¹ Apwiya yahin'himerya Moise, wira: ² ''Mwahimerye atthu ootene a Wisrayeli wira: 'Nkhaleke oowarya, okhala wira Miyano, Apwiya, Ka Muluku oowarya. ³ Nyuwano otene mwatiitiimiheke atithinyu ni amayenyu, ni mwintjathiki Isabadu tjaka. Miyano K'Apwiya, Muluku enyu. ⁴ N'hitthikele waamuluku a ethiru, n'hiipakeleke amuluku eethiru. Miyano K'Apwiya, Muluku enyu. ⁵ Mwavaha yoovaha enyu wa Apwiya, nvaheke wira yaakheliye. ⁶ Ehana okhala yoolya ya nihiku nenlo munvahenyu, wala, nihiku nooxa. ⁷ Yakhala entthuna ohala mpakha nihiku na neeraru, eyo yoorava. Eyo khintthuna waakheliya. ⁸ Wa tjotene, ole otene ontthuna olya onookuxa yootakhala eyo, okhala wira owo ohoonana yoovahiya Apwiya. Nthu owo ohaana winviya eriyari ya nloko nawe. ⁹ Nyuwano mwahepa ni matata enyu, n'hihephe tjootene nkherekhere mwa ematta, n'nakhaka otakaniha yoohephenyu yootene. ¹⁰ N'hintjathi evinya enyu yootene ya m'matta mwenyu, n'nakha ewuva entthuna omorela m'matta mwenyu wa evinya. Nyuwano n'haana wahiyerya ale oohikhalana ni aletto. Miyano k'Apwiya Muluku enyu. ¹¹ N'hiiye. N'hoothe. N'nakhala wawoka akina. ¹² N'hilaphele ntjina Naka moothaka, n'nakhala oveeha ntjina na Muluku enyu. Miyano k'Apwiya. ¹³ N'hin'haxe namwattamananenyu, n'nakhala omwin'yerya. Yoonliva nanteko enyu ehirupe ni nyuwano mpakha nihiku nikina. ¹⁴ N'hintakhalihe ntthu ohininwa, n'nakhala n'hikhale nluku nonkwakwatthula ntthu onhinoona. Ohiya vo, m'mooveke Muluku enyu. Miyano k'Apwiya. ¹⁵ N'hahimyeke anamona owootha. N'himphukele mun'ninyu mwaha woohikhalana, hata mwaha wookhala mulupale. Ohiya vo, mphukeke voorerela. ¹⁶ N'hiwootherye axin'ninyu, mpheleke okhapelela okumi wa axin'ninyu. Miyano k'Apwiya. ¹⁷ N'hin'nyokhe mun'ninyu vamurimani venyu. N'haana ni ekhweeli onkhottiherya mun'ninyu, wira n'hirele mphantti yoottheka awe. ¹⁸ N'hiiphukele, n'nakhala wintjathi yootakahla mwaha wa mun'ninyu, ohiya vo, mumphenteke mun'ninyu tjitjam'mo tjiniiphentinyu. Miyano k'Apwiya. ¹⁹ Nyuwano mwintjathiki ikettelo Tjaka. N'hihiye inam tjenyu tjiyarihiyaka ni inama tjikina. N'hitakanihe ipyo pinli tjoovirikana, mwaala vale m'matta mwenyu. N'nakhala n'hiware ikuwo tjoopakiya ni mithinto minli. ²⁰ Wakhula nlopwana ontthuna orupa ni nthiyana ephottha ootheliya ni nlopwana nkina, nlelo ohinatthi otaphuliya hata ohin'ya, awo ahaana ohukhum'mwa. Khantthuna okhwa, waholo owo khahiyo aari ootaphuwa. ²¹ Nlopwana ohaana ovaha nkuttho wa Apwiya, vankhora wa enupa ya nthukumano, epwittipwitthi yoovahiya ntoko nkuttho. ²² Wira nankuttho onlompele owo oholo wa Apwiya, ekina ntoko yoovaha mwaha wa itampi tjipakalyawe. Nto yoottheka eyo enooleveleliya. ²³ Okathi ontthunenyu okela m'muttettheni ni kwaala wakhula yoolya. Nto nyuwano n'haana okhottiha olyiya iyoolya tjootene, n'hina mwa iyakha ttharu. Iyo ihilyiye. ²⁴ Wa tjotene, eyakha ya enetjese, wakhula yoolya ehaana oreelihiya, ntoko yoovaha yowavuwiha Apwiya. ²⁵ Eyakha ya eneethau, nyuwano enlyeeke mihokorokho, wira mihokorokho nyo tjitepeke wim'ma. Miyano k'Apwiya, Muluku enyu. ²⁶ N'hikhure enama ni ephome. N'hikoheke minepa mwaha wa yoomelo, n'nikhala tjoowerya tja ephattu. ²⁷ N'hitthareke tjoolimalela tja atthu ahinaamini, ntoko omettha ikharari tjenyu nkherekhere hata ereru. ²⁸ N'hipophe erutthu enyu mwaha wa atthu ookhwa, n'nakhala olepa etthu erutthu enyu. Miyano k'Apwiya. ²⁹ N'hikhanyererihe mwanenyu wira araruweke, wira elapo ehiraruweke, n'nakhala etthaya otjareya tjootakhala. ³⁰ Nyuwano n'haana wintjathi Isabadu Tjaka ni ottottimiha etabernakulu Aka. Miyano k'Apwiya. ³¹ N'haaphele atthu anaaphelatja atthu oowokhwa, n'nakhala minepa. N'haaphele wira n'hithanyiye. Miyano k'Apwiya, Muluku enyu. ³² Nyuwano n'haana okhala ooweemela oholo waatthu oowuluvala ni atthu aalupale. Nyuwano n'haana omova Muluku enyu. Miyano k'Apwiya. ³³ Akhala nletto ontthuna okhala elapo enyu, nyuwano n'hikhale on'haaxa. ³⁴ Nletto ontthuna okhala ni nyuwno, nyuwano n'haana omphenta ntoko nyuwano, waholo mwaari aletto elapo ya Wegitu. Miyano k'Apwiya, Muluku enyu. ³⁵ N'hiphime ni mphimo wowotha okathi oniphimenyu etthu. ³⁶ Nyuwano n'haana ophima vooreerela mwa tjotene, ephepa, efa, ehini. Miyano k'Apwiya, Muluku enyu, okhumihaleni elapo ya Wegitu. ³⁷ Nyuwano n'haana winwelela tjooruma Tjaka tjotene ni ikttelo Tjaka ntthariheleke. Miyano k'Apwiya'''.