¹ Kisha malaika wa tsano achipuliza tarumbetaye. Nichona nyenyezi idzegbwa kula mulunguni. Nyenyezi iyo ichipewa funguo ya kuzimu. ² Achenda achifugula kuko kuzimu, mosi uchonekana wambuka here kpwamba ni mosi uriwolaa kpwa tanuri bomu. Dzua na hewa zichigaluka kukala chiza kpwa uwo mosi uriwolaa kuzimu. ³ Kula kpwa mosi, nzige mvachombola mvachivamia ntsi, namvo mvachipewa uwezo here wa inje dzulu ya ntsi. ⁴ Mvachamuriwa mvasivamie nyasi wala muhi wowosi, wala mumera wowosi, bali mutu yoyosi asiyekala na muhuri wa Mulungu chiranguni hakpwe. ⁵ Kamvapewerwe ruhusa kumvolaga, bali kumvatesa kpwa miezi mitsano. Chiriro chao chindehalana na cha mutu adzelumwa ni inje. ⁶ Siku zizo, atu mvandatafuta chifo bali kamvandachipata. Mvandatamani chifo lakini chifo chindamvachimbira. ⁷ Nzige mveonekana na umbo ra farasi mvario mvadzidzitayarisha kpwenda vihani. Vitswani mwao mvekala mvaonekana here mvavishwa viremba vya dhahabu, na nyuso zao zeonekana here sura za adamu. ⁸ Mvekala na nyere here za ache, na meno gao gekala here ga simba. ⁹ Vifuani mvekala mvadzifungbwa here ngao za vyuma, na sauti ya mamvamva gao yekala here sauti yombolayo kpwa musafara wa farasi mvendao vihani. ¹⁰ Mvekala na michira ya kusuhira here ya inje; michirani mwao mvekala na uwezo wa kudhuru atu kpwa miezi mitsano. ¹¹ Mufalume ariyekala dzulu yao wekala ni iye malaika wa kuzimu. Dzinare kpwa luga ya chi-Ebrania, yekala ni Abandoni, na chi-Yunani mvachimweha Apoloni. ¹² Mafa ga kpwanza gatsupa. Mara tu baada ya gago, bado kuna majanga mairi zaidi gadza. ¹³ Malaika wa sita achipuliza tarumbetaye, nami nichisikira sauti kula kpwa pembe zo za madhabahu ga dhahabu zirizombere ya Mulungu, ¹⁴ ichimwambira iye malaika wa sita ariyekala agbwira yo tarumbeta, "Mvarichire mvo malaika anne mvariokala mvafungbwa muho mubomu Eufrate." ¹⁵ Malaika mvamvo anne mvariokala mvadzitayarishwa wakati uwo, siku iyo, mwezi uwo, na mwaka uwo mvachirichirwa kolaga sehemu tahu ya adamu. ¹⁶ Hesabu ya majeshi mvariokala mvatsukulwa ni farasi mvekala ni milioni magana mairi (200,000,000). Hesabu yao neisikira. ¹⁷ Vivi ndivyo nirivyomvona farasi kahi za maono gago hamwenga na mvo mvariokala mva-ahumira: Ngao zao zekala rangi tune, samawati na rangi ya manjano here madini ga chiberiti. Vitswa vya farasi vyeonekana here vya simba, na makanwani mwao mweombola moho, mosi na madini ga chiberiti. ¹⁸ Sehemu mwenga kahi za tahu ya atu mveolagbwa chipindi chicho cha mapigo mahahu: uwo moho, mosi na chiberiti virivyo-ombola makanwani mwao. ¹⁹ Kpwa kukala nguvu za farasi zekala zi mwao makanwani na kahi za michirani mwao-kpwa kukala michira yao yekala here nyoka, mvariokala na vitswa virivyokala na uwezo wa kulumiza atu na vironda. ²⁰ Adamu anjine mvariosala, ambamvo kamvaolagirwe ni gago mapigo mahahu, kamvatubire mahendo gao, wala kamvarichire kpwabudu mapepo na vigango vya kutengezwa na dhahabu, fedha, shaba, mawe wala mihi-vitu virivyo kaviweza kona, kusikira wala kpwenenda. ²¹ Wala kamvatubire kpwa kolaga, utsai, uzinzi ama mahendo gao ga kpweya.