¹ Kisha nichilola mukono kulume wa iye arekala yusegere chihi cha enzi, nichona gombo ririro andikpwa mbere na nyuma, rekala rifungbwa mafundo kisha richipigbwa mihuri mifungahe. ² Nichona malaika mubomu achitangaza kpwa sauti bomu, "Asitahiliye kufugula mafundo ga gombo rino nani?" ³ Kakukalire na hata mumwenga si duniani wala mulunguni ariyeweza kurifugula wala kurisoma. ⁴ Nichirira kpwa utsungu kpwa kukala kakupatikanire hata mumwenga ariyesitahili kufugula gombo riro wala kurisoma. ⁵ Ala mumwenga kahi ya mvo atumia achinamba, "Usirire. Lola! Simba mbari ya Juda, lukolo lwa Daudi, yushinda. Waweza iye kurifugula gombo riro mafundoge gosi mafungahe." ⁶ Nichona Mwanang'onzi wemire kahikahi ya sehemu iriyokala na chihi cha enzi na kahi ya mvo viumbe anne na mvo atumia. Wekala here yudzolagbwa. Wekala na pembe fungahe na matso mafungahe, ambago tafusiriye ni roho fungahe za Mulungu arizo zihuma urimwenguni kosi. ⁷ Achenda achirigbwira riro gombo mukonowe wa kulume ariyekala yusegere ho henye chihi cha enzi. ⁸ Arihokala yurihala ro gombo, mvo viumbe anne na atumia mirongo miri na nne mvachigbwa mbere za iye Mwanang'onzi. Chila mumwenga wao wekala ana chinubi mukononi na bakuli ra dhahabu ritele uvumba, ambaro ndo mavoyo ga atakatifu a Mulungu. ⁹ Mvachemba wira musha: "Wasitahili kuhala gombo na kurifugula mafundoge. Kpwa kukala wetsinzwa, na kpwa mulatsowo, uchimvakombola atu a Mulungu kula kpwa mbari zosi, kabila zosi, atu na hata mataifa. ¹⁰ Wemvahenda kukala ufalume na ahubiri atumishi a Mulungu, namvo mvandatawala dunia." ¹¹ Ndiho nichilola nami nichisikira sauti ya malaika anji ambamvo mvazunguluka chihi cha enzi hamwenga na mvo viumbe na mvo atumia. Hesabu yao kamili mvekala elifu kumi kpwa ma elifu kumi kpwa ma elifu na ma elifu. ¹² Mvachinena kpwa sauti mwenga bomu, "Asitahiliye ni iye Mwanang'onzi, ariye yutsinzwa, ili ahochere nguvu, utajiri, hekima, heshima, utukufu na nguma." ¹³ Nesikira chila chiumbe chirichokala Mulunguni na duniani na tsini ya ntsi na dzulu ya bahari-chila chimwenga-chichamba, "Kpwa iye asegereye kpwenye chihi cha enzi, na kpwa Mwanang'onzi, sifa zikale kpwao, heshima, utukufu na utawala wa kare na kare." ¹⁴ Mvoviumbe anne mvachamba, "Amina!" namvo atumia mvachigbwa, mvachiabudu.