¹ Ela ethale ya otjulu ya Aroni ni Moise, okathi Apwiya yalavulalyaya ni Moise omwako Sinayi. ² Matjina a'na Aroni tala Nadabi, mwana opasera oyariya, n'Abihu, Eleyazari ni Itamari. ³ Ala matjina a'na a Aroni, yattikittheliye makhura ni khuthanleliya ovara nteko w'onankuttho. ⁴ Nto Nadabi ni Abihu yahukhwa oholo w'Apwiya, okathi wavaheralyaya Apwiya moro wohirerihiya mothakoni m'Osinayi.Nadabi ni Abihu khiyarina a'na, vekhweli , Eleyazari n'Itamari yahivara nteko w'onankuttho ni Aroni atithi aya. ⁵ Apwiya yahinlavuliha Moise yiraka: ⁶ ''Mwawane atthu a nihimo n'alevi ni mwithonyiherye Aroni, nankuttho, wira awo enrumeleke. ⁷ Awo yahittharihela nteko aya wonrumela Aroni ni atthu otene, oholo wa ehema yokumana. ⁸ Awo yahikhapelela tjitthu tjotene tjinrumeliya n'hemani mokumana, ni yahikhaliherya maloko a'tthu a Israyeli, mwa miteko tja n'hemani. ⁹ Nyuwo mwakhalihe atthu a Levi arumeyi a Aroni nasanawe. Awo ekhale ovahiya evahereriyaka n'atthu a Israyeli. ¹⁰ Nyuwo mwinkhalihe Aroni n'asanawe ntoko nankuttho, nto akhala ntthu nkina ówa noniwattama Apwiya , onamokhwa''. ¹¹ Apwiya yahun'himerya Moise. yiraka: ¹² ''Miyo kihathanle aLevi variyari va atthu a Israyeli. Miyo kihira tjitjo, ohoya wathanlalyaka a'na otene axilopwana opasera oyariya variyari va atthu a Israyeli. aLevi ekhale awaka. ¹³ A'na otene opasera oyariya tawaka. Nihuku nawinvalyaka a'na otene opasera oyariya a nlaponi mwa Wixitu, Miyo kahathanla a'na otene opasera oyariya a'tthu a Israyeli wira ekhale awaka, okhuma atthu ni inama. Awo tawaka Miyo. Miyo k'Apwiya''. ¹⁴ Apwiya yahun'himerya Moise mothakoni m'oSinayi. Yiraka: ¹⁵ ''Mwalepe atthu aLevi ni omutji aya, n'tthoko tjaya ni axitithi aya. Mwalepe alopwana otene okhuma mweri m'motja mpakha oholo''. ¹⁶ Moise ahalepa, attharihelaka mulumo Apwiya yan'himeralyawe, ntoko Awo, Apwiya, yanrumalyaya. ¹⁷ Matjina á'na aLevi tala: Gerixoni, Kehati ni Merari. ¹⁸ Maloko yaphattuwale ni á'na a Gerixoni, tala Libini ni Ximeyi. ¹⁹ Molko yaphattuwale ni á'na a Kehati, tala Amarami, Sehari , Heboroni ni Uziyeli. ²⁰ Maloko yaphattuwale ni á'na a Merari tala Mahili ni Muxi. Ala yari maloko aLevi, yalepiye nloko ti nloko. ²¹ Mloko a Libini, nloko n'aXimeyi, ala ti maloko akhumale wa Gerixoni. ²² Alopwana otene okhuma mweri m'motja mpakha oholo yahilepiya ophiyererya ikonto miloko mithanu na pinli n'imiya thanu. ²³ Maloko a Gerixoni yanimaka, mphantti w'onikela ntjuwa w'empa y'Apwiya. ²⁴ Eliyasafi, mwana a Layeli ari n'holeli a maloko o'tjulu wa Gerixoni. ²⁵ Amutji a Gerixoni yanikhapelela Ehema Yokumana, ehihiyaka-tho Empa y'Apwiya. Awo yanikhapelela Ehema, n'ikuwo tjakhunelaniyaya n'ekuwo ya vankhora va Ehema ya Nthukumano. ²⁶ Awo ahana okhapelela ikuwo tja kako a vate, n'ikuwo tja nkhora onkeliya vate, vari empa y'Apwiya ni orukurerya otjantuwariyo ni altari. Ni awo yahitthava mikhoyi tja N'hemani Mokumana ni mikhoyi tjimphaveleliya miteko tjaya ²⁷ Ala maloko akhumale wa Kehati: nloko n'Amarami, nloko na Yisehari, nloko na Heboroni, nloko na Uziyeli. Maloko ala akhumale wa Kehati. ²⁸ Alopwana yalepiye okhuma mweri m'motja mpakha oholo watta waya yari ikonto miloko mithanu na ttharu n'imiya thanu na motja, wira ekhapeleleke tjitthu tj'Apwiya. ²⁹ Amutji o'tjulu wa Kehati yanimaka mphantti w'okutsini wa Epa y'Apwiya. ³⁰ Eliyasafi, mwana a Uziyeli n'holeli a nloko na Kehati. ³¹ Awo yahikhapelela nuvuku, metja, mwiri wa mithuko, altari, ni tjitthu tjorerihiya tjinrumeliya mpani mw'Apwiya, n'ikuwo ni tjitthu tjotene tjinvareliya nteko. ³² Eliyazeri, mwana A'ronin nankuttho, ari nlopwana aholela Alevi. Owo animwettiherya nlopwana ari nkhulupale a nipuro nowarya. ³³ Maloko meli akhumale wa Merari: nloko na mahili ni nloko na muxi. Maloko ala akhumale wa erari. ³⁴ Alopwana yaepiye a mweri m'motja mpakha oholo watta waya yari ikonto miloko mithanu na motja n'imiya pini. ³⁵ Suriyeli, mwana a Ábihayili, n'holeli a nloko na Merari. Owo ahumaka mphantti w'onikela epheyo wa emp'eyo. ³⁶ Otjulu wa Merari wahivara nteko wowetetela empa y'Apwiya, yetetelaka ithapwa tjulupale, ithapwa tjotuphiha tjikhwaya, maripu, ni tjotene tjaphaveleliya ovareliya nteko, wo'wemexa ehema ³⁷ maripu anrukurerya niyte na empa eyo, ni miyemexeryo tjaya ni malipiheryo aya ni mikhoyi. ³⁸ Moise, n'Aroni n'asanawe yahumaka mphantti w'oholo w'Empa y'Apwiya, eyo piyo ohol w'Ehema yokumana, ephantti enikhuma ntjuwa. Awo yanivarela nteko wonankuttho evarelaka nipuro nowarya, nipuro n'atthu a Israyeli. Wa khula ntthu ówa ohikhalale nLevi ontthuna wattama nipuro nowarya onamokhwa. ³⁹ Moise ni Aroni yahalepa alopwana otene a nihimo na'Levi wun'nuwa waya yari a mweri m'motja mpakha oholo, ntoko Apwiya yarumalyaya. Awo yahalepa atthu ophiyererya ikonto miloko minli ni pinli. ⁴⁰ Apwiya yahun'himerya Moise wira : ''Mwalepe a'na otene a Israyeli opasera oyariya wuun'nuwa waya arina mweri m'motja mpakha oholo. Mwalepe matjina aya. ⁴¹ Nyuwo ,wavalanye na'Levi Alevi awo tawaka, ohiya-tho ána opasera oyariya a'tthu a Israyeli. Miyo k'Apwiya. Ni nyuwo n'valanye inama tjaya Alevi awo, ohiya wa inama tjopasera ototholiya tja otjulu w'atthu a Israyeli. ⁴² Moise ahalepa ána otene opasera oyariya a'tthu a Israyeli, ntoko Apwiya yanrumalya'ya. ⁴³ Owo ahalepa ána otene axilopwana opasera oyariya matjin'aya, a mweri m'motja mpakha oholo, otene yalepiye watta waya yari ikonto miloko minli ni pinli ni imiya pinli ni miloko mithanu na pinli ni ttharu. ⁴⁴ Apwiya yahunhimerya-tho Moise ekwaha yonapinli. Awo yahira : ⁴⁵ ''Mwavalanye aLevi otene awo tawaka, ohiya ána otene opasera oyariya a'tthu a Israyeli ni n'kivalanye-tho Miyo inama tjaya aLevi yawo, ohiya inama tj'atthu. Alevi awo tawaka Miyo. Miyo k'Apwiya. ⁴⁶ Nyuwo n'hana oliva miyavulo mithanu w'owopola wa khula ntthu a'tthu awo ikonto imiya pinli ni miloko mithanu na pinli ni ttharu w'ana opasera oyariya a'tthu aIsrayeli, an'navikana atthu a'Levi. ⁴⁷ Nyuwo n'naliva miyavulo tja otjantuwariyo n'livaka miyavulo tjonankuttho. Miyavulo iyo n'hana oliva ikhera miloko minli wa khula exekheli. ⁴⁸ Nyuwo nvahe etjitjapo yowopola nyuwo nlivalinyu Aroni n'asanawe''. ⁴⁹ Nto Moise ahuvaha etjitjapo yowopola atthu, ale yavikana alopwana a nloko na Levi. ⁵⁰ Moise ahakhelela ntjurukhu w'ana otene opasera oyariya a'tthu a Israyeli. Owo ahakhelela ikhera ekonto emotja n'imiya ttharu ni miloko mithanu na motja ni thanu , attharihelaka etjitjapo ya otjantuwario. ⁵¹ Moise ahunvaha Aroni n'asanawe ntjurukhu wakhelelalyawe. Moise ahira tjotene ahimeriyawe wira apake, mwa matju A'pwiya, ntoko Awo yanrumalyaya.