¹ Nichilola wakati Mwanang'onzi arihokala wafugula mwenga kahi ya iyo mihuri mifungahe, nami nichisikira mumwenga kahi ya mvo viumbe anne mvaishio achinena kpwa sauti ambayo yekala here chigbwaragbwara, "Nzo!" ² Nichilola nichona farasi mweruhe. Ariyekala achimwendesha wekala agbwirira uha, chitswani achivishwa chiremba cha chifalume. Weombola here mushindi ariyeombola ashinde. ³ Mwanang'onzi arihofugula fundo ra hiri, nichimusikira chiumbe wa hiri naye achinamba, "Nzo!" ⁴ Chisha farasi munjine naye achombola-mwenye rangi nziho sana tune. Ariyekala achimwendesha wepewa ruhusa ku-uhoka urimwengu amani, ili atu mvatsinzane mvolagane. Yuyu wepewa upanga mubomu. ⁵ Mwanang'onzi arihofugula fundo ra hahu, nesikira chiumbe wa hahu achinamba "Nzo!" Nichona farasi mwiru, na ariyekala achimwendesha wekala yugbwira mizani mikononi. ⁶ Nichisikira sauti here kula kpwa viumbe mvosi anne ichamba, "Chibaba chimwenga cha ngano kpwa dinari mwenga, na vibaba vihahu vya shayiri kpwa dinari mwenga. Ala usidhuru mafuha na divai." ⁷ Mwanang'onzi arihofugula fundo ra nne, nichimusikira chiumbe wa nne achinamba, "Nzo!" ⁸ Nichona farasi adziyeparara. Ariyekala wamwendesha wekala wehewa Chifo, na kuzimu yekala yamutua. Mvachipewa mamulaka dzulu ya robo mwenga ya intsi, mvolage kuhumira upanga, nzala na makongo, na pia anyama a tsakani mvario dzulu ya intsi. ⁹ Mwanang'onzi arihofugula fundo ra tsano, nichona tsini ya madhabahu maroho ga mvario olagbwa kpwa kuhubiri neno ra Mulungu na shuhuda mvarizokala nazo. ¹⁰ Mvachirira kpwa sauti bomu, "Mpaka rini mutawala wa vyosi, mutakatifu na mujeri, undiho hukumu mvario duniani na kuhurihira mulatso wehu?" ¹¹ Kisha chila mumwenga wao achipewa gbwanda reruhe, kisha mvachambwa mvarinde kpwa muda mufuhi zaidi mpaka hesabu yao ikamilike ya atumishi anzao na ndugu zao mvariokala ni mvolagbwe. ¹² Mwanang'onzi arihofugula fundo ra sita, nichilola nako kuchikala na kusumba kubomu kpwa intsi. Dzua richigaluka richikala riru here gunia, na mwezi uchikala here mulatso. ¹³ Nyenyezi za mulunguni zichigbwa duniani, here viratu mutini ugbwagavyo matundage maitsi wakati uchitetemeshwa ni peho nyinji. ¹⁴ Mulangaza uchangamika here gombo rikunzwaro. Chila murima na chisiwa vichisengezwa kula hatuhe. ¹⁵ Kisha afalume a dunia na atu maarufu, na alavya amuri, na matajiri, na enye nguvu, na anjine mvosi, atumwa kpwa mvariohuru, mvachidzifitsa mapangoni na kahi za mawe mabomu na mirima. ¹⁶ Mvachiyamba iyo mirima na mawe, "Hugbwerere! Hufitse kula kpwa uso wa yuya adziyesagala kpwenye chihi cha enzi na kula kpwa koro za Mwanang'onzi. ¹⁷ Kpwa kukala siku bomu ya koro za Bwana ifika. Andeiweza nani?"