¹ Garihotsupa gago, nichona malaika anne mvemire kahi za pembe zosi nne za dunia, kuno mvadzigbwira kusi zosi nne za dunia kpwamba kakuna ta kusi mwenga rinderuhusiwa kupiga dzulu ya ntsi, wala bahari, wala muhi wowosi. ² Nichona malaika munjine ariyelaa mombolero ga dzua, arekala yugbwirira muhuri wa Mulungu aishiye. Achomboza sauti bomu kpwa mvo malaika anjine mvarokala mvapewa uwezo kubananga dunia yosi na bahari: ³ "Musi-imarikize intsi, wala bahari wala iyo mihi mpaka hukale hudzimvapiga mihuri viranguni atumishi a Mulungu wehu." ⁴ Nichisikira yo hesabu ya mvo mvario-ikpwa mihuri: Laki mwenga na mirongo minne na nne elifu,(144,000) mvariopigbwa mihuri kula kpwa chila kabila mwenga ra atu a Israeli: ⁵ elifu kumi na mbiri kula kpwa mbari ya Juda mvepigbwa muhuri, elifu kumi na mbiri kula kpwa Rubeni, elifu kumi na mbiri kula kpwa Gadi, ⁶ elifu kumi na mbiri kula kpwa mbari ya Asha, elifu kumi na mbiri kula kpwa mbari ya Nafutali, elifu kumi na mbiri kula kpwa mbari ya Manase, ⁷ elifu kumi na mbiri kula kpwa Simioni, elifu kumi na mbiri kula kpwa mbari ya Lawi, elifu kumi na mbiri kula kpwa Isaka, ⁸ elifu kumi na mbiri kula kpwa mbari ya Zebuluni, elifu kumi na mbiri kula kpwa kabila ya Josefu na elifu kumi na mbiri kula kpwa mbari ya Benjamini mvepigbwa muhuri. ⁹ Garihotsupa gago, nichilola keheri, nichona kundi bomu ra atu mvasiotalika- kula kpwa chila taifa, kabila, atu na luga-mvadzema mbere za chicho chihi cha enzi cha Mwanang'onzi. Mvekala mvavala magbwanda meruhe kuno mvagbwira mitende mikononi, ¹⁰ mvachipiga kululu mvachamba: "Wokofu ni wa Mulungu, asegereye chihi cha enzi, na kpwa Mwanang'onzi!" ¹¹ Malaika osi mvekala mvemire mvazunguluka chihi cha enzi na mvo atumia na mvo viumbe anne, kisha mvachigbwa mbere za chihi cha enzi. Mvachimwabudu Mulungu, ¹² mvachamba, "Amina! Sifa, utukufu, hekima, shukurani, heshima, uwezo na nguvu zikale kpwakwe milele na milele! Amina!" ¹³ Kisha mumwenga kahi ya mvo atumia achinuza, "Mvano ni hio, mvadziovala magbwanda meruhe, na mvalanahi?" ¹⁴ Nichimwamba, "Bwana, uwe ndiwe umanyaye," naye achinijibu achamba, "Mvamva ni ara mvariolaa kahi za mateso manji. Mvafula magbwanda gao na kugahenda meruhe kahi za mulatso wa Mwanang'onzi. ¹⁵ Kpwa sababu ii, mvambere za chihi cha enzi cha Mulungu, namvo ni kumwabudu usiku na mutsana kahi za hekalure. Iye umonaye yusegere chihi cha enzi andamvatandazira hema dzulu yao. ¹⁶ Kamvandagbwirwa ni nzala keheri, wala kamvandagbwirwa ni chihu. Dzua karindamvapiga, wala vukuto rorosi. ¹⁷ Kpwa kukala Mwanang'onzi ariyekahi za chihi cha enzi andamvarisa, na kumverekeza kpwenye miho ya madzi ga uzima, chisha Mulungu andamvafuta matsozi mwao matsoni."