¹ Kisha nichona malaika munjine mubomu achitimatsi kulaa mulunguni. Wekala avala ingu, na kuchikala na chisichi cha mvula dzulu ya chitswache. Usowe wekala here dzua na maguluge gekala here nguzo za moho. ² Wekala agbwira chitabu chitite, chirichokala chilwazu mwakpwe ganzani. Achiika chiguluche cha kulume dzulu ya bahari na chiguluche cha kumotso dzulu ya intsi kavu. ³ Kisha achenula sauti bomu here simba angurumaho. Arihoenula sauti, zira radi fungahe nazo zichinguruma. ⁴ Radi fungahe zirihonguruma, nekala nihehi kpwandika, ala nichisikira sauti kulaa mulunguni ichamba, "Tunza ikale siri chiratu chiricho radi fungahe zidzinena. Usandike." ⁵ Kisha ye malaika niremona adzema dzulu ya bahari na intsi kavu, achenula mukonowe dzulu mulunguni. ⁶ Achilaha kpwa iye aishiye milele na milele, ariyeumba mulunguni na vyosi virivyomo, duniani na vyosi virivyomo na bahari na vyosi virivyomo, ye malaika achamba, "Kakundakala na muda wa kutariza keheri. ⁷ Ala siku ambayo malaika wa fungahe andakala hehi kuipuliza tarumbetaye, ndiho siri ya Mulungu indihokala itimira, here arivyotangaza umvoro mudzo kpwa atumishie manabii." ⁸ Sauti niriyoisikira kula mulunguni ichinena nami keheri: "Uka, wende ukahale chira chitabu chitite chiricho lwazu ganzani mwa malaika adziye-ema dzulu ya bahari na intsi kavu." ⁹ Kisha nichenenda kpwa iye malaika nichimwamba anipe chicho chitabu chitite. Achinamba, "Hala chino chitabu kisha uchirye. Chindaihenda tumboyo ikale utsungu, ala mwako kanwani mundakala tamu here asali." ¹⁰ Nichichihala cho chitabu chitite kula kpwa mukono wa iye malaika nichichirya. Chekala tamu here asali mwangu kanwani, ala baada ya kuchirya, tumbo yangu ichikala utsungu. ¹¹ Kisha mumwenga achinamba, "Wamalikana utabiri keheri dzulu ya atu anji, mataifa, makabila, na afalume."