¹ Apwiya yahin'himerya Moise, wira: ² ''Mwahimerye atthu a Wisrayeli: 'Wakhula m'motja a Wisrayeli, hata wakhula nletto onakhala Wisrayeli, ontthuna onvahererya mwanawe Moloko, vekhweeli onookhwa. Atthu a nttetthe owo ampwexe ni maluku. ³ Ni-tho kinoorukuxa owitho Waka wa ntthu owo, kinoonkhumiha eriyari ya nloko nawe, okhala wira owo onvahererya mwananwe Moloki, tjitjam'mo oraviha nipuro Naka noowarya ni ooveha ntjina Nka. ⁴ Wakhala atthu a nttetthe owo onoophuta owitho waya mwaha wa ntthu owo onavahereryale mwanawe Moloki, ni khuhimwinva, ⁵ nto Miyano kinoorukunuxa owitho waka mwaha wa yowo ni nloko nawe, ni kinonkhumiha, ni wakhula ole ontthuna oraruwa onttharaka Moloki. ⁶ Ale anaaphela ale anlavula ni atthu ookhwa, hata ale anlavula ni minepa, anararuwana, kinoorukunuxa owitho Waka ni kinimwakhumiha eriyari ya atthu aka. ⁷ Tjitjam'mo wiraneyaka, mwireeliheke wa Apwiya ni nkhaleke oowarya, wahoo Miyano k'Apwiya, Muluku enyu. ⁸ N'haana wintjathi yjooruma Tjaka ni otthara. Miyano k'Apwiya, kinoorelihani. ⁹ Wakhula ole ontthuna waatakhaliha atithi awe hata amayawe, ekhweeli ohaana okhwa. Okhala wira ohatakhaliha atithi awe ni amayawe, nto yootakhala eyo tiyaawe ni ohaana okhwa. ¹⁰ Nlopwana onraruwa ni nthiyana a nlopwana nkina, eyo piyo, wakhula nlopwana onraruwa ni nthiyana a mun'nawe --vekhweeli ahaana winviya, owo ni nthiyana namararuwa. ¹¹ Nlopwana onrupa ni amwaraya amayawe ohaaveha atithi awe. Owenli, mwana ni amwaraya atithi awe, anrerela ookhwa. ¹² Akhala nlopwana ontthuna orupa ni mwarawe mwanawe, owenli ahaana okhwa. Awo apaka yootakhala. Awo akhalana nlattu ni ahaana okhwa. ¹³ Akhala nlopwana ontthuna orupa ni nlopwana nkina, ntoko nthiyana, owenli aya apaka yootakhala ni ahaana okhwa. Awo ahaana nlattu ni anrerela okhwa. ¹⁴ Akhala nlopwana ontthuna onthela nthiyana ni khunthela-tho mayawe, eyo tiyootakhala. Awo ahaana opahiya, owo ni axithiyana, wira ohikhale otakhala eriyari enyu. ¹⁵ Akhala nlopwana ontthuna orupa ni enama, ohaana okhwa, ni mwinve enama eyo. ¹⁶ Wakhula nthiyana ontthuna wattamela enama wira arupane, n'haana winva enama ni nthiyana owo. Awo ahaana okhwa. Awo attheka ni ahaana okhwa. ¹⁷ Nlopwana arupa ni nrokorawe, hata okhala mwana a atithi awe hata amayawe-- khurupana, etthu ya haaya. Awo ahaana okhumihiya eriyari ya atthu, okhala wira owo orupa ni nrokorawe. Owo onookuxa yootthrka eyo. ¹⁸ Nlopwana arupa ni nthiyana oryeene m'mwerini mwawe, owo onootjuwela okhuma wawe ephome. Tjitjam'mo, owenli aya, nlopwana ni nthiyana, ahaana okhumihiya eriyari ya atthu. ¹⁹ N'hirupe ni mun'nawe mayenyu, n'nakhaka nrokorawe tithinyu, okhala wira on'nonyokhaniha nloko nenyu noowattamela. Nyuwano n'nookhalana yoottheka eyo. ²⁰ Nlopwana arupa ni nthiyana a atatawe, owo on'nikwakwanyula tatawe. Awo anookhalana yoottheka eyo ni anookhwa vohikhalana anamwane. ²¹ Nlopwana anthela mwarawe mun'nawe, eyo tiyoonanara, waholo owo on'nihiya ikettelo tjoothelana tja mun'nawe ni awo khan'yara. ²² Nyuwano n'haana, nto, ikettelo tjaka tjootene; n'haana wettela nttetthe onoorowanakani wira eyo ehoorapheyeni. ²³ Nyuwano n'heetteke nttharika tjoolimalela tja atthu, okhala wira Miyano kinoowettihani, waholo atthu awo an'nipaka tjitthu n'yo tjootene, ni Miyano kin'naanyokha. ²⁴ Miyano kin'noohimeryani: ''Nyuwano n'noohalana nttetthe owo; Miyano kinamoovahani ntoko yohalanenyu, nttetthe wookhala eleti ni oravo. Miyano k'Apwiya Muluku enyu, onoovalanyani ni atthuna akinaku. ²⁵ N'haana, vano, waavalanya axinama akumi ni ohikla akumi ni axaapalame akumi ni ohikhla akumi. Nyuwano n'hinanariheke ni axinama ohikhala akumi hata axipalame akinaku hata inama tjikina tjiniipurula vathi, tjen'yo kinvalanyaka wa nyuwano ntoko tjohiloka. ²⁶ Nyuwano n'haana okhala oowarya, waholo, Miyano, Apwiya, koowaarya, ni Miyano kin'noovalanyani wa atthu akinaku, waholo timwaawaka. ²⁷ Nlopwana hata nthiyana onlavaula ni atthu okhwa hata minepa vekhweeli ohaana okhwa. Atthu ahaana omphwexa ni maluku. Awo akhalana yoottheka ni vekhweeli ahaana okhwa.