¹ Apwiya yahilavulatho vaneili ni Moise ni Aroni yiraka: ² ''Atthu otene a Israyeli ahana omaka khula ntthu mwinlokoni mw'anakhotto awe athukumanelaka ebandera ya nihimo nawe, ni ethonyeryo ya nihimo nawe. Etekeke maxaxaya erukureryeke ehema yokumana . ³ Yale ari a nihimo n'Ayuda etekeke maxaxaya erukureryeke ebandera y'Ayuda, mono w'op[heyoni wa ehema yokumana, mphantti wonikhuma ntjuwa.Nahaxoni,mwana a Aminadabi ontthuna okhala n'holeli a nloko n'Ayuda. ⁴ Nloko n'Ayuda narina alopwana ikonto miloko mithanu napili n'ixexe n'alopwana imiya thanu namotja. ⁵ Nihimo na Isakari emakeke mono w'Ayuda. Netaneli, mwana a Zuwari nkhulupale a nihimo na Isakari. ⁶ Anakhotto awe arina alopwana ophiyerya ikonto miloko mithanu ni tjese ni nimiya tjese. ⁷ Nihimo na Zabuloni ahana omaka mono wa nihimo na Isakari. Eliyabi, mwana a Heloni nkhulupale a'nakhotto a nihimo na Zabuloni. ⁸ Anakhotto awe arina alopwana yaphiyerya ikonto miloko mithanu ni thanu na pili ni imiya tjese. ⁹ Anakhotto yamakale vamotja n'ayuda, yari alopwana ophiyeryaka ikonto emiya emotja ni miloko mithanu nattharu ni imiya tjese. Awo ti yapaserale oteka maxax'aya. ¹⁰ Nihimo na Rubeni yahimaka mphantti w'onikela epheyo, erukureryaka ebander'aya. Elisuri, mwana a Xedewuri nkhulupale a'nakhotto a nihimo na Rubeni. ¹¹ Ahikhalana anakhotto awe ophiyerrerya alopwana ikonto miloko mitjese ni thanu namotja ni imiya thanu ¹² Nihimo na Simeyoni yahimaka mono wa nihimo na Rubeni. Xelumiyeli, mwana Xurusadayi nkhulupale a'nakhotto a nihimo na Simeyoni. ¹³ Anakhotto awe arina aloppwana ophiyererya ikonto miloko mithanu ni thanu na tjese ni imiya tharu. ¹⁴ Nihimo na Gadi yahimaka mphantti nkina. Eliyasafi, mwana a Deweli nkhulupale a'nakhotto a nihimo na Gadi. ¹⁵ Anakhotto awe arina alopwana ophiyererya ikonto miloko mitjese ni thanu ni imiya thanu namotja ni miloko mithanu. ¹⁶ Anakhotto yamakale vamotja m'maxaxani mwa nihimo na Rubeni, otene yari ikonto emiya emotja ni miloko mithanu ni m'motja ni imiya tjese ni miloko mithanu. Awo yari otthikela omaka. ¹⁷ Vottharelana, ehema yokumana enuvenya omaxaxani vamotja ni Alevi, eriyari ya maxaxa otene. Awo ahana ovenya omaxaxani ettharihelaka ekhalelo tjamakalyaya. Khula ntthu akhaleke nipuro nawe, vamotja n'ebanderawe. ¹⁸ A nihimo na Efrayimi emakeke mphantti w'onikela epheyo wa ehema yokumana. Elixama mwana a Amihudi nkhulupale a'nakhotto a Efrayimi. ¹⁹ Arina anakhotto awe ophiyererya alopwana ikonto miloko mitjese n'imiya thanu. ²⁰ A nihimo na Manase yahimaka mono wa nihimo na Efrayimi. Gamaliyeli, mwana a Padasuri nkhulupale a nakhotto a nihimona manase. ²¹ Arina anakhotto awe alopwana yaphiyererya ikonto miloko miraru ni pili n'imiya pili. ²² A nihimo na Beniyamini yahimaka mphantti nkina. Abidani, mwana a Gideyoni nkhulupale a'nakhotto a nihimo na Beniyamini. ²³ Arina anakhotto awe alopwana ophiyererya ikonto miloko miraru ni thanu n'imiya tjese. ²⁴ Anakhotto awo yahimaka vamotja n'atthu a nihimo na Efrayimi otene aya watta waya yari ophiyererya ikonto emiya emotja ni thanu nattharu ni emiya emotja. Awo yari onattharu omaka waya. ²⁵ Nihimo na Dani yahimaka mphantti w'onikhuma epheyo wa ehema, erukureryaka ebandera aya. Ahiyexeri mwana a Amixadayi, nkhulupale a'nakhotto a nihimo na Dani. ²⁶ Arina anakhotto awe alopwana ophiyererya ikonto miloko mithanu namotja n'aili n'imiya thanu napili. ²⁷ A nihimo na Axeri yahimaka mphantti wa nihimo na Dani. Pagiyeli, mwana Ókarani nkhulupale a'nakhotto a nihimo na Axeri. ²⁸ Arina anakhotto awe alopwana ophiyererya ikonto miloko mitjese ni m'motja n'imiya thanu. ²⁹ A nihimo na Nefetali yahimaka mphantti nkina. Ahira, mwana Enani nkhulupale a'nakhotto a nihimo na Nefetali. ³⁰ Arina anakhotto awe alopwana ophiyererya ikonto miloko miloko mithanu n'ikonto ttharu n'imiya tjese. ³¹ Anakhotto awo yahimaka vamotja ni maxaxa tj'atthu a nihimo na Dani otene aya watta waya yari ophiyererya ikonto emiya emotja ni miloko mithanu n'ikonto thanu napili n'imiya thanu namotja. Awo yari okitserya omaka ni ibandera tjaya''. ³² Ola mwattelo w'anakjhotto a Israyeli yalepiye ni maloko aya. Anakhotto otene yalepiye omaxaxani waya watta waya yari ophiyererya ikonto imiya thanu na motja n'ikonto ttharu n'imiya thanu ni miloko mithanu. ³³ Nto, Alevi khiyatakanihiye molepiyani m'mo n'atthu a Israyeli. Tjahiraneya tjitjo ntoko Apwiya yanrumalyaya Moise. ³⁴ Atthu a Israyeli yahira tjotene Apwiya yanrumalyaya Moise. Awo yahimaka yattamaka ebander'aya. Awo yahumaka ekaiwene miloko ni mahimo aya.