¹ Apwiya yahin'himerya Moise, wira: ² ''Mwahimerye atthu a Wisrayeli wira: 'Miyano K'Apwiya Muluku enyu. ³ N'hipake etthu emotjaru empakaya atthu a Wisrayeli, wenwo mwakhalanyuwo. Ni n'hipake jitthu tjimpakaya atthu a Okanani, elapo Miyano kinoorehakani, n'nakhala n'hittharihe tjoolimalela tjaya. ⁴ Ikettelo tjaka tjikhanlenyu ootthara, ni tjooruma Tjaka tjikhalenyu oowintjathi, wira mweetteleke, okhala wira Miyano ka Apwiya Muluku enyu. ⁵ Wa tjotene, mwintjathiki tjooruma Tjaka ni ikettelo Tjaka. Ole ontthuna weettela, onaakha nkumi. Miyano k'Apwiya. ⁶ Ohikhale nlopwana ontthuna orupa ni m'mutji awe. Miyano k'Apwiya. ⁷ N'hin'yevihe tithinyu nrupaka ni amayenyu. Awo t'amayenyu! N'hayevihe. ⁸ N'hirupe ni mwaraya atithinyu; n'hayevihe atithinyu nthinto owo. ⁹ N'hirupe ni nrokorenyu, khavaniirela mphantti owo okhala mwana mphantti wa tithinyu hata mphantti wa mayenyu, hata oyariya owan'nyi hata ota. N'hirupe ni axirokorinyu. ¹⁰ N'hirupe ni mwana a mwanenyu nlopwana hata mwana a mwanenyu nthiyana. Eyo entthuna okhala ehaya enyu. ¹¹ N'hirupe ni mwana a amwaraya atithinyu, oyariye ni atithinyu. Owo nrokorinyu, ni n'hirupane. ¹² N'hirupe ni nrokoraya atithunyu. Owo m'mtji oowattamela a atithinyu. ¹³ N'hirupe ni n'himaaya amayenyu. Owo m'mutji owaattamela ni amayenyu. ¹⁴ N'hirupe ni mwarawe n'himaaya atithinyu. N'himwaattamele ni yotthuna eyo; owo mathiinyu. ¹⁵ N'hirupe ni mwarawe mwanenyu. Owo mwarawe mwanenyu; n'hirupane. ¹⁶ N'hirupe ni mwarawe mun'ninyu; n'hipake etthu iyo. ¹⁷ N'hirupe ni nthiyana m'motja wala ni mwaninyu, hata mwanawe mwaninyu nlopwana hata mwaninyu nthiyana. Awo amutji aya owaattamela, ni orupa ni awo etthu yootakhala. ¹⁸ N'hinthele mun'nawe mwarinyu, ni orupana amwarinyu oopatjerya aryeene akumi. ¹⁹ N'hirupe ni nthiyana oryene m'mwerini mwawe. Owo toonanara mahiku awo. ²⁰ N'hirupe ni nthiyana ntoko owo okhala wira onimooraviha. ²¹ N'haatuphihe aniinyu mooro, wira avahereriye Moloki, okhala wira n'hivehe ntjina na Muluku enyu. Miyano k'Apwiya. ²² N'hirupe ni nlopwana nikina ntoko nthiyana. Eyo tiyootakhala. ²³ N'hirupe ni enama, mwiiravihaka ni yeeyo. Ohikhale nthiyana ontthuna orupa ni enama. Eyo tiyootakhala. ²⁴ N'hiiravihe ni wakhula etthu wa tjen'ya, waholo tjam'mo atthu a nloponi ahiiraviha, atthu antthunaka waavalanya wa nyuwano. ²⁵ Etthaya yoorava, nto Miyano koohukhumu itampi tjaya ni etthaya ahaarapheya atthu aya. ²⁶ Nyuwano, wa tjotene, mwintjaathi tjooruma Tjaka ni ikettelo Tjaka, ni n'hipake wakhula tjitthu n'ya tjootakhala, n'nakhala axineene n'nakhala atthu oowa. ²⁷ Okhala wira iya titjootakhala atthu aravihanalyaya etthaya, ale yaakhala mu n'hinatthi nyuwano, nto wananano etthaya yoorava. ²⁸ Vano, phoole etthaya ehoorapheyeni ni nyuwano mwaha wa tjootakhala tjenyu, tjitjam'mo eyo yaarapheyalya atthu akina n'hinatthi nyuwano. ²⁹ Wakhula ole ontthuna opaka wakhula etthu wa tjen'ya, ayo, ole ontthuna opaka tjitthu n'ya, animwinviya nloko nawe. ³⁰ Vano, n'haana wintjaathi tjooruma Tjaka n'hipakaka wakhula tjitthu n'ya tjotene tjoonanara, nto n'hirave ni tjen'yo. Miyano k'Apwiya Muluku enyu'''.