¹ Apwiya yahin'himerya Moise, wira: ² ''Mun'himerye Aroni ni anaawe. Mwahimere wira ahaattamele tjitthu tjowaarya tja atthu a Wisrayeli, tjen'yo awo ankivahaya Miyano. Awo attittimiheke nipuro Naka Nowaarya. Miyano K'Apwiya. ³ Mwahimerye awo: 'Wakhula ntthu, eriyari ya otjuulu enyu, okhuma woopatjeryani mpakha wookhitjeryani wa maloko, ori n'hina, akumana wa tjitthu tjoowaarya atthu a Wisryayeli anavahaya Apwiya, ntthu owo ohaana winviya oholo Waka. Miyano k'Apwiya. ⁴ Ohikhale otjuulu wa Aroni ontthuna okhalana eretta ya varutthu yooraveya, hata wiipa varutthuni vawe, ontthuna olya yoolya ya Apwiya mpakha ovona. Wakhula ntthuna okwata etthu yoonanara ntoko ntthu ookhwa, hata nlopwana onkhuma elopwana, ⁵ hata wakhula ntthu ontthuna onkwata nakhwiitti ontthuna on'nanariha, wala wakhula ntthu ontthuna on'nanariha, wakhula nthinto woonanariha - ⁶ nto, wakhula nankuttho ontthuna onanara ni wakhula etthu onaakhala onanara mpakha wiila. Owo ohilye wakhula etthu yowaarya, wahikhale ooroorapa ni matji. ⁷ Okathi ntjuwa ninkhumaaya, owo, nto, onaakhala ooreera. Numala onaya ntjuwa, owo vanonrerela olya yoolya yoowarya, walo iyo iyoolya tjinyu. ⁸ Owo ahikhuure enama ephwanyiye yookhwa tjinviye ni inama tja ntakhwani, wira n'hinanarihe. Miyano k'Apwiya. ⁹ Anankuttho atthareke ikettelo Tjaka, nto awo anookhalana yoottheka eyo ni anookhwa mwaha wookiveha. Miyano' k'Apwiya, anaareeliha. ¹⁰ Ohikhale ontthu ohikhanle nloko na nankuttho, vamotja ni atthu aya oolatuliya ni ipottha tjaya, okhanle olya eyoolya yoowarya. ¹¹ Vano, nankuttho athuma epottha ni ntjurukhu awe, epottha eyo eyeelyeke yoolya ya Apwiya. Ni amutji akina a nankuttho ni ipottha tjooyariya owan'yeya, ni awo alyeeke tjitthu n'ya. ¹² Akhala mwana a nankuttho ontthuna otheliya ni nlopwana oohikhala nankuttho, owo ahilye yoolya yoowarya. ¹³ Nto mwana anakuttho akhala namukhweli, ni owo khuhiyaara, ni khutthikela okhala owan'nyaya atithi awe ntoko emwali awe, owo alyeeke yoolya ya atithi awe. Vano ohikhale ole ohikhanle nloko na nankuttho ontthuna olya yoolya ya nankuttho. ¹⁴ Akhala nlopwana ontthuna olya yoolya yowarya vohitjuwela, nto owo onlive nankuttho mwaha wa etthu eyo; owo ohaana watjererye ikwaha thanu ni antthikiherye nankuttho wa eyo olyalawe. ¹⁵ Atthu a Wisryayeli ahikhaleke oothanya tjitthu tjavahalyaya Apwiya, ¹⁶ n'nakhala wira etthu entthuna waatthekiha mwaha woolya yoolya yoowarya, waholo Miyano k'Apwiya, kinaareliha wa Miyano.''' ¹⁷ Apwiya yahilavula ni Moise, wira: ¹⁸ ''Mwin'himerye Aroni ni anaawe, ni atthu ootene a Wisrayeli wira: 'Wakhula ntthu a Wisrayeli, hata nletto onkhala eriyari aya, yavaha nkuttho - hata okhala anatiri aya, hata okhala yoovaha yootthuna, wala awo ovaha nkuttho aya wa Apwiya, ¹⁹ wira tjaakheliye, awo ahaana ovaha enama yoolopwana yoohikhalana eretta enama ya nyompe, epwittipwitthi, hata ipuri. ²⁰ Vano nyuwano ehikhale entthunenyu ovaha yookhala mixankiho. Miyano nkinaakhela eyo wa nyuwano. ²¹ Wakhula ntthu ontthuna ovaha nkuttho wa inyompe hata ipwittipwitthi wa Apwiya wira antthukule natiri, hata yoovaha yootthuna, eyo ehaana okhala ekumi wira yakheliye. Ohikhale nxakiho va mwaminamani. ²² N'hivahe inama tjihinoona, tjoorakala hata tjoohikhala tjana, hata tjoohimalela, makhwatta ni ovele. N'haavahe iyo Apwiya ntoko nkuttho vaikho waltari. ²³ N'haana ovaha yootthuna, enyompe wala epwittipwitthi hata yoorekama ni yookhuveya makhata, nto yoovaha ntoko ela khenaalhela nipuro na natiri. ²⁴ N'haavahe Apwiya inama tjoohikhala tjana ilopwana tjaya, tjooxileya, hata tjoothikileya. N'hipake eyo m'muttettheni mwenyu. ²⁵ N'hivahe eyo matata maletto ntoko yoolya wa Muluku enyu, okhala wira iyo tjihaana mixankiho ni titjoohiloka. Iyo khainakheliya nipuro nenyu. ²⁶ Apwiya yahilavula ni Moise wira: ²⁷ ''Yayariya enama ebezeru, epwittipwitthi hata epuri, iyo tjihaana okhala ni aximamaya mahiku thanu napili. Nto, nihiku na eneethanu natthanru orowa oholo, tjinimwaakheliya ntoko nkuttho hata nkuttho woovahiya vaikho wa Apwiya. ²⁸ N'hivahe nkuttho enama ni mwasana aya, tjoopili nihiku nimotja. ²⁹ Nyuwano mwavaha nkuttho yoovaha ya mahala, n'haana ovaha wira yakheliye. ³⁰ Eyo ehaana olyiya nihiku nenlo entthunaya ovahiya. Ehikhale entthuna ohala mpakha nihiku nikina. Miyano k'Apwiya. ³¹ Nto, n'haana wintjahi ikettelo tjaka ni ntthareke. Miyano k'Apwiya. ³² Nttittimihe ntjina Naka Noowarya. Miyano kihaana owehiya nroko oowarya eriyari wa maloko a Wisrayeli. Miyano k'Apwiya, kinooreelihani wa Miyano, ³³ Ole okhumihale elapo ya Wegitu, wira okhale Muluku enyu. Miyano k'Apwiya''.