mw'Apwiya, ni yarwaa othataka tjitthu tja N'hemani mokumana. ⁴⁸ Awo yahalepa atthu ophiyererya ikonto thanu na ttharu , n'imiya thanu ni miloko mithanu na ttharu. ⁴⁹ Ntoko Apwiya yanrumalyaya Moise, Moise ahalepa wa khula nlopwana, attharihelaka wa khula nteko akaweliyawe wa khula ntthu arwaawe ovaraka. Owo ahalepa wa khula ntthu atthariheliyaka ottittimiheya warinawe. Ni, iraka tjitjo, awo yahinwelela Apwiya yanrumalyaya, Moise wira avare.