¹ Apwiya hahin'himerya Moise: ''Mwahimerye anankuttho, anaawe Aroni, wira: 'Ohikhale wa nyuwano ontthuna wiinanariha mwaaha wa atthu ookhwa, ² vohikhala m'mutji oowattamela - mayenyu ni tihitnyu, mwaninyu nlopwana ni nthiyana, ³ nrokorinyu ni n'himinyu harutji onkhale owan'nyinyu ni oohitheliya. Mwa awo mwiinanariheke. ⁴ Vano n'hinanarhe mwaha wa ntthu nkina, okhala wira mwamwinanariha nyenyu. ⁵ Anankuttho ahimettheke ikharari tjaya n'nakhala ereru aya, n'nakhala othikila erutthu enyu. ⁶ Awo ahaana ovanyiya wira anrumeeleke Muluku aya, ni wira attottopeke ntjina na Muluku, okhala wira anankuttho aniivaha nkuttho wa Apwiya, ephau ya Muluku aya. Nto anankuttho ahaana okhala oowarya. ⁷ Awo ahithelane ni nthiyana namararuwa n'nakhala natampi, ni awo ahithelane ni nthiyana omwalaniyeni awan'nyawe, okhala wira awo avalanyiya wira anrumeeleke Muluku aya. ⁸ Nyuwano n'haana waattittimiha ale anvaha nkuttho wa Muluku. Owo ohaana okhala oowarya oholo wenyu, okhala wira Miyano, Apwiya, koorelaliheni wa Miyano, Koowaarya. ⁹ Wakhula mwana a anankuttho ontthuna wiinanariha, oipakaka puta, khonaatittimiha atithi awe. Owo ohaana opahiya. ¹⁰ Ole ori nkhulupale a anankuttho eriyari ya axin'nyu, yoowo muru awe oniittheliya makhura ooreelihiya wira awareke ikuwo tjoowrya tja n'hooleli a nankuttho, ohihiyeke ikharari tjawe ota hata okhera ikuwo tjawe. ¹¹ Owo ahiroweke nipuro n'ri ntthu ookhwa ni wiinanariha, hata okhala atithi awe ni amayawe. ¹² N'hooleli a anankuttho ahikhumeke nipuro noowarya a otabernakulu hata onanariha enupa ya Muluku, okhala wira owo ohaana oreelihiya ni makhura owaarya a Muluku awe. Miyano ka Apwiya. ¹³ Nkhulupale a anankuttho ontheleke nthiyana harutji. Ohin'theleke namukhweli, hata nthiyana puta. ¹⁴ Owo ahithelaneke ni nthinto ola wa athiyana. Owo ohaana onthela nthiyana harutji a nloko nawe. ¹⁵ Tjitjam'mo khomuntthuna onveeha mwaninyu, okhala wira Miyano k'Apwiya, yoowo oneerelihani'''. ¹⁶ Apwiya ahin'himerya Moise, wira: ¹⁷ ''M'muhimrye Aroni wira: 'Wakhulu otjuulu a nloko nenyu ontthuna orakala nrutthuni mwawe, ohaattameke wira avahe ephau ya Muluku awe. ¹⁸ Ohikhale nlopwana oorakala ontthuna waattamela owattamela Apwiya, ntoko ntthu ohinoona, ¹⁹ wala nlopwana ohirina ikatha hata ilipwi, ²⁰ okhurupuwa hata ookhuveya, hata nlopwana ni eretta m'menthoni, ni eretta, owereya, nrala, hata ekhete yoorakala. ²¹ Ohikhale nlpwana wa nloko na Aroni, orina eretta nrutthuni ontthuna waattamela wira avahe nkuttho woopahiya wa Apwiya. Tjitjam'mo, nlopwana ookhala eretta nrutthuni, ohaattameleke wira avahe ephau wa Muluku awe. ²² Owo on'nirerela okhura ephau ya Muluku awe, hata yootepaxa warya ni yoowarya. ²³ Tjitjam'mo-tho, owo ahirowe woovikana malaya hata waattamela waltari, okhala wira owo oorakala nrutthuni mwawe, nto owo ahinanarihe nipuro Naka noowarya, okhala wira Miyano k'Apwiya, onaareeliha.''' ²⁴ Nto, Moise ahin'himerya molumo ala Aroni, anaawe, ni atthu otene a Wisryeli.