¹ Mwanang'onzi arihofugula muhuri wa fungahe, mulunguni kuchinyamala chasi cha nusu saa. ² Ndiho nichiona mvo malaika afungahe mvemao mbere za Mulungu, namvo mvachipewa tarumbeta fungahe. ³ Malaika munjine achidza yugbwirira bakuli ra dhahabu iriyokala na uvumba, achikala yudzema kpwenye madhabahu. Uvumba munji sana weupewa ili aweze kuwomboza na mavoyo kahi za madhabahu mbere za chihi cha enzi. ⁴ Uwo mosi wa uvumba-hamwenga na mavoyo ga atakatifu a Mulungu-mvachambuka mbere za Mulungu kula kpwa mikono ya Malaika. ⁵ Iye Malaika achihala keheri riro bakuli ra dhahabu achiritsaza na moho kula kpwa chihi cha enzi. Halafu achiritsuhatsi urimwenguni, naro richivunzika vunzika richomboza muriro wa chigbwaragbwara, ngurumo na radi hamwenga na kusumba kpwa intsi. ⁶ Mvo malaika afungahe mvariokala na zo tarumbeta fungahe, mvachidzitayarisha kuzipuliza. ⁷ Wa kpwanza achipuliza yakpwe, kuchombolera moho na mvula ya mawe kutsanganyika na mulatso. Ichirushwa intsi duniani na sehemu tahu ya intsi ichisha, sehemu tahu za mihi ichisha, na nyasi zosi mbitsi zichisha. ⁸ Malaika wa hiri naye achipuliza yakpwe, chitu here murima mure sana uriwokala washa na moho uchombola uchitsuhiwa baharini. Sehemu tahu za bahari zichigaluka mulatso, ⁹ sehemu tahu za viumbe virivyo baharini vichifa, na sehemu tahu za mashua zichibanangwa. ¹⁰ Malaika wa hahu achipuliza yakpwe, nyenyezi bomu sana kula mulunguni, iriyokala yang'ala here tochi ichigbwa kahi za miho na mazia ga madzi. ¹¹ Dzina ra nyenyezi iyo ni Pakanga. Sehemu tahu kahi za madzi zichigaluka pakanga, na anji mvachifa kula kpwa kunwa madzi gago kpwa kukala gegaluka kukala utsungu. ¹² Malaika wa nne achipuliza yakpwe, sehemu tahu kahi za dzua zichibanangika, hamwenga na sehemu tahu za mwezi na sehemu tahu za nyenyezi. Kpwa vivyo sehemu tahu ya zizo zichigaluka chiza; sehemu tahu za mutsana na tahu za usiku kazipatire mulangaza. ¹³ Nichilola keheri nami nichisikira sauti ya tai ariyekala wauruka nichimusikira weha kpwa sauti bomu achamba, "Shaka renu, shaka renu, shaka renu, mwimwi muishio duniani, kpwa kukala zizo tarumbeta zirizo zindapigbwa si kapindi, ni malaika mvoahahu mvasereo,"